Last updated on February 13th, 2023 at 11:28 am
ಕುಡ್ಲ: ಪೇಂಟೆದ ಪೊಂಜೊವುಲೆ ಪೋಲೀಸ್ ಸ್ಟೇಷನ್ಡ್ ಕೇಸ್ ಕೊರ್ರ ಪೋಂಡಲಾ ಪೋಲೀಸೆರ್ ಕಾಸ್ ಕೇನುವೆರ್ ಪಂದ್ ಎಡಿಜಿಪಿನ ಎದುರುಡೇ ಕುಡ್ಲ ಕಮಿಷನರ್ ಶಶಿಕುಮಾರ್‌ರೆನ್ ತರಾಟೆಗ್ ಗೆತೊಂದಿನ ನಡಕೆ ಫೆಬ್ರವರಿ 10 ಕ್ ನಡತ್‌ದ್ಂಡ್.
ಎಡಿಜಿಪಿ ಅಲೋಕ್‌ಕುಮಾರ್ ಮುತಾಲಿಕೆಡ್ ಕುಡ್ಲದ ಪೋಲೀಸ್ ಅಧಿಕಾರಿಲೆನ ಭ್ರಷ್ಟಾಚಾರೊದ ಆರೋಪದ ಒಯಿಲ್ ಗೆತೊನ್ರ ನಡತಿನ ಸಭೆಟ್ ಸಾಮಾಜಿಕ ಕಾರ್ಯಕರ್ತೆ ಪ್ರಸನ್ನ ರವಿ ಕಮಿಷನರ್ ಶಶಿಕುಮಾರ್‌ರೆನ ಎದುರೇ ಇಲಾಖೆದ ಮಿತ್ತ್ ಆರೋಪ ಮಲ್ದೆರ್.
ಪಾಂಡೇಶ್ವರ ಪೊಂಜೊವುಲೆ ಪೊಲೀಸ್ ಸ್ಟೇಷನ್ಡ್ ಕೇಸ್ ಕೊರ್ರ ಪೋಂಡ ಕಾಸ್ ಕೇನುವೆರ್. ಈ ಬಗ್ಗೆ ಆ ಸಂತ್ರಸ್ತೆ ಜವನ್ದಿ ಎನಡ ಬೆಸರ್ ಪಟ್ಟೊಂದೆರ್. ಉ್ಂದೆಕ್ ಮಾತ ಎನಡ ದಾಕ್ಲೆಲು ಉಲ್ಲ ಪಂದ್ ಪ್ರಸನ್ನ ರವಿ ತನ್ನ ಆಕ್ರೋಶ ತೋಜಾದೆರ್. ಕೆ.ಎಂ.ಎಫ್ ಡ್ ಬೇಲೆದ ಅಸೆ ಪುಟ್ಟಾವುನ ಕೇಸ್ ಇತ್ತ್ಂಡಲಾ ಸಿಸಿಬಿ ಸಮ ಜಡ್ತೆ ಮಲ್ತೊಂದಿಜ್ಜಿ. ಪ್ರಕರಣೊಲೆನ ಸಂತ್ರಸ್ತೆರೆನ ಪೋಡಿಕಟ್ಟಾವುನ ಬೇಲೆಲು ನಡತೊಂದುಲ್ಲ ಪಂದ್ ಆರ್ ಪಂಡೆರ್.
ಮೆರೆನ ಮಾತ್ರ ಅತ್ತಂದೆ, ಕುಡ್ಲ ಪೊಲೀಸೆರೆನ ಮಿತ್ತ್ ಬೇತೆ ಜನೊಕ್ಲೆನ ಕಡೆರ್ದ್‌ಲಾ ಕುಡ್ಲ ಪೊಲೀಸೆರೆನ ಮಿತ್ತ್ ಒಯಿಲ್ ಬೈದ್ಂಡ್.
ಈ ಇನಯೊದ ಅಕೇರಿಡ್ ಮಾಧ್ಯಮೊಲೆಗ್ ಪ್ರತಿಕ್ರಿಯೆ ಕೊರ್ನ ಎಡಿಜಿಪಿ ಅಲೋಕ್‌ ಕುಮಾರ್ ಕುಡ್ಲ ಪೇಂಟೆಡ್ ನಡತೊಂದುಪ್ಪುನ ಸೂಲೆಗಾರಿಕೆ, ಪೊಯ್ಯೆದ ಕಲ್ವಬೇರ, ಜುಗಾರಿ, ಇಲಾಖೆದ ಭ್ರಷ್ಟಾಚಾರದ ಬಗ್ಗೆ ಮಾತ ಒಯಿಲ್ ಬೈದ್ಂಡ್. ಆಂಡ ಏರ್ಲಾ ಸಮ ದಾಕ್ಲೆಲೆನ್ ಕೊರ್ತುಜೆರ್. ಒಂಜಿ ರಡ್ಡ್ ಜನೊತ ಪುದರ್ ದೆತ್ತ್‌ದ್ ಆರೋಪ ಮಲ್ದೆರ್. ಅಂಚಿನ ಪ್ರಕರಣೊಲೆಗ್ ಜಡ್ತೆಕೂಟ ಉಂಡುಮಲ್ತ್‌ದ್ ಕ್ರಮ ಗೆತೊನುವ ಪಂಡೆರ್.