Last updated on April 3rd, 2023 at 07:42 pm
ಸಲಿಂಗಕಾಮ ಮಲ್ತೆ ಪಂಡ್‌ದ್ ಜಯಾನಂದ ಆಚಾರ್ಯ ಪನ್ಪಿನಾರೆನ್ ಕೆರ್ನ ರಾಜೇಶ್ ಪೂಜಾರಿ ಅಲಿಯಾಸ್ ರಾಜಾ ಪನ್ಪಿನ ಜನಕ್ ಸೌತ್ ಕೆನರಾ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ಜಾಮೀನ್ ಕೊರ್ದು ಆದೇಶ ಮಲ್ದ್ಂಡ್.
ಕುಡ್ಲದ ಪ್ರಧಾನ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಾಧೀಶೆರಾಯಿನ ರವೀಂದ್ರ ಎಂ. ಜೋಷಿ ಈ ಆದೇಶ ಕೊರ್ತೆರ್. ಆರೋಪಿನ ಪರವಾದ್ ಕುಡ್ಲದ ಲಾಯರ್ ಹರ್ಷಕುಮಾರ್ ವಾದ ಮಲ್ದೆತ್ತೆರ್.
ಪ್ರಕರಣದ ಒಲವು:
2022 ತ ಅಕ್ಟೋಬರ್ 7ತಾನಿ ಜಯಾನಂದ ಆಚಾರ್ಯೆ ಆರೋಪಿನ್ ಸಲಿಂಗ ಕಾಮೊಗು ಗಲಸ್‌ದಿತ್ತೆರ್. ಆಂಡ, ಕೊರ್ನ ಪಾತೆರೊದಂಚ ಲೈಂಗಿಕ ಕ್ರಿಯೆರ್ದ್ ಬೊಕ್ಕ ಆರೋಪಿಗ್ ಕಾಸ್ ಕೊರ್ದಿಜ್ಜಂಡ್. ಉ್ಂದೆರ್ದಾವರ ಪಿಸ್‌ರ್ ಗೆಜಲಿನ ಆರೋಪಿ ರಾಜೇಶ್ ಪೂಜಾರಿ ಅಲಿಯಾಸ್ ರಾಜಾ ಪ್ಲಾಸ್ಟಿಕ್‌ ಬಲ್ಲ್‌ಡ್ ಜಯಾನಂದನ ಕೆಕ್ಕಿಲ್ ಕಯ್ತ್‌ದ್ ಕೊಲೆ ಮಲ್ದೆ ಪಂದ್ ಆರೋಪ ಮಲ್ದಿತ್ತ್ಂಡ್.
ಜಯಾನಂದ ಆಚಾರ್ಯನ್ ಕೆರ್ದ್ ಪುನೊಕು ಕಂಬೈ ಪೊದೆಪಾದ್ ಆರೋಪಿ ಬಲ್ತ್‌ದಿನ ಜಡ್ತೆಡ್ ಅಂಚೆನೇ ಬೇತೆ ಪುರಾಪುಲೆಡ್ ಸಾಬೀತಾತ್ಂಡ್ ಪಂದ್ ಪೊಲೀಸೆರ್ ಆರೋಪ ಪಟ್ಟಿ ಸಂದಾದೆರ್.
ಆರೋಪಿನ ಮಿತ್ತಿಪ್ಪುನ ಆರೋಪ ಮಿತ್ತನೋಟೊಗು ಸಾಬೀತಾದ್ ಸಿಸಿಟಿವಿ ಫೂಟೇಜ್ ಬೊಕ್ಕ ಆರೋಪಿನ ಪಾತೆರೊಲಾ ಉ್ಂದೆಕ್ ಒಮ್ಮುದ್ ಬತ್ತ್‌ದ್ಂಡ್. ಮರಣದಂಡನೆ ಶಿಕ್ಷೆ ಕೊರ್ಪುನ ಪ್ರಕರಣ ಉ್ಂದು, ಆರೋಪಿಗ್ ಜಾಮೀನ್ ಕೊರ್ಯೆರ ಬಲ್ಲಿ ಪಂದ್ ಪ್ರಾಸಿಕ್ಯೂಷನ್ ಪರ ಸರ್ಕಾರಿ ವಕೀಲೆರ್ ವಾದ ಮಲ್ದಿತ್ತೆರ್. ಆರೋಪಿ ಅಪರಾಧಿಕ ಪಿರನಿಲೆ ಇತ್ತಿನಾಯೆ, ಜಾಮೀನ್‌ದ ಮಿತ್ತ್ ಬುಡುಗಡೆ ಮಲ್ತ್ಂಡ ಇಂಚಿನ ಅಪರಾಧೊಲು ನನಲಾ ಎಚ್ಚ ಆಪ ಪಂದ್ ವಾದ ಮಲ್ತೆರ್.
ಪ್ರಕರಣೊದ ಜಡ್ತೆ ಮುಗಿದ್, ಪೊಲೀಸೆರ್ ಆರೋಪಪಟ್ಟಿನ್ಲಾ ಸಂದಾದೆರ್. ಇಪ್ಪುನ ಸಾಕ್ಷಾಧಾರೊಲೆನ್ ಪೊಲೀಸೆರ್ ಇತ್ತೆನೇ ಒಟ್ಟು ಮಲ್ದೆರ್, ಆರೋಪಿ ಸ್ಥಳೀಯೆನೇ ಆಯಿನೆರ್ದಾವರ ನ್ಯಾಯವಿಚಾರಣೆಗ್ ಸಂಪೂರ್ಣ ಸಹಕಾರ ಕೊರ್ಪುಂಡು ಪಂದ್ ಆರೋಪಿ ಪರ ವಕೀಲೆರ್ ವಾದ ಮಲ್ತೆರ್.
ಉ್ಂದೆನ್ ಮಾತ ಕೇಂದ್ ಪ್ರಧಾನ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಾಧೀಶೆರಾಯಿನ ರವೀಂದ್ರ ಎಂ. ಜೋಷಿ ಮೆರೆನ ಮುತಾಲಿಕೆದ ನ್ಯಾಯಪೀಠ, ಆರೋಪಿಗ್ ಷರತ್ತುಬದ್ಧ ಜಾಮೀನ್ ಕೊರ್ತುಂಡು.