Last updated on February 4th, 2023 at 05:23 pm
ಒಂಟೆಗ್ ಕಾರ್ ಎಡ್ತಿನೆರ್ದಾವರ ಕುಡ್ಲದ ಮೂಜಿ ಜನ ಸೇರ್ದ್ ನಾಲ್ ಜನ ಸೈದಿನ ನಡಕೆ ಸೌದಿ ಅರೇಬಿಯಾದ ಅಲ್-ಹಸಾಡ್ ನಡತ್‌ದ್ಂಡ್.
ಸೈದಿನಕಲೆನ್ ಲಚ್ಚಿಲ್‌ದ ಕದಿಕೆ ನಿವಾಸಿ ರಿಜ್ವಾನ್ (23) ಸುರತ್ಕಲ್ ಕೃಷ್ಣಾಪುರೊತ ಶಿಹಾಬ್, ಕುಡ್ಲ ಬೆಂಗರೆ ನಿವಾಸಿ ಅಕೀಲ್ ಬೊಕ್ಕ ಬಾಂಗ್ಲಾದೇಶೊದ ಪ್ರಜೆ ನಾಸೀರ್ ಪಂದ್ ಗುರ್ತ ಪತ್ತ್‌ದೆರ್.
ಸೌದಿ ಅರೇಬಿಯಾದ ರಿಯಾದ್ ಪ್ರಾಂತ್ಯೊದ ಅಲ್-ಹಸಾ ಪ್ರದೇಶೊದ ಖುರೈಸ್ ಪೆರ್ಸಾದಿಡ್ ಈ ನಡಕೆ ನಡತ್‌ದ್ಂಡ್. ಲಚ್ಚಿಲ್ ಕದಿಕೆ ಕೇಂದ್ರ ಜುಮಾ ಪಲ್ಲಿ ಬರಿತ ನಿವಾಸಿ ರಿಜ್ವಾನ್ 4 ತಿಂಗೊಲ್‌ಗ್ ದುಂಬು ಬೇಲೆಗ್ ಸೌದಿ ಅರೇಬಿಯಾಗ್ ಪೋದಿತ್ತೆರ್. ಮೇರ್ ಬದ್ರುದ್ದೀನ್ ಬೊಕ್ಕ ಅಲೀಮಾ ದಂಪತಿಗ್ ಒರಿಯೇ ಮಗೆ. ರಾತ್ರೆದ ಪೊರ್ತು ಬೇಲೆರ್ದ್ ಪಿರಬನ್ನಗ ಒರಾನೆ ಒಂಟೆ ಒಂಜಿ ತಾದಿಗ್ ಅಡ್ಡ ಬತ್ತಿ ಪರಿಣಾಮ ಗಾಡಿ ಅಂಕೆ ತತ್ತ್‌ದ್ ಇಂಚ ಆತ್ಂಡ್ಂದ್ ತೆರಿದ್‌ಬೈದ್ಂಡ್. ಪುನೊಕ್ಲೆನ್ ಅಲ್ಪದ ಅಲ್-ಹಸಾ ಪ್ರದೇಶೊದ ಆಸ್ಪತ್ರೆಗ್ ಕಡಪುಡ್ದ್ ಕೊರ್ತೆರ್. ಪುನೊಕ್ಲೆನ್ ಊರ್‌ಗ್ ತರ್ಪಾವುನ ಬಗ್ಗೆ ಕುಡ್ಲದ ಸಂಘಟನೆಲೆ ಪ್ರಮುಖೆರ್ ಪುನೆಯೊಂದುಲ್ಲೆರ್.