Last updated on March 29th, 2023 at 07:28 pm
ಪುತ್ತೂರು: ಪುತ್ತೂರು ತಾಲೂಕ್‌ದ ನಿಡ್ಪಳ್ಳಿ ಗ್ರಾಮೊದ ತಂಬುತಡ್ಕ ಪನ್ಪಿನಲ್ಪ ಜುಗಾರಿದ ಅಡ್ಡೆಗ್ ಮಾ.28ದಾನಿ ರಾತ್ರೆ ದಾಳಿ ಮಲ್ತಿನ ಸಂಪ್ಯ ಪೊಲೀಸೆರ್ 6 ಜನೊನು ಅರೆಸ್ಟ್ ಮಲ್ದೆರ್. ಆರೋಪಿಲೆರ್ದ್ ಪಣವು ಬೊಕ್ಕ ಮೊಬೈಲ್‌‌ಲೆನ್ ವಶೊಕು ಗೆತೊಂದೆರ್.
ಬಂಟ್ವಾಳ ಅನಂತಾಡಿ ಗ್ರಾಮೊದ ನಾರಾಯಣ ಗೌಡ ಪನ್ಪಿನಾರೆನ ಮಗೆ ಲೋಕೇಶ್ ಗೌಡೆ(40ವ), ಆರ್ಲಪದವು ಭರಣ್ಯ ನಿವಾಸಿ ಬಾಬು ಪನ್ಪಿನಾರೆನ ಮಗೆ ಹೇಮನಾಥ ಬಿ(33ವ), ಕೌಡಿಚ್ಚಾರು ಗ್ರಾಮೊದ ಮೋನಪ್ಪ ಪನ್ಪಿನಾರೆನ ಮಗೆ ಸಂತೋಷ್(40ವ), ದರ್ಬೆತ್ತಡ್ಕ ಕುರಿಂಜ ನಾರಾಯಣ ಪನ್ಪಿನಾರೆನ ಮಗೆ ಸದಾನಂದೆ(49ವ), ನಿಡ್ಪಳ್ಳಿ ಗೋಲಿತ್ತಡಿ ನಿವಾಸಿ ಕುಗ್ಗು ಪನ್ಪಿನಾರೆನ ಮಗೆ ಉಮೇಶ್(33ವ), ಸಾಲೆತ್ತೂರು, ಸುಂದರ ಶೆಟ್ಟಿ ಪನ್ಪಿನಾರೆನ ಮಗೆ ಸತೀಶ್(45ವ) ಅರೆಸ್ಟ್ ಆತಿನ ಆರೋಪಿಲು.
ಆರೋಪಿಲು ನಿಡ್ಪಳ್ಳಿ ಗ್ರಾಮೊದ ತಂಬುತ್ತಡ್ಕಡ್ ಅಕ್ರಮವಾದ್ ಪಣವು ದೀದ್ ಜುಗಾರಿ ಗೊಬ್ಬೊಂದಿತ್ತೆರ್. ಒರವು ತಿಕ್ಕಿನ ಸಂಪ್ಯ ಪೊಲೀಸೆರ್ ಆರೋಪಿಲೆನ್ ಅರೆಸ್ಟ್ ಮಲ್ತ್‌ದ್, ಅಕಲೆರ್ದ್ ಜುಗಾರಿಗ್ ಬೋಡಿತ್ತಿನ ಸೊತ್ತುಲೆನ್ ವಶೊಕು ಗೆತೊಂದು ರೂ. 35,710 ಬೊಕ್ಕ 6 ಮೊಬೈಲ್ ಪೋನ್‌ಲೆನ್ ವಶೊಕು ಗೆತೊಂದೆರ್. ಈ ನಡಕೆದ ಬಗ್ಗೆ ಸಂಪ್ಯ ಪೊಲೀಸೆರ್ ಆರೋಪಿಲೆನ ವಿರುದ್ಧ ಪ್ರಕರಣ ದಾಕಲ್ ಮಲ್ತೊಂದೆರ್.