Last updated on March 29th, 2023 at 06:12 pm
ಕಾಂತಾರ ಪಿಚ್ಚರ್ ಬತ್ತಿಬೊಕ್ಕ ದೈವಾರಾಧನೆದ ಪೊಲಬು ತುಳುನಾಡ್ ಮಾತ್ರ ಅತ್ತಂದೆ ಘಟ್ಟದ ಮಿತ್‌ತ್ಲಾ ಪಸೆರ್ಂಡ್. ಆಂಡ ಉಂದೆರ್ದ್ ಎಡ್ಡೆ ಆಪಿನೆರ್ದ್ ದಿಂಜ ಪಡ್ಕೆ ಆತ್ಂಡ್ ಪನ್ದ್ ತುಳುವೆರ್ ಗರಂ ಆತೆರ್.
ಅಲ್ಪಲ್ಪ ಸ್ಟೇಜಿಲೆಡ್ ದೈವೊಲೆನ ಏಸ ಪಾಡೊಂದು ಕಾಂತಾರ ಪಿಚ್ಚರ್ದಲೆಕ್ಕ ನುಡಿ ಕೊರ್ಪಿನಿ ಮಾತ್ರ ಅತ್ತಂದೆ ಇತ್ತೆ ಬೆಂಗಳೂರುದ ಮಲ್ಲೇಶ್ವರಂದ ಗಂಗಮ್ಮ ದೇವಲ್ಯೊಡು ದೇವಿಗ್ ಪಂಜುರ್ಲಿನ ಏಸ ಪಾಡ್ದ್ ಕೈಕ್ ಜೀಟಿಗೆ ಕೊರ್ತಿನ ತೆರಿದ್ ಬೈದ್ಂಡ್. ಉಂದೆನ್ ತೂದು ಪಿಸಿರಾತಿನ ತುಳುವೆರ್ ರಿಷಭ್ ಶೆಟ್ಟಿ ಬೊಕ್ಕ ಹೊಂಬಾಳೆ ಫಿಲ್ಮ್‌ದಕಲೆಗ್ ತರಮರ ನೆರೊಂದುಲ್ಲೆರ್. ಈ ಇಡೆಟ್ ರಿಷಭ್ ಶೆಟ್ಟಿ ಕಾಂತಾರ -2 ಕ್ಕ್ ಚಿತ್ರಕತೆ ಬರೆಯೊಂದುಲ್ಲೆ ಪನ್ದ್ ತೆರಿಪಾದೆರ್, ಉಂದೆನ್ ತೂಯಿನ ತುಳುವೆರ್ ಒಂಜೆಟ್ಟೇ ಮಂಡೆ ದೆರ್ಪರೆ ಆವಂದಿನಾತ್ ಲಾಯಿ ಲಗಡಿ ಆತ್ಂಡ್ ನನೊಂಜಿ ಬತ್ತ್ಂಡ ಅವೆನ್ ಬ್ಯಾನ್ ಮಲ್ಪೊಡು ಪನ್ದ್ ಟ್ವೀಟ್ ಮಲ್ತ್ ಸಾಪ್ಯೊಂದುಲ್ಲೆರ್.