Last updated on April 5th, 2023 at 11:53 am
ಪುತ್ತೂರು: ಪುತ್ತೂರ್‌ಡ್ ಗೌಡ ಸಮುದಾಯೊದ ನಾಯಕೆ ಇತ್ತೆದ ಶಾಸಕೆ ಸಂಜೀವ ಮಠಂದೂರ್‌ರೆಗ್ ಈ ಸರ್ತಿಲಾ ಬಿಜೆಪಿರ್ದ್ ಟಿಕೆಟ್ ತಿಕ್ಕುಲೆಕ ಮನ್ಪೊಡು ಪಂದ್ ಒಕ್ಕಲಿಗ ಸಮುದಾಯೊದ ಕಡೆರ್ದ್ ಒಕ್ಕಲಿಗ ಗೌಡ ಸಂಘೊದ ಒಂಜಿ ನಿಯೋಗ ಶ್ರೀ ಆದಿ ಚುಂಚನಗಿರಿ ಮಠೊತ ಪೀಠಾಧ್ಯಕ್ಷೆ ಡಾ| ಶ್ರೀ ನಿರ್ಮಲಾನಂದನಾಥ ಸ್ವಾಮಿಲೆನ್ ಭೇಟಿ ಮಲ್ತ್‌ದ್ ಸುಧೀರ್ಘ ಚರ್ಚೆ ಮಲ್ತಿನ ವಿಚಾರ ಭಾರಿ ಚರ್ಚೆಗ್ ಕಾರಣ ಆತ್ಂಡ್.
ಒಕ್ಕಲಿಗ ಸಮುದಾಯ ಮಲ್ಲ ಸಂಖ್ಯೆಡ್ ಇಪ್ಪುನ ಪುತ್ತೂರ್‌ಡ್ ಒಕ್ಕಲಿಗ ಗೌಡ ಸಮುದಾಯೊದ ನಾಯಕಘರಾದಿಪ್ಪುನ ಸಂಜೀವ ಮಠಂದೂರ್‌ರೆಗ್ ಈ ಸರ್ತಿಲಾ ಅಭ್ಯರ್ಥಿ ತಾನೊ ತಿಕ್ಕೊಡು. ಮಾತಾ ಸಮುದಾಯೊಲೆನ ಒಟ್ಟುಗು ಎಡ್ಡೆ ಬಾಂಧವ್ಯ ಇಪ್ಪುನ ಆರ್ ಮಾತೆರೆಗ್ಲಾ ಆತ್ಮೀಯೆರ್. ಒಟ್ಟುಗು ಆರೆನ ಮುತಾಲಿಕೆಡ್ ಒಕ್ಕಲಿಗ ಗೌಡ ಸಮುದಾಯೊಡು ಮಸ್ತ್ ಅಭಿವೃದ್ಧಿಪರ ಕಜ್ಜೊಲು ನಡತ್‌ದ. ಅಂಚಾದ್ ಈ ಸರ್ತಿದ ವಿಧಾನಸಭಾ ಅಜಕೆಡ್ ಆರೆಗೇ ಬಿಜೆಪಿರ್ದ್ ಅವಕಾಶ ತಿಕ್ಕುಲೆಕ ಮನ್ಪೊಡು ಪಂದ್ ಆದಿ ಚುಂಚನಗಿರಿ ಕುಡ್ಲ ಶಾಖಾ ಮಠೊತ ಡಾ| ಶ್ರೀ ಧರ್ಮಪಾಲನಾಥ ಸ್ವಾಮಿಲೆನ ಮುತಾಲಿಕೆಡ್ ಒಕ್ಕಲಿಗ ಸ್ವಸಹಾಯ ಸಂಘೊದ ಸ್ಥಾಪಕಾಧ್ಯಕ್ಷೆ ಎ.ವಿ.ನಾರಾಯಣೆರ್, ಒಕ್ಕಲಿಗ ಸಮುದಾಯ ಪತ್ತೆದ ಸಹಕಾರಿ ಸಂಘೊದ ಅಧ್ಯಕ್ಷೆ ಚಿದಾನಂದ ಬೈಲಾಡಿ, ಯುವ ಗೌಡ ಸೇವಾ ಸಂಘೊದ ಅಧ್ಯಕ್ಷ ನಾಗೇಶ್ ಕೆಡೆಂಜಿ, ಸುಳ್ಯ ಅಕಾಡೆಮಿ ಆಫ್ ಲಿಬರಲ್ ಎಜ್ಯುಕೇಶನ್‌ದ ಪ್ರಧಾನ ಕಾರ್ಯಂತೆರ್ ಡಾ. ಅಕ್ಷಯ್, ಡಾ.ಜ್ಞಾನೇಶ್, ಡಾ. ಲೀಲಾಧರ್, ಒಕ್ಕಲಿಗ ಸಮುದಾಯ ಪತ್ತೆದ ಸಹಕಾರ ಸಂಘೊದ ಉಲಲೆಕ್ಕಪರಿಶೋಧಕೆ ಶ್ರೀಧರ್ ಗೌಡ ಕಣಜಾಲ್, ಎ.ವಿ.ಜಿ ಇಂಗ್ಲೀಷ್ ಮೀಡಿಯಂ ಸ್ಕೂಲ್‌ದ ಆಡಳಿತ ಮಂಡಳಿ ಅಧ್ಯಕ್ಷೆ ವೆಂಕಟ್ರಮಣ ಕಳುವಾಜೆ, ಮನೋಹರ್ ಕಬಕ, ಗಗನ್ ಬೈಲಾಡಿ, ಕೌಶಿಕ್ ಸೇರ್ದ್ ಪುತ್ತೂರ್ ಬೊಕ್ಕ ಸುಳ್ಯದ ಬೇತೆ ಬೇತೆ ಮುಖಂಡೆರ್ ಈ ಪೊರ್ತುಡು ಆದಿ ಚುಂಚನಗಿರಿ ಪೀಠಾಧಿಪತಿ ಡಾ| ಶ್ರೀ ಧರ್ಮಪಾಲನಾಥ ಸ್ವಾಮಿಲೆನೊಟ್ಟು ಸುದೀರ್ಘ ಚರ್ಚೆ ಮಲ್ದೆರ್.
ಪುತ್ತೂರ್ ವಿಧಾನಸಭಾ ಕ್ಷೇತ್ರೊಡು ಬಿಜೆಪಿ ಅಭ್ಯರ್ಥಿಮಾದ್ ಇತ್ತೆದ ಶಾಸಕೆ ಸಂಜೀವ ಮಠಂದೂರ್ ಸೇರ್ದ್ ಹಿಂದೂ ಸಂಘಟನೆಲೆಡ್ ಪುದರ್ ಮಲ್ದಿನ ಅರುಣ್ ಕುಮಾರ್ ಪುತ್ತಿಲ ಮೆರೆನ ಪುದರ್‌ಲಾ ಕೇಂದ್ ಬರೊಂದುಂಡು.