Last updated on March 10th, 2023 at 10:10 am
ತುಳು ಭಾಷೆಗ್ ಲಿಪಿ ಇಜ್ಜಿ ಪನ್ಪಿನವು ನಮ ಪುಟ್ಟಿನೆರ್ದಿಂಚಿ ಕೇನೊಂದು ಬೈದಿನವು. ಇಂಚ ಉಪ್ಪುನಗ ಇತ್ತೆ ಒರಾನೆ ತುಳು ಲಿಪಿ ಒಲ್ತು ಬತ್ತ್ಂಡ್? ಅಲ್ಪಲ್ಪ ತುಳು ಲಿಪಿತ ಬೋರ್ಡು ಪನ್ದ್ ಮಲಯಾಳಿ ಲಿಪಿನ್ ಪಾಡ್ದ್ ಜನಕ್ಲೆನ್ ಮಂಗೆ ಮಲ್ತೊಂದುಲ್ಲೆರಾ? ಈತ್ ಸಮಯ ತುಳು ಭಾಷೆನ್ ಎಡ್ಡೆಡ್ ಕನ್ನಡೊಡು ಬರೆಯೊಂದಿತ್ತ ಇತ್ತೆ ಒರಾನೇ ಒವ್ವಾ ಒಂಜಿ ಗುರ್ತ ದಾಂತಿನ ಲಿಪಿನ್ ಕನತ್ ಬರೆಲೆ ಪನ್ಡ ಎಂಚ, ಉಂದೆತ ಅಗತ್ಯ ದಾದ ಉಂಡು? ನಮ ಕನ್ನಡಿಗೆರಾದುಪ್ಪುನೆರ್ದಾವರ ನಮಕ್ ಕನ್ನಡ ಲಿಪಿಯೇ ಯಾವು, ಕನ್ನಡ ಬದ್‌ಕ್‌ಗ್ ತುಳು ಇಲ್ಲದ ಉಲಯಿಗ್. ಕನ್ನಡ ತುಳು ನಮ್ಮ ರಡ್ಡ್ ಕನ್ನ್ ಇತ್ತಿಲೆಕ್ಕೊ.
ಉಂದು ತುಳುವಾಣಿದಕಲೆಗ್ ದಾದಲಾ ಸುತ್ತು ಸಡಿಲ ಆದ್ ಬರೆಯಿನ ಪಾತೆರ ಅತ್ತ್. ಈ ಪಾತೆರ ನಮ್ಮ ಸುತ್ತ ಮುತ್ತದ ತುಳುವೆರ್ ಪನ್ಪಿನವು. ಮಾತೆರ್ನ ಇಲ್ಲಡ್ ದೋಸೆಡ್ ಒಟ್ಟೆ ಆಂಡ, ತುಳುವೆರ್ನ ಇಲ್ಲಡ್ ದೋಸೆದ ಕಾವೊಲಿಡೇ ಒಟ್ಟೆ.
ಒಂಜೊಂಜೆಕ್ಕೆ ಸದು ಕೊರೊಂದು ಬರ್ಪ, ಕುಡೊರ ಇಂಚಿನ ಕೇಳ್ವೆ ಕೇಂಡೆರ್ಡ ಅಕಲೆನ್ ಕಂಕನಾಡಿಗ್ ಕೊನೊಡು.
ಸುರುಕಾದ್ ತುಳು ಭಾಷೆಗ್ ಲಿಪಿ ಇಜ್ಜಿ. ಈ ಪಾತೆರ ನಮ ಶಾಲೆಡ್ ಬುಡ್ಲೆ ಎಡ್ಡೆ ಎಡ್ಡೆ ತೆರಿದಿನಕುಲುಲಾ ಪನೊಂದು ಬೈದಿನವು ತೂತ. ಅಪಗಾಂಡ ಲಿಪಿ ಇತ್ತಿನ ಭಾಷೆ ಒವ್? ಭಾಷೆಲು ಪುಟ್ಟುನಗನೇ ಲಿಪಿ ಆಂಡ? ಲಿಪಿ ಪನ್ಪಿನವು ನಮ ಪಾತೆರುನೆನ್ ದಾಖಲೆ ಆದ್ ಬರೆದ್ ದೀವರೆ ಅಜತಿನವು ಲಿಪಿ ಒವ್ವೇ ಭಾಷೆಗ್ ಸೀಮಿತ ಅತ್ತ್. ತುಳುಕು ಲಿಪಿ ಇಜ್ಜಿ ಪನ್ಪಿನಕುಲು ಬೇತೆ ಭಾಷೆಲೆಗ್ಲಾ ಲಿಪಿ ಇಜ್ಜಿ ಪನ್ಪಿನೆನ್ ಒತ್ತೊನೊಡು. ತುಳುಕು ಗಲಸುನ ಲಿಪಿ ಇನಿ ಕೋಡೆದವು ಅತ್ತ್ 1300 ವರ್ಸದ ದುಂಬು ಇತ್ತೆ ನಮ ತುಳು ಲಿಪಿ ಪನ್ದ್ ದಾದ ಗಲಸುವನಾ ಅವೆನ್ ಗಲಸಿದಿನ ಉದಾರ್ಮೆ ಉಂಡು. 1300 ವರ್ಸ, ಇನಿ ಕೋಡೆ ಅತ್ತ್ ಇಂಚ ಉಪ್ಪುನಗ ಅವ್ ಲಿಪಿ ತುಳುತವೇ ಆಪುಜಾ? ಇತ್ತೆ ನಮ ಕನ್ನಡ ಲಿಪಿ ಪನ್ದ್ ದಾದ ಪನ್ಪನೊ ಅವ್ ಕಾಲ ಕಾಲೊಗು ಬುಲೆಯೊಂದು ಬತ್ತಿನವು, ಒಂಜೇ ಲೆಕ್ಕ ಇತ್ತಿಜಿ. ಸುರುತ ಕನ್ನಡ ಶಾಸನ ಬರೆದ್ 1600 ವರ್ಸ ಆಂಡ್. ಅವೆನ್ ಕನ್ನಡ ಲಿಪಿ ಪನೊಲಿ ಪನಿಬೊಕ್ಕ ನಮ 1300 ವರ್ಸೊರ್ದಿಂಚಿ ಗಲಸುನೆನ್ ತುಳು ಲಿಪಿ ಪನ್ದ್ ದಾಯೆಗ್ ಪನರೆ ಬಲ್ಲಿ?
