Last updated on March 4th, 2023 at 07:34 pm
ಕಡಬ: ಕಡಬ ತಾಲೂಕ್‌ದ ಪರನೇರೆಂಕಿ ಬೊಕ್ಕ ಆಲಂತಾಯ ಗ್ರಾಮೊಲೆನ ಸೀಮೆಡ್ ಬರ್ಪುನ ಶಿವಾರ್ ಮಲೆಟ್ ಕರಿನ ನಾಲೈನ್ ದಿನೊರ್ದಿಂಚಿ ರುದ್ರನರ್ತನ ಮಲ್ತೊಂದಿತ್ತಿನ ಸೂ ಕೋಡೆ ಬಯ್ಯಡಾನಗ ಒಂತೆ ಕಮ್ಮಿ ಆತ್ಂಡ್. ನಾಲ್ ದಿನೊಟು ನೂದು ಎಕ್ರೆರ್ದ್‌ಲಾ ಎಚ್ಚಿನ ಕಾಡ್ ಪೊತ್ತ್‌ದ್ ಪೋತುಂಡು.
ಕರಿನ ಸೋಮಾರ ಪರನೇರೆಂಕಿ ಗ್ರಾಮೊದ ಕುಂಞಿಕ್ಕು ಪನ್ಪಿನಲ್ಪ ಎಲೆಕ್ಟ್ರಿಕ್ ಟ್ರಾನ್ಸ್‌ಫಾರ್ಮರ್‌ರ್ದ್ ಉಂಡಾಯಿನ ಸೂ ತೂಯಿಲೆಕಾನೆ ಇಡಿಯ ಶಿವಾರ್ ಮಲೆಟ್ ಪರಡ್‌ದ್ಂಡ್. ಮೂಜಿ ದಿನೊಟು ಅಂಕೆಗ್ ತಿಕ್ಕಂದೆ ಇಡೀ ಕಾಡ್ ಪೊತ್ತಾಯಿನ ಸೂ ಸುಕ್ರಾರೊಗಾನಗ ಗ್ರಾಮಸ್ಥೆರ್, ಅಗ್ನಿ ಶಾಮಕ ದಳ ಬೊಕ್ಕ ಅರಣ್ಯ ಇಲಾಖೆದಕಲೆನ ಪುನೆಪುಡು ಎಂಚಾಂಡಲಾ ಅಂಕೆಗ್ ಬತ್ತ್‌ದ್ಂಡ್.
ಈ ಸೂತ ಗೊಬ್ಬು ಎಂಚ ಇತ್ತ್ಂಡ್ ಪಂಡ, ಮಿತ್ತ್ ರಾತಿನ ಸೂತ ಕಿಟಿರ್ದಾವರ 30 ಫೀಟ್ ಎತ್ತರೊದ ತಾರಿದ ಕುಬಲ್‌ಲಾ ಪೊತ್ತೊಂದಿತ್ತ್ಂಡ್.
ಇತ್ತೆ ಸೂ ಅಂಕೆಡ್ ಇತ್ತ್ಂಡಲಾ ನನ ಕುಡ ಏಪ ಪೊತ್ತುಂಡು ಪನರೆ ಆವಂದಿನ ಸ್ಥಿತಿ ಮುಲ್ಪ ಉಂಡು. ಕಾಡ್‌ದುಲಯಿ ಸಮಟೆ ಅಗ್ನಿ ಶಾಮಕೊದ ಗಾಡಿಲೆಗ್ ಪೋವರೆ ಆವಂದೆ ಪೊರ್ತುಡು ಸೂ ತೆಕ್ಕಾಯೆರೆ ಆವೊಂದಿಜ್ಜಿ. ಅವೇತೋ ಪರಪುನ, ರಾಪುನ, ನಡಪುನ ಕಾಡಮುರ್ಗೊಲು ಈ ಸೂಟ್ ಪೊತ್ತ್‌ದ್ ಪೋತ ತೆರಿಯಂದ್.
