‘ತುಳುನಾಡು ಶಾಟನಾಡು, ತುಳು ಭಾಷೆ ಲಿಪಿ ದಾಂತಿನ ಸೂಳೆ ಭಾಷೆ’ ಟ್ವಿಟರ್‌ಡ್ ನಮ್ಮ ಅಪ್ಪೆ ನಾಡ್ ಬೊಕ್ಕ ಬಾಸೆಗ್ ಅವಮಾನ

Last updated on March 30th, 2023 at 11:59 am

ತುಳು ಬಾಸೆದ ಮಿತ್ತ್ ತುಳುವೆರೆನ ಮಿತ್ತ್ ಬೋಡು ಬೋಡುಂದೇ ನಂಜಿಡೋ, ದ್ವೇಷೊಡೋ ಪಾತೆರುನಕಲೆನ ಸಂಖ್ಯೆ ಸಾಮಾಜಿಕ ಜಾಲತಾಣೊಡು ದಿನೊರ್ದು ದಿನ ದಿಂಜೊಂದುಂಡು. ಮೊಕುಲು ಮಾತೆರ್ ಒಂಜೇ ಭಾಗೊದ ಜನಕುಲು ಪನ್ಪಿನವು ಮಾತಾ ತುಳುವೆರ್ ಗೆರೆಪೊಡಾಯಿನ ವಿಷಯ. ನಮ್ಮ ತುಳುವೆದಿ ಕೆಜಿಎಫ್ ಪುಗಾರ್ತೆದ ಶ್ರೀನಿಧಿ ಶೆಟ್ಟಿ ‘ಹಾಗೇ ಸುಮ್ಮನೆ’ ಪನ್ದ್ ಅರೆನ ಪಟೊನು ಟ್ವಿಟರ್ ಡ್ ಪಾಡ್ದಿತ್ತೆರ್ ಅವೆಕ್ ರಕ್ಷಿತ್ ಶೆಟ್ರ್ ತುಳುಟು “ಆವ್ ಶೆಟ್ರೆ ಗೊತ್ತಾಂಡ್” ಪನ್ದ್ ತುಳುಟು ರಿಪ್ಲೈ ಕೊರ್ದಿತ್ತೆರ್. ಉಂದೆನ್ ತೂದು ಕಿಚ್ಚಿಡ್ ನಂಜಿ ಕಾರಿನ ಕನ್ನಡಿಗೆ ಒರಿ ‘ಉಂದೆನ್ ಪೂರಾ ಮಂಗಳೂರುಡು ನಿಕ್ಲೆನ ಶಾಟನಾಡುಡು ದೀವೊನ್ಲೆ, ಸೂಳೆ ಜೋಕುಲೆ ನಿಕ್ಲೆನ ಲಿಪಿ ದಾಂತಿನ ಸೂಳೆ ಭಾಷೆ, ಒಂಜಿ ಕನ್ನಡ ಮೂವಿನ್ ಸಪೋರ್ಟು ಮಲ್ಪುನಕುಲಿಜ್ಜೆರ್ ಕುಡ್ಲಡ್ ತುಳು ತುಳು ಪನೊಂದು’ ಪನ್ದ್ ತುಳುನಾಡ್ ಗ್ ಬೊಕ್ಕ ತುಳು ಭಾಷೆಗ್ ರೋಹನ್ ಯಶ್ ಪನ್ಪಿನ ಪುದರ್ ಡ್ ಫೇಕ್ ಎಕೌಂಟು ಮಲ್ತೊಂದು ಬಾಯಿ ಬತ್ತಿನ ಬರೆತೆ. ಉಂದು ಮಾತ್ರ ಅತ್ತ ಉಂದೇ ಎಕೌಂಟುಡು ಕೊಡವೆದಿ ರಶ್ಮಿಕಾ ಮಂದನ್ನಗ್ಲಾ ಮುಂಡೆ ಪನ್ದ್ ಕಮೆಂಟ್ ಮಲ್ದಿನ ತೋಜುಂಡು.