ತುಳು ಲಿಪಿ ಬೊಕ್ಕ ಮಲಯಾಲಿ ಲಿಪಿ ಒಂಜೇ ಮೂಲೊರ್ದು ಬೈದಿನವು. ಮಲಯಾಲಿಲು ಈ ಲಿಪಿ ಗಲಸೊರ್ದು ದುಂಬು ಬೇತೆ ಲಿಪಿನ್ ಗಲಸೊಂದಿತ್ತೆರ್. ಮಲಯಾಳಿಲೆರ್ದ್ 300-400 ವರ್ಸ ದುಂಬೇ ತುಳುವೆರ್ ಈ ಲಿಪಿನ್ ಗಲಸ್‌ದ್ ಶಾಸನೊಲೆನ್ ಪಾಡ್ದೆರ್ ಇಂಚ ಉಪ್ಪುನಗ ತುಳು ಲಿಪಿನ್ ಮಲಯಾಲಿ ಪನಡೆ! ಮಲಯಾಲಿ ಲಿಪಿನ್ ತುಳು ಲಿಪಿ ಪನ್ಲೆ!
ಈತ್ ಸಮಯ ಕನ್ನಡೊಡು ಬರೆಯೊಂದಿತ್ತ ನನ ಪೊಸ ಲಿಪಿತ ಅಗತ್ಯ ದಾದ ಉಂಡು ಪನ್ಪಿನಕಲೆಗ್ – ಸುರುಕಾದ್ ಉಂದು ಪೊಸ ಲಿಪಿ ಅತ್ತ್. ಕನ್ನಡೊಡು ಬರೆಪುನೆಕ್ಕ್ ಒವ್ವೇ ರೀತಿದ ಅಡ್ಡಿ ಇಜ್ಜಿ ಅಂಚ ಪನ್ದ್ ತುಳು ಲಿಪಿ ಕಲ್ಪಂದೆ ಕುಲ್ಲುನವು ನಿಕ್ಲೆನ ಉದಾಸೀನನೊ ಅತ್ತಂದೆ ತಾತ್ಸಾರನೋ ತೂಪಾವುಂಡು ಅತ್ತಂದೆ ಬೇತೆ ದಾಲ ಅತ್ತ್. ಎಡ್ಡೆಡ್ ಮನ ಕೊರ್ದು ಕಲ್ತ್ಂಡ ಇತ್ತೆ ಕನ್ನಡೊಡು ಎಂಚ ಬರೆಪರೊ ಅಂಚೆನೇ ತುಳು ಲಿಪಿಟ್ ಒಂಜಿ ವಾರೊಡೇ ಕಲ್ತ್ ಬರೆಯೊಲಿ. ತುಳುಟು ಕನ್ನಡೊಡು ಉಪ್ಪುನೆರ್ದ್ ದಿಂಜ ಸ್ವರ ಅಕ್ಷರೊಲು ಉಲ್ಲ. ಉದಾರ್ಮೆರ್, ಯಾನ್ ಪನ್ಪೆ, ಆಯೆ ಪನ್ಪೆ. ಮೂಲು ಕನ್ನಡೊಡು ಬರೆನಗ ರಡ್ಡ್ ಪನ್ಪೆಲಾ ಒಂಜೇ ಲೆಕ್ಕ ಉಂಡು ಆಂಡ ಅವ್ ರಡ್ಡ್‌ಲಾ ಬೇತೆ ಬೇತೆ. ಉಂದೆಕ್ ತುಳು ಲಿಪಿಟ್ ಬೇತೆ ಬೇತೆ ಅಚ್ಚರೊಲು ಉಲ್ಲ ಅಂಚಾದ್ ಒವ್ವೇ ಗೊಂದಲ ಉಪ್ಪುಜಿ.
