Last updated on April 6th, 2023 at 03:30 pm
ವ್ಯಕ್ತಿಯೊರಿ ಸುಮಾರ್ 7 ಲಕ್ಷ ರೂಪಾಯಿ ಮೌಲ್ಯೊದ ಪದ್ದೈಬಂಗಾರ್ ಕಂಡ್‌ದ್ ಗುಜಿರಿಗ್ ಮಾರ್ದಿನ ನಡಕೆ ಬೆಂಗ್ಳೂರ್‌ಡ್ ಬೊಲ್ಪುಗು ಬೈದ್ಂಡ್. ಪಡ್ಡಾಯಿ ಬಂಗಾಲ ಮೂಲೊದ ಸುಬ್ರತೊ ಮಂಡಲ್ ಪನ್ಪಿನಾಯೆ ಬಂಗಾರ್ ಗುಜಿರಿಗ್ ಮಾರ್ದಿನ ಆರೋಪಿ.
ಆಜಿ ತಿಂಗೊಲು ದುಂಬು ಬೆಂಗ್ಳೂರ್ ಬೈದಿನ ಸುಬ್ರತೊ ಮಂಡಲ್ ದಾಲ ಬೇಲೆ ಮನ್ಪಂದೆ ಸಾದಿಬರಿತ ನಲ್ಲಿಲೆನ್ ಕಂಡ್‌ದ್ ಗುಜಿರಿಗ್ ಮಾರ್ದ್, ಬತ್ತಿ ಕಾಸ್‌ಡ್ ಆರಾಮೊಡು ಬದ್‌ಕೊಂದು ಗಮ್ಮತ್ ಮಲ್ತೊಂದಿತ್ತೆ.
ಮಾರ್ಚ್ 11ಕ್ ಬೆಂಗ್ಳೂರ್‌ದ ಮತ್ತಿಕೆರೆತ HMT ಲೇಔಟ್‌ಡುಪ್ಪುನ ನಿಜೇಶ್ ಪನ್ಪಿನಾರೆನ ಇಲ್ಲಗ್ ಪೊಗ್ಗಿನ ಸುಬ್ರತೊ 7 ಲಕ್ಷ ರೂಪಾಯಿ ಮೌಲ್ಯೊದ 130 ಗ್ರಾಂ ಬಂಗಾರ್ ಕಂಡ್‌ದೆ. ಆಂಡ ಬಂಗಾರ್ ಒಲ್ಪ ಮಾರೊಡೂಂದು ತೆರಿಯಂದೆ ಕಡೆಕ್ 30,000 ರೂಪಾಯಿಗ್ ಗುಜಿರಿಗ್ ಮಾರ್ದೆ. ನಿಜೇಶ್ ಕೊರ್ತಿನ ಒಯಿಲ್‌ದ ಮಿತ್ತ್ ಜಡ್ತೆ ಮಲ್ತಿನ ಯಶವಂತಪುರ ಪೋಲೀಸೆರ್ ಆರೋಪಿನ್ ನಾಡ್ದ್ ಅರೆಸ್ಟ್ ಮಲ್ದೆರ್. ಗುಜಿರಿಗ್ ಪಾಡ್ದಿನ ಬಂಗಾರ್‌ನ್ ವಶ ಮಲ್ತೊಂದೆರ್.