Last updated on January 13th, 2023 at 03:08 pm
ಕುಡ್ಲ: ಹಿಮಾಚಲ ಪ್ರದೇಶೊರ್ದು ಗಾಂಜಾ-ಚರಸ್‌ಲೆನ್ ರೈಲ್‌ಡ್ ಕನತ್‌ದ್ ಕುಡ್ಲದ ಉದ್ಯಮಿಲೆಗ್, ಕಾಲೇಜಿದ ಜವನೆರೆಗ್ ಪಟ್ಟೊಂದಿತ್ತಿನ ಮೂಜಿ ಜನೊನು ಪೋಲೀಸೆರ್ ಪತ್ತ್‌ದೆರ್.
ಕಾರ್ಲದ ಮುಡಾರಿ ಸುಕೇತ್ ಕಾವ(33), ಆನೆಕೆರೆತ ಸುನಿಲ್(32) ಬೊಕ್ಕ ತಮಿಳ್ನಾಡ್‌ದ ಕೊಯಂಬತ್ತೂರ್ ಅರವಿಂದೆ(24) ಕೈದಾತಿನಕುಲು. ಹಿಮಾಚಲ ಪ್ರದೇಶೊದ ಕುಲ್ಲು ಜಿಲ್ಲೆದ ಗುಡ್ಡೆಲೆಡಿಪ್ಪುನಕಲೆಡ ಕಮ್ಮಿಗ್ ಗಾಂಜಾ-ಚರಸ್‌ಲೆನ್ ದೆತೊನೆದೆರ್. ಎಂಕ್ಲು ಪ್ರವಾಸಿಗೆರ್, ಟ್ರೆಕ್ಕಿಂಗ್ ಬೈದ ಪನೊಂದು ಅಲ್ತ ಜನೊಕ್ಲೆನ್ ಮಂಗೆ ಮಲ್ಪೆದೆರ್.
ಇಂಚ ಒಟ್ಟು ಮಲ್ತಿನ ಗಾಂಜಾನ್ ರೈಲ್‌ಡ್ ಕನತ್‌ದ್ ಕುಡ್ಲಡ್ ಉದ್ಯಮಿಲೆಗ್, ಕಾಲೇಜ್ ಜವನೆರೆಗ್ ಪಟ್ಟ್‌ದ್ ಕಾಸ್ ಮಲ್ತೊಂದಿತ್ತೆರ್ ಪಂದ್ ಕುಡ್ಲ ಪೋಲೀಸ್ ಆಯುಕ್ತೆ ಎನ್. ಶಶಿಕುಮಾರ್ ಪಂಡೆರ್‌.
ಈ ಮೂಜಿ ಜನೊನು ಕೈದ್ ಮಲ್ದಿನ ಸೆನ್ ಕ್ರೈಂ ಪೋಲೀಸೆರ್ ಮೊಕ್ಲೆನ ಕೈರ್ದ್ 500 ಗ್ರಾಂದಾತ್ ಚರಸ್, 1 ಕೆ.ಜಿ ದಾತ್ ಗಾಂಜಾ ಪತ್ತ್‌ದೆರ್. ಒಂಜಿ ರಿಟ್ಸ್ ಕಾರ್, ಮೊಬೈಲ್ ಫೋನ್‌ಲೆನ್ ಸೇರ್ದ್ ಸುಮಾರ್ 8 ಲಕ್ಷೊದಾತ್ ಮೌಲ್ಯೊದ ಸೊತ್ತುಲೆನ್ ಪತ್ತ್‌ದೆರ್.