Last updated on February 1st, 2023 at 09:48 am
ಡ್ರೈವರ್‌ನ ಅಂಕೆ ತತ್ತ್‌ದ್ ಸಂಕೊಗು ಎಡ್ತಿನ ರಿಕ್ಷಾ ಕಬ್ಬೆ ಬೂರ್ದ್ ಒಂಜಿ ವರ್ಸ ಪ್ರಾಯೊದ ಬಾಲೆ ಸೈದಿನ ನಡಕೆ ಕೋಡೆ ಮಾಲಾಡಿಡ್ ನಡತ್‌ದ್ಂಡ್. ಕಾರ್ಲ ನಿಟ್ಟೆದ ಸಂತೋಷ್ ಬೊಕ್ಕ ಗೀತಾ ದಂಪತಿಲೆನ ಒಂಜಿ ವರ್ಸೊದ ಬಾಲೆ ತೀರ್ದ್ಂಡ್.
ಗೀತಾ ಆರೆನ ಬಾಲೆನ್ ಪತೊಂದು ಇಲ್ಲದಕುಲೆನೊಟ್ಟು ಬಿನ್ನೆರೆ ಇಲ್ಲಗ್ ರಿಕ್ಷಾಡ್ ಪೋವೊಂದಿತ್ತೆರ್. ಆಂಡ ಒವ್ವ ಇಸಗಲಿಗೆಡ್ ಡ್ರೈವರ್‌ನ ಅಂಕೆ ತತ್ತ್‌ದ್ ಸಂಕೊಗು ಎಡ್ತಿನ ರಿಕ್ಷಾ ಕಬ್ಬೆ ಬೂರ್ದ್ಂಡ್. ಬೂರಿಪೆಟ್ಟ್‌ಗ್ ಅಪ್ಪೆನ ಕೈಟಿತ್ತಿನ ಬಾಲೆ ಪಿದಯಿ ರಟ್ಟ್‌ದ್ಂಡ್. ಈ ನಡಕೆಡ್ ಗೀತಾ ಬೊಕ್ಕ ರತ್ನ ಪನ್ಪಿನಾರೆಗ್ ಎಲ್ಯೆಲ್ಯ ಗಡಿಕುಲಾದಿತ್ತ.
ಅಪಗನೇ ಮುಟ್ಟದಕಲೆನ ಸಕಾಯೊಡು ಮೊಕಲೆನ್ ಆಸ್ಪತ್ರೆಗ್ ಲೆತೊಂದುಪೋತೆರ್. ಆಂಡ ಗಾತಿದ ಪೆಟ್ಟಾದಿತ್ತಿನ ಬಾಲೆ ಮಾತ್ರ ತಾದಿ ಎತ್ತುನ ದುಂಬೇ ತೀರ್ದ್ಂಡ್. ಪುಂಜಾಲಕಟ್ಟೆ ಪೋಲೀಸ್ ಸ್ಟೇಷನ್‌‌ಡ್ ಪ್ರಕರಣ ದಾಕ್ಲಾತ್ಂಡ್.