Last updated on January 20th, 2023 at 06:29 am
ಮುಲ್ಕಿ ಸೀಮೆದ ಅಪ್ಪೆ ಉಲ್ಲಾಲ್ದಿದ ಅನುದೆತೊಂದು, ಕಾರ್ನಾಡ ರಾಜ್ಯೊಡು ಹರಿಹರ ದೇವೆರೆನ ಮನ ಮೆಚ್ಚಾವೊಂದು ಜುಮಾದಿ ಬೀದಿಸಾನೊಡು ನಿಲೆಯಾದುಪ್ಪುವೆ. ಅತಿಕಾರಿಬೆಟ್ಟು ಗ್ರಾಮದ ಓಡಿಜಾರು ಬೊಕ್ಕ ಬಜ್ಜೈದುಗ್ಗೆ ಜುಮಾದಿನ ನೇಮದ ಪೊರ್ಲು ತೂವೊಡು ಪನ್ದ್ ಬೀದಿಸಾನೊಗು ಬೈದಿಪ್ಪುವೆರ್. ಅಲ್ಪ ಅಕಲೆಗ್ ತಿಕ್ಕೊಡಾಯಿನ ಮರ್ಯಾದಿ ತಿಕ್ಕಂದೆ ಪೋದು ಕಡೆಕಣ್ಣ್‌ಡ್ ಕೊಡಿದುಕ್ಕ ಬುಡ್ಪೆರ್, ಅಪ್ಪೆ ಜುಮಾದಿ ನಿನ್ನ ಪೊರ್ಲು ತೂವರೆ ಇಡೆ ಮುಟ್ಟ ಬತ್ತ ಆಂಡ ಅವಮಾನ ಆದ್ ಪೋಂಡತ್ತ, ನಿನ್ನಂಚಿನ ಒಂಜಿ ದೈವ ಎನ್ನ ರಾಜ್ಯೊಡು ಉಪ್ಪಂದೆ ಪೋಂಡತಾ ಪನ್ದ್ ಬೆಸರ್‌ಡ್ ಪಿರ ಬರ್ಪೆರ್. ಕಾಲಾಂತರೊಡು ಓಡಿಜಾರು ತನ್ನ ಕುಲಕಸುಬು ಮರಮೂರ್ತೆ ಮೂರರೆ ನಾಲದಡಿ ಉಂಬುಚೌಟನ ಮಣ್ಣ್‌ಗ್ ಪೋಪೆ. ತಾರಿದ ಕೊಡಿಟ್ ಮರಮೂರ್ತೆ ಮೂರುನಗ ಓಡಿಜಾರುನ ಮೈಟ್ ಆವೇಶ ಬರ್ಪುಂಡು. ಇಡೀ ತಾರಿಗ್ ತಾರಿಯೇ ಅದುರುಂಡು. ಊರುಗು ಊರು ಸೇರ್ವೆರ್. ಕೊಲಕಾಡಿ ಗುತ್ತುಡು ಪುಟ್ಟುದು ಮುಲ್ಕೆ-ಪುತ್ತೂರು ಬರ್ಕೆಡ್ ಉಪ್ಪುನ ಮಾಮಲ್ಲ ಧರ್ಮಿಷ್ಟೆ ಮೈನ್ ಶೆಟ್ಟಿಪಾಲ್‌ನಡೆ ಊರಮಂದೆಲ್ ಪೋದು ನಡತಿ ಸೋಜಿಗ ಪನ್ಪೆರ್. ಮೈನ್ ಶೆಟ್ಟಿಪಾಲ್ ತನ್ನ ಚಾವಡಿದ ಕಾಂತೇರಿ ಜುಮಾದಿಗ್ ಕೈಮುಗಿದ್ ಉಂಬು ಚೌಟನ ಮಣ್ಣ್‌ಗ್ ಬತ್ತ್ ಪ್ರಾರ್ಥನೆ ಮಲ್ಪುವೆರ್, ದೇವೆರಾಂಡ ದೇಲಂತಡೆ ಕಟ್ಟಾವ, ದೈವ ಆಂಡ ಸಾನ ಮುಂಡಿಗೆ ಕಟ್ಟಾವ, ರಾಶಿ ದೀಪಾವ ಪ್ರಶ್ನೆ ಕೇನಾವ ತೋಜಿದ್ ಬಲ, ತಾರಿ ಏರ್ದಿ ಓಡಿಜಾರುನು ಎಡ್ಡೆಡ್ ಜಪುಡಾಲ ಪನ್ದ್ ಪನ್ಪೆರ್. ಓಡಿಜಾರು ತರೆ ತಿರ್ತ್ ಕಾರ್ ಮಿತ್ತ್ ಪಾಡೊಂದು ತಾರಿರ್ದ್ ಜತ್ತ್ ಬರ್ಪೆ. ದೀಯಿ ಪ್ರಶ್ನೆಡ್ ದೈವ ಜುಮಾದಿ ಓಡಿಜಾರುನ ಬೆರಿಪತೊಂದು ಬೈದಿನ ತೋಜಿದ್ ಬರ್ಪುಂಡು. ನಾಲದಡಿ ಉಂಬುಚೌಟನ ತಾರಿದ ಮುದೆಲ್ಡ್ ಎಲ್ಯ ಸಾನ ಕಟ್ಟಾದ್ ಓಡಿಜಾರು ದೈವ ಜುಮಾದಿನ್ ನಂಬೊಂದು ಬರ್ಪೆ.