ಮಾರ್ಚ್ ತಿಂಗೊಲು ಮುಟ್ಟಿನೇ ದೊಂಬುದ ಪೆಟ್ಟ್, ತಾಪಮಾನೊಲಾ ಏರೊಂದುಂಡು. ಉ್ಂದೆರ್ದಾವರ ಎಲ್ಯ ಕಿಟಿ ಬೂರ್ನ್ಡಲಾ ಅವು ಮಲ್ಲ ಸೂ ಆವೊಂದುಂಡು. ರಡ್ಡ್ ದಿನೊಕು ದುಂಬು ತುಳುನಾಡ ಸ್ವಿಟ್ಜರ್ಲ್ಯಾಂಡ್ ಪಂದೇ ಪುದರ್ ಪೋತಿನ ಕೊೖಲ ಫಾರ್ಮ್‌ಡ್ ಸೂ ಬೂರ್ದ್ ಪದಿನೈನ್ ಎಕ್ರೆದಾತ್ ಜಾಗೆಡಿತ್ತಿನ ಪಂತಿ ಪೊತ್ತ್‌ದ್ ಪೋತುಂಡು.
ಗುರುವಾರ ಬಯ್ಯಡ್ ಬಲ್ಯದ ಬೀರುಕ್ಕು ಪನ್ಪಿನಲ್ಪು ಶಾರ್ಟ್ ಸರ್ಕ್ಯೂಟ್‌ರ್ದಾವರ ರಂಜನ್ ಪನ್ಪಿನಾರೆಗ್ ಸೇರ್ನ ಜಾಗೆಗ್ ಸೂ ಬೂರ್ದ್ ಎಕ್ರೆಗಟ್ಲೆ ರಬ್ಬರ್ ಬೊಕ್ಕ ಬಾರೆ ಪೊತ್ತ್‌ದ್ ಪೋತುಂಡು.
ಕಡಬ ಕ್ನಾಯಾಜ್ಯೋತಿ ಆಂಗ್ಲ ಮಾಧ್ಯಮ ಶಾಲೆದ ಎದುರುದ ಮರಕ್ ಕರೆಂಟ್ ವೈರ್ ತಾಗ್‌ದ್ ಕಿಟಿ ಲಕ್ಕಿನೆರ್ದಾವರ ಸೂ ಪೊತ್ತುದುಂಡು.
ಇಂಚಿ ಕುಂತೂರು ಪದವು ಮೇರುಗುಡ್ಡೆ ಪನ್ಪಿನಲ್ಪ ಮಧ್ಯಾಹ್ನದ ಪೊರ್ತುಡು ಶಾರ್ಟ್ ಸರ್ಕ್ಯೂಟ್‌ರ್ದಾವರ ಸೂ ಲಕ್ಕ್‌ದ್ ಗೋಪಾಲಕೃಷ್ಣ ಭಟ್‌ ಪನ್ಪಿನಾರೆನ ರಬ್ಬರ್ ತೋಟೊಗು ಸೂ ಬೂರ್ದ್ ರಬ್ಬರ್ ದೈಕುಲು ಪೊತ್ತುದು ಪೋತ.
ನೆಲ್ಯಾಡಿ ಮುಟ್ಟೊದ ಇಚ್ಲಂಪಾಡಿದ ಮಾನಡ್ಕಡ್ ಪೊಂಜೊವು ಒರ್ತಿನ ರಬ್ಬರ್ ತೋಟೊಗು ಸೂ ಬೂರ್ದ್ ನಷ್ಟ ಆತ್ಂಡ್.
ತುಳುನಾಡೊರ್ಮೆ ಸೂತ ಗೊಬ್ಬು ಈತೆಕ್ ಉಂತಂದೆ, ಇನಿಲಾ, ಕೆಮ್ಮಿಂಜೆ, ಬನ್ನೂರ್, ಕಬಕಡ್ ಮಾತ ಸೂ ಬೂರ್ದ್ ಗುಡ್ಡೆಗ್ ಗುಡ್ಡೆಲು, ಕಾಡ್‌ಗ್ ಕಾಡ್‌ಲ್ ಪೊತ್ತ್‌ದ್ ಪೋವೊಂದುಲ್ಲ.