Last updated on April 4th, 2023 at 05:34 pm
ಕುಡ್ಲ: ರೈಲ್‌ದ ಪಟ್ಟಿಗ್ ಮರ ಬೂರ್ದಿತ್ತಿನೆನ್ ತೂಯಿನ ಪ್ರಾಯದಾರ್ ಒರ್ತಿ ರೈಲ್‌ಗಾಡಿನ್ ಉಂತಾದ್ ಆವರೆಗಿತ್ತಿನ ಮಲ್ಲ ರೈಲ್ ಎಡ್ತೆನ್ ತಪ್ಪಾದೆರ್.
ರೈಲ್‌ಗಾಡಿನ್ ಉಂತಾವರ ಚಂದ್ರಾವತಿ ಗಾಡಿದ ಎದುರು ಕೆಂಪು ಕುಂಟುನ್ ಪತ್ತ್‌ದ್ ಬೀಜಾದೆರ್. ನೆನ್ ಲೋಕೊಪೈಲಟ್ ತೂದು ರೈಲ್‌ಗಾಡಿ ಉಂತಾದೆರ್.
ಕುಡ್ಲದ ಪಿದಯಿಮೆಯಿತ ಪಚ್ಚನಾಡಿದ ಮುಟ್ಟಡ್ ಮಂದಾರ ಪನ್ಪಿನವುಲು ಈ ನಡಕೆ ನಡತ್‌ದ್ಂಡ್.
70 ವರ್ಸ ಪ್ರಾಯೊದ ಚಂದ್ರಾವತಿ ಮದ್ಯಾನ ವನಸ್ ಮಲ್ತ್‌ದ್ ಜೆಪ್ಪೆರಾನಗ ಮರ ಬೂರಿನ ಸಬ್ದ ಕೇಂಡ್‌ದ್ ಲಕ್ಕ್‌ದೆರ್. ಸಬ್ದ ಬತ್ತಿನಂಚಿ ಪೋದು ತೂನಗ ರೈಲ್‌ಪಟ್ಟಿದ ಮಿತ್ತ್ ಮರ ಬೂರ್ದಿನೆನ್ ತೂತೆರ್. ಒಂತೆ ಪೊರ್ತುಡೇ ಆ ತಾದಿಡ್ ಕುಡ್ಲ-ಮುಂಬೈ ಮತ್ಸ್ಯಗಂಧ ಎಕ್ಸ್‌ಪ್ರೆಸ್ ಪೋವರೆಗಿತ್ತ್ಂಡ್. ದಾಲ ಎಚ್ಚಿಕಮ್ಮಿ ಆಪಿನೆನ್ ಉಂತಾವೊಡು ಪಂಡ್‌ದ್ ದೊಡ್ಡ ಬಲ್ತೊಂದು ಪೋದು ಚೆನ್ನೆ ರಂಗ್‌ದ ಕುಂಟುನ್ ಬೀಜಾದೆರ್.
ನೆನ್ ತೂದು ಲೋಕೊಪೈಲಟ್ ರೈಲ್‌ಗಾಡಿನ್ ಉಂತಾದೆರ್. ಬೊಕ್ಕ ಜಾಗೆಗ್ ಬತ್ತಿನ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲು ಸುಮಾರ್ ಅರ್ಧ ಗಂಟೆ ತೈರ್ದ್ ಪಟ್ಟಿಗ್ ಬೂರ್ದಿತ್ತಿನ ಮರನ್ ದೆಪ್ಪಾದೆರ್. ದೊಡ್ಡನ ಪೊರ್ತುಗು ತಕ್ಕ ಮಂಡೆಕರ್ಚಿದ ಬೇಲೆರ್ದಾವರ ಮಸ್ತ್ ಜನೊತ ಜೂವ ಒರಿದ್ಂಡ್. ದೊಡ್ಡನ ಬೇಲೆನ್ ಮಾತೆರ್ಲ ಪುಗರೊಂದುಲ್ಲೆರ್.
ಕುಡ್ಲ ರೈಲ್ವೇ ಪೊಲೀಸ್ ಇನ್ಸ್ಪೆಕ್ಟರ್ ಮೋಹನ್ ಕೊಟ್ಟಾರಿ ಬೊಕ್ಕ ಕೂಟೊದಕುಲು ದೊಡ್ಡನ ಇಲ್ಲಗ್ ಬತ್ತ್‌ದ್, ಆವರೆಗಿತ್ತಿನ ಮಲ್ಲ ಎಡ್ತೆನ್ ತಪ್ಪಾಯಿನೆಕ್ ಸೊಲ್ಮೆ ಸಂದಾದೆರ್.