ನಮ್ಮ ದೈವೊಲು ಪನ್ಪ ಪರತ್ ನಿಗಿಪಡೆ ಪೊಸತ್ ತೋಡಡೆ ಪನ್ದ್. 1860ನೇ ಇಸವಿರ್ದ್ ದುಂಬು ಒವ್ವೇ ಒವ್ ದಾಖಲೆಡ್ಲಾ ತುಳುಕು ಕನ್ನಡ ಲಿಪಿ ಗಲಸಿನ ಉದಾರ್ಮೆ ಇಜ್ಜಿ. ಕನ್ನಡ ಪ್ರೆಸ್ ಅಚ್ಚಿ ಬತ್ತಿಬೊಕ್ಕ ತುಳುಕು ಕನ್ನಡೊನು ಗಲಸರೆ ಸುರು ಮಲ್ತಿನಿ. ಅವೆರ್ದ್ ದುಂಬು 700-800 ವರ್ಸ ದುಂಬು ತುಳುಟು ರಾಮಾಯಣೊ, ಮಹಾಭಾರತೊ, ಭಾಗವತೊ ದಂಚಿನ ಮಲ್ಲ ಮಲ್ಲ ಕಾವ್ಯೊಲು ರಚಿತಿನಿ ತುಳು ಲಿಪಿಟ್. ಇಂಚ ಉಪ್ಪುನಗ ಪರತ್ ನಿಗಿತಿನಿ ಪೊಸತ್ ತೋಡಿನಿ ಅತ್ತಾ? ಪಿರಾಕ್‌ದ ತುಳು ಲಿಪಿನ್ ನಿಗಿತ್ ಪೊಸ ಕನ್ನಡ ಲಿಪಿನ್ ತುಳುವೆರ್ ತೋಡಿನಿ ತುಳು ಧರ್ಮೊಗು ವಿರುದ್ದ ಅತ್ತಾ?
ಈತ್ ಪೂರಾ ಬಗುಲುನ ತುಳುವಾಣಿದಕುಲು ದಾಯೆಗ್ ಕನ್ನಡ ಲಿಪಿ ಗಲಸುವರ್ ಪನ್ದ್ ಕೇನರ್ ನಿಕುಲು. ತುಳುವಾಣಿದಕಲೆಗ್ ತುಳು ಲಿಪಿ ಬರ್ಪುಂಡು ತುಳು ಲಿಪಿಟ್ ಬರೆದ್ ಪಾಡರೆಲಾ ತೆರಿದುಂಡು. ಆಂಡ ಉಂದು ಬರವು ಬರೆಯಿನಿ ತುಳು ಲಿಪಿ ದಾಯೆಗ್ ಪನ್ದ್ ಕೇನುನಕಲೆಗ್ ಅಂಚಾದ್ ತುಳುವೆರ್ ಮಾತೆರ್ಲಾ ಕಲ್ಪುನೇಟ ಎಂಕುಲು ಉಂದೆನೇ ಗಲಸೊಡಾಪುಂಡು.
ಕಡೆಕಾದ್ ತುಳುವೆರೆ ದೈವಾಲಯೊದ ಕಟ್ಟ್‌ಡ್ ನಿಕುಲು ವಾ ಮಲ್ಲಿಗೆ ಕಾಕಡ ಜಾಜಿ ದೈವೊಲೆಗ್ ಪಾಡಿಯರ್ಡಲ, ಅಲ್ಪ ಮರ್ಯಾದೆ ಉಪ್ಪುನು ಕಾಟ್ ಪೂ ಕೇಪುಲೊಗು. ತುಳು ಲಿಪಿ ತುಳು ಭಾಷೆಗ್ ಕೇಪುಲ ಪೂ ಬಾಕಿದ ಪೂರ ಕಾಲಿ ಅಬ್ಬರೊಗು ಮಾತ್ರ. ನನ ರಡ್ಡ್ ಕಣ್ಣ್‌ಲೆನ ಬಗೆಟ್ ಎಂಕುಲು ದಾಲ ಪಾತೆರುಜ, ರಡ್ಡ್ ಕಣ್ಣ್ ಪನ್ಪಿನಕಲೆನ ಒಂಜಿ ಕಣ್ಣ್ ಡ್ ಪರೆ ಬತ್ತ್ ದಿಟ್ಟಿ ಮಾಜಿದ್ಂಡ್ ಅಂಚಾದ್ ಒಂಜಿ ಕಣ್ಣ್‌ಗ್ ಮಾತ್ರ ಬಾರೀ ಬಿಲೆ, ಮಾನಾದಿಗೆ ಪಿರೊಂಜಿ ಇತ್ತ್ಂಡ ದಾನೆ ಪೋಂಡ ದಾನೆ. ಸೊಲ್ಮೆಲು!