Last updated on March 25th, 2023 at 09:21 am
ಕುಡ್ಲ: ಕುಡ್ಲದ ಮಹಾನಗರಪಾಲಿಕೆದ ಪಿದಯಿಗುತ್ತಿಗೆ ಪೌರ ಕಾರ್ಮಿಕೆರ್ ಮಲ್ತೊಂದುಪ್ಪುನ ಪೊರ್ಮ್ಬಾಟ ನನಲಾ ನಡತೊಂದಿತ್ತ್‌ದ್, ಪೇಂಟೆಡ್ ಕಜವು ವಿಲೇವಾರಿದ ಸಮಸ್ಯೆ ಉಂಡಾವೊಂದುಂಡು ಪಂದ್ ಪಾಲಿಕೆ ವಿರುದ್ದ ವ್ಯಕ್ತಿಯೊರಿ ಕೋಡೆ ಒಂಜಾಲ್ ಪೊರ್ಮ್ಬಾಟ ಮಲ್ದೆರ್.
ಕರ್ನಾಟಕ ರಾಜ್ಯ ಪಾಲಿಕೆ, ನಗರಸಭೆ, ಪುರಸಭೆ, ಪೇಂಟೆ ಪಂಚಾಯಿತಿ ಪಿದಯಿಗುತ್ತಿಗೆ ನೌಕರೆರೆ ಸಂಘೊದಕುಲು ನೇರ ನೇಮಕಾತಿ/ ನೇರ ಪಾವತಿಗ್ ಆಗ್ರಹಿತ್‌ದ್ ಲೆತ್ತಿನ ಮುಷ್ಕರ ಶುಕ್ರವಾರೊಗ್ 12ನೇ ದಿನೊಕು ಕಾರ್ ದೀತ್ಂಡ್. ಮುಷ್ಕರೊರ್ದಾವರ ಕಜವು ವಿಲೇವಾರಿ ಸಮಸ್ಯೆರ್ದ್ ಎಚ್ಚ ಉಲಚರಂಡಿ ವ್ಯವಸ್ಥೆಡ್ ಸಮಸ್ಯಲು ಉಂಡಾತ. ಈ ದಿಟ್ಟಿಡ್ ಮಹಾ ನಗರ ಪಾಲಿಕೆ ಆಡಳಿತ ವರ್ಗ ಒವ್ವೇ ತಾದಿದಾಂತೆ ಕಂಗಾಲಾದ್ ಪೋತುಂಡು.
ನೆತ್ತ ನಡುಟು ಕುಡ್ಲದ ಕಜವು ನಿರ್ವಹಣೆದ ಒಟ್ಟುಗು ಉಲಚರಂಡಿ ವ್ಯವಸ್ಥೆದ ಬಗ್ಗೆ ಸಾರ್ವಜನಿಕ ಬಲೆತ್ತಾನೊಡು ಪಿಸ್‌ರ್ ತೋಜಾವೊಂದುಲ್ಲೆರ್. ಪೇಂಟೆದ ತ್ಯಾಜ್ಯ ವಿಲೇವಾರಿ ಸಮಸ್ಯೆಗ್ ಪರಿಹಾರ ನಾಡುನ ಬುಡ್ದ್ ಫುಡ್‌ ಫೆಸ್ಟಿವಲ್‌ ಮಲ್ತೊಂದುಪ್ಪುನ ಬಗ್ಗೆ ಆಕ್ರೋಶ ತೋಜಾದ್ ಪೆರಿಯ ನಾಗರಿಕೆ ಒರಿ ಮಹಾ ನಗರ ಪಾಲಿಕೆದ ಎದುರು ತನ್ನ ಇಲ್ಲಲ್ದ್ ಕನತಿನ ನುಂಗೆಲ್ ತ್ಯಾಜ್ಯೊನು ದೀದ್ ಪೊರ್ಮ್ಬಾಟ ಮಲ್ತಿನ ನಡಕೆ ಗುರುವಾರ ನಡತ್‌ದ್ಂಡ್. ನಿವೃತ್ತ ಪತ್ರಕರ್ತೆ ಶ್ರೀನಿವಾಸ್ ನಂದಗೋಪಾಲ್ ಪೊರ್ಮ್ಬಾಟ ಮಲ್ತಿನಾರ್.
ಈ ನಡುಟು ಕಜವು ವಿಲೇವಾರಿಡ್ ಆವೊಂದುಪ್ಪುನ ಸಮಸ್ಯೆಲೆನ ಬಗ್ಗೆ ಶಾಸಕೆ ವೇದವ್ಯಾಸ್ ಕಾಮತೆರ್ ಪಾತೆರ್ದ್, ಎಂಕ್ಲು ಪೊರ್ಮ್ಬಾಟ ಮಲ್ತೊಂದುಪ್ಪುನಕಲೆಡ ಪಾತೆರ್ರ ಪುನೆವೊಂದುಲ್ಲ ಆಂಡ ಅಕುಲು ಕೇನೊಂದಿಜ್ಜೆರ್ ಪಂಡೆರ್.