Last updated on February 6th, 2023 at 07:57 pm
ಬೆದ್ರ ತಾಲೂಕುದ ದರೆಗುಡ್ಡೆದ ಇಟಲ ಸೋಮನಾಥ ದೇಲಂತಡೆಟ್ ಆನೆಕಲ್ಲ್ ಪನ್ಪಿ ಪುದರ್‌ದ ಪಾದೆಟ್ ತುಳು ಲಿಪಿತ ಬರವುದ ಶಾಸನ ತಿಕ್ಕುದ್ಂಡ್. ಉಂದೆನ್ ಪ್ರೊ. ಎ.ಕೃಷ್ಣಯ್ಯ ಮೇರ್ ನಾಡ್ ಪತ್ತಿಯೆರ್.
ಸದ್ಯೊಗು ಉಂದೆತ ಸುತ್ತ ಮಣ್ಣ್ ದಿಂಜಿದ್ ಕಾಲಿ 5-6 ಸಾಲ್ ತುಳು ಲಿಪಿತ ಬರವುಲು ಅಸ್ಪಷ್ಟವಾದ್ ತೋಜೊಂದುಂಡು. ಈ ಶಾಸನದ ಪತ್ತ ಅಧ್ಯಯೊನು ಬೇಗೊಡು ಮುಗಿಪುವ ಪನ್ದ್ ಕೃಷ್ಣಯ್ಯೆರ್ ತೆರಿಪಾಯೆರ್. ಈ ಶಾಸನೊನು ತೂಯಿನ ತುಳು ಲಿಪಿ ತಜ್ಞೆರಾಯಿನ ಪ್ರೊ.ರಾಧಾಕೃಷ್ಣ ಬೆಳ್ಳೂರು ಮೇರ್ ಉಂದು 12-13ನೇ ಶತಮಾನೊಗು ಸೇರಿನ ಶಾಸನ ಪಂಡೆರ್.
ಉಂದು ತುಳುಟು ತಿಕ್ಕಿನ ರಡ್ಡನೇ ಪಾದೆ ಶಾಸನ, ಸುರುತ ಶಾಸನ ಮೂಡುಕೊಣಾಜೆ ಇಟಲ ಸೋಮನಾಥ ದೇವಲ್ಯಡ್ ತಿಕ್ಕುದಿತ್ತ್ಂಡ್. ರಡ್ಡ್ ಶಾಸನೊಲುಲಾ ಸೋಮನಾಥೇಶ್ವರ ದೇವಲ್ಯೊಡು ತಿಕ್ಕಿನವು ವಿಶೇಷ. ಬೆದ್ರದ ಅರಸೊತ್ತಿಗೆದ ಕಾಲೊಡು ಸೋಮನಾಥ ದೇವೆರ್ ರಾಜ್ಯ ದೇವೆರಾದಿತ್ತೆರ್, ಇತ್ತೆ ತುಳು ಅಧಿಕೃತ ಮಲ್ಪುನ ಕಜ್ಜ ನಡಪುನಗ ಬೆದ್ರದ ಮೋಹನ್ ಆಳ್ವೆರ್ ಅವೆಕ್ ಗುರ್ಕಾಲಾದುಪ್ಪುನಗ ಬೆದ್ರಡ್ ಅವ್‌ಲಾ ಸೋಮನಾಥ ದೇವಲ್ಯೊಡು ತುಳುಲಿಪಿ ಶಾಸನ ತಿಕ್ಕಿನವು ದೇವೆರ್ಲಾ ತುಳುಕು ಮಾನಾದಿಗೆ ಕೊರೊಡು ಪನ್ದ್ ಪನ್ಪಿಲೆಕ್ಕ ಉಂಡು.