ಅಲ್ಪ ಉಂತಿನ ಜುಮಾದಿಗ್ ಒರುಂಬ ಮಾಗನೆಡ್ ಮಾಮಲ್ಲ ಮನೆತನ ಪುತ್ತೂರ ಬಾವ ತೋಜುಂಡು. ಅಡೆಗ್ ದೃಷ್ಟಿ ದೀದ್ ಪುತ್ತೂರು ಬಾವೊಗು ಪೊಗ್ಗೊಡು ಪನ್ದ್ ಎನ್ನುವೆ. ಮೈನ್ ಶೆಟ್ಟಿಪಾಲ್‌ಗ್ ಜಾಮನ್ದ ಪೊರ್ತುಡು ಕನೊಟು ಬತ್ತ್ ಪುತ್ತೂರು ಬಾವದ ಬಾಂದೆರ್ಲೆನಡೆ ಪೋದು ದೈವ ಜುಮಾದಿನ್ ನಂಬೊಡುಗೆ ಪನ್ದ್ ಪನೊಡು ಪನ್ದ್ ಪನ್ಪೆ. ಮನದಾನಿ ಕಾಂಡೆ ಮೈನ್ ಶೆಟ್ಟಿಪಾಲ್ ಕನೊಟು ಜುಮಾದಿ ಬತ್ತ್ ಪಂಡಿನ ವಿಷಯೊನು ಬಾಂದೆರ್ಲೆಗ್ ತೆರಿಪಾವೆ. ಬಾಂದೆರ್ಲ್ ದಂಟ್‌ದ್ ಪನ್ಪೆರ್ ಈ ನಂಬಿನ ಬಿರುವ ಬೂತೊಗು ಯಾನ್ ಮನೆಮಂಚಾವು ಕಟ್ಟಾದ್ ನಂಬಯೆ ಪನ್ದ್ ದುಡ್ಕ್‌ದ್ ಪಾತೆರ್ವೆರ್. ಮೈನ್ ಶೆಟ್ಟಿಪಾಲ್ ಕಡೆಕಣ್ಣ್‌ಡ್ ಕೊಡಿದುಕ್ಕ ಬುಡ್ಪೆರ್, ಅಪಮಾನ ಆಂಡತ್ತಾ ಜುಮಾದೇ ಪನ್ದ್ ಪನ್ಪೆರ್. ಪಂಡಿ ನಾಲಯಿ ದೊಂಡೆಡಾವೊಡ್ಡ ಪುತ್ತೂರು ಬಾವದ ಕಿದೆಟ್ ಕಟ್ಟಿ ಗಿರ್ದೆರ್ಲು ಮರ್ಲ್ ಪತ್ತ್‌ದ್ ಬಲ್ಪುವ, ತೊಟ್ಟಿಲ್ದ ಬಾಲೆ ನುರೆ ಕಾರುಂಡು, ಅಡ್ಪಿಲ್ದಿತ್ತಿ ಪೊಂಜೊವುಲು ಮರಕಟ್ಟುವೆರ್. ಉಂದೆನ್ ತೂದು ಪೋಡಿನ ಬಾಂದೆರ್ಲು ಕರ್ನಿರೆ ಜಾರಂದಾಯಡ ಕೇನುವೆರ್, ಜಾರಂದಾಯೆ ಓಡಿಜಾರುನ ಬೆರಿಪತ್ತೊಂದು ಬತ್ತಿನ ಜುಮಾದಿ ಪುತ್ತೂರು ಬಾವೊಗು ದೃಷ್ಟಿ ದೀತೆ ಆಯನ್ ನಂಬೊಡು ಪನ್ದ್ ನುಡಿ ಕೊರ್ಪೆ. ಉಂದೆಕ್ ಒತ್ತೊನೊನಿ ಬಾಂದೆರ್ಲು ಮೈನ್ ಶೆಟ್ಟಿಪಾಲ್‌ನಡೆ ಪೋದು ದೈವೊನು ಪತೊಂದು ಬರ್ರೆ ಪನ್ಪೆರ್. ಅಯ್ಯೋ ಜುಮಾದಿ ಒರ ಪೋದು ಅವಮಾನ ಆಂಡ್ ನನೊರ ಎಂಚ ಪೋಪಿನಿ ಪನ್ದ್ ಪನ್ನಗ ಓಡಿಜಾರುಗು ದಡಿ ಕೊರ್ದು ಜುಮಾದಿ ಮೈಟ್ ಬರ್ಪೆ, ಓ ಶೆಟ್ಟಿಪಾಲೆ ಕೋಡೆದ ದಿನೊಟು ಮರ್ಯಾದಿಗ್ ಕೊರತೆ ಆದಿಪ್ಪು ಆಂಡ ಯಾನ್ ಪುತ್ತೂರು ಬಾವೊಗು ಪೋದು ಕುಟುಮದ ದೈವ ಆದ್ ಅಲ್ಪೊರ್ದು ಪಿರ ತಿರ್ಗ ರಾಜನ್ ದೈವ ಆದ್ ಅತಿಕಾರಿಬೆಟ್ಟುಡು ನಿಲೆ ಆನಮುಟ್ಟ ಕಾಪುಲೆ. ಈರ್ನಲ ಓಡಿಜಾರುನಲ ಪುರಪು ಸೂರ್ಯ ಚಂದ್ರೆ ಉಪ್ಪುನೇಟ ಅಳಿಯರೆ ಬುಡಯೆ, ಇರೆನ ಒರುನು ಎನ್ನ ಮನೆ ಮಂಚಾವುಡು ದೀಪಾವೆ. ನಿಕಲ್ನ ಪುದರ್ ಪನಂದೆ ದೈವ ಜುಮಾದಿ ಮಾನಿನ ಮಿತ್ತ್ ಬರ್ಪುಜೆಗೆ ಪನ್ದ್ ಪನ್ಪಾವೆ ಪನ್ಪಿ ಬಾಸೆ ಕೊರ್ಪೆ. ಪುತ್ತೂರ ಬಾವ ಪೊಗ್ಗಿನ ಜುಮಾದಿ ಉಲ್ಲಾಯನ ಬಲತ ಮರ್ಗಿಲ್ದ ಸಾನಿದ್ಯ ಬೋಡು ಪನ್ದ್ ಕೇನುವೆ. ತುಳುನಾಡ ಬೂತಾಲಯದ ಕಟ್ಟ್ ಪ್ರಕಾರ ಉಲ್ಲಾಯನ ಬಲತ ಮರ್ಗಿಲ್ಡ್ ಸಾನಿದ್ಯ ಕೊರ್ರೆ ಆಪುಜಿ ಪನ್ನಗ ಹಟ ಕಟ್ಟ್‌ದ್ ಉಂತುವೆ. ಕಡೆಕ್ ಉಲ್ಲಾಯನ ಬಲತ ಮರ್ಗಿಲ್ಡ್ ದೈವ ಜುಮಾದಿ ನಿಲೆಯಾಪೆ. ಪುತ್ತೂರು ಬಾವದ ಕುಟುಮೊನು ಒಂಜಿ ಮಲ್ಪುವೆ. ಅಲ್ಪೊರ್ದು ರಾಜನ್ ದೈವ ಆದ್ ಪಿರ ಬರ್ಪೆ, ಬನ್ನಗ ಸಂಪುಲ್ಲ ಕಾಡ್ ತಿಂಗೋಲೆಗ್ ಬರ್ಪೆ ಅಲ್ಪ ಅಧಿಕಾರದ ದೈವ ಪತ್ತ್ ಮಂದೆ ಪಂಜುರ್ಲಿಡ ಪನ್ಪೆ ಯಾನ್ ಈ ಅತಿಕಾರಿಬೆಟ್ಟುದ ಮಣ್ಣ್‌ಡ್ ನಿಲೆಯಾಪೆ ಪನ್ದ್. ಅತಿಕಾರಿಬೆಟ್ಟುನು ಆಳ್ವಿಕೆ ಮಲ್ತೊಂದಿತ್ತಿನ ಅತಿಕಾಯಿ ಜೈನೆ ಜುಮಾದಿನ್ ನಂಬುಜಿ ಪನ್ಪೆ. ಜುಮಾದಿ ಪಂಜುರ್ಲಿಡ ಪನ್ಪೆ ನಿಕ್ಕ್ 12 ವರ್ಸ ಆಯುಸ್ಯೊನು ಕಡ್ಪುನ ಅಧಿಕಾರ ಉಂಡು, ಅತಿಕಾಯನ್ ದೆಪ್ಪುಲ ಅತಿಕಾರಿಬೆಟ್ಟುಡು ನಿಲೆಯಾಯರೆ ಜಾಗ ಕೊರ್ಪಾಲ ಪನ್ದ್. ಪಂಜುರ್ಲಿ ಕೇನುವೆ ಇಂಚ ಮಲ್ತ್ಂಡ ಎಂಕ್ ದಾದ ಉಂಡು ಪನ್ದ್? ಅವೆಕ್ ಜುಮಾದಿ ಎಂಕ್ ಸಂದಿನ ಐನ್ ಜಾಗೊಲೆಡ್ ನಿಕ್ಕ್ ಕಟ್ಲೆ ಕರ್ಪಾವೆ. ಎಂಕ್ ಅಧಿಕಾರವಾಯಿನ ದೈವ ಈ ಪನ್ದ್ ಬಾಸೆ ಕೊರ್ಪೆ ಪನ್ದ್ ಪನ್ಪೆ. ಪಂಜುರ್ಲಿ ಅತಿಕಾಯನ್ ಹತ ಮಲ್ಪುವೆ. ದೈವ ಜುಮಾದಿ ಅತಿಕಾರಿಬೆಟ್ಟುಡು ಪಾಲೆರ್ದ್ ಪಡ್ಡಾಯಿ ತೋಡುರ್ದು ಮುಡಾಯಿ ನಡುಜಾಗೆಡ್ ನಡುಬೊಟ್ಟು ಪನ್ಪಾವೊಂದು ನಿಲೆಯಾಪೆ.
ಜುಮಾದಿ ನಡುಬೊಟ್ಟುಡು ನಿಲೆಯಾಯಿನೇ ಮೈನ್ ಶೆಟ್ಟಿಪಾಲ್ ದಿನಾಲ ಸಾನೊಗು ಬರ್ಪೆರ್. ಒಂತೆ ವರ್ಸ ಕರಿನೇ ಪಿರಯ ಆದ್ ದೈವಡ ಪನ್ಪೆರ್ ನನ ಎಂಕ್ ಬರ್ರೆ ಆಪುಜತ್ತ ಜುಮಾದಿ ದಾದ ಮಲ್ಪುನು ಪನ್ದ್. ಇರೆಗ್ ಬರ್ರೆ ಆಯಿಜಿಡ ಮಲ್ಲೆಜ್ಜಿ ಇರೆನ ಮನೆತನೊಗು ಯಾನ್ ಬರ್ಪೆ ಪನ್ದ್ ಪುತ್ತೂರು ಬರ್ಕೆಗ್ ಪೋಪೆ. ಒಕ್ಕೆತ್ತಿರಿ ವಂಸೊಡು ಕಾಂತೇರಿ ಜುಮಾದಿ ಪ್ರದಾನ ಆಂಡಲ ಮೈನ್ ಶೆಟ್ಟಿಪಾಲ ವಂಶೊಡು ಯಾನೇ ಪ್ರದಾನ ಪನ್ದ್ ಪನೊನ್ವೆ. ಶೆಟ್ಟಿಪಾಲ್ ಗ್ ಕೊರ್ತಿ ಪಾತೆರದಲೆಕ್ಕ ಅಕಲೆನ ಪ್ರತಿರೂಪೊನು ಮನೆಮಂಚಾವುಡು ದೀದೊನುವೆ. ಒರುಂಬ ಮಾಗನೆಡ್ ಅಪ್ಪೆ ಉಲ್ಲಾಲ್ದಿಗ್ ಜಲಕದ ಬಲಿಯಾಂಡ ನಡಿಬೊಟ್ಟು ಸಾನೊಡು ಎಂಕ್ ಒಂಜಿ ಸುತ್ತು ಪಿರಿಯದ ಬಲಿ ಪನೊನ್ಪೆ. ನಡಿಬೊಟ್ಟು ಜಾಗೆಡ್ ಯಾನೇ ದೈವ ಯಾನೇ ದೇವೆರ್ ಪನ್ದ್ ಪನೊನ್ವೆ, ತೂಯಿನಲ್ಪ ತೋಜಿವೆ, ಲೆತ್ತಿನಲ್ಪ ಬರ್ಪೆ, ತೂ ಆದ್ ಅರ್ಲುವೆ ಪನ್ದ್ ಬಾಸೆ ಕೊರ್ದು ದೈವ ಜುಮಾದಿ ಕಾರ್ನಿಕ ಮೆರೆಪೆ.
ಮದಿಪುದ ನಿಲೆ : ದೆಪ್ಪುನಿಗುತ್ತು ಕಿಶೋರ್ ಶೆಟ್ಟಿ