Last updated on April 10th, 2023 at 07:09 am
ಬಪ್ಪನಾಡ್ ದೇವಲ್ಯದ ರಾತ್ರೆ ತೇರ್ ಎಪ್ರಿಲ್ 12ಕ್ಕ್ ನಡಪುಂಡು. ಉಂದೆಕ್ ಮುಲ್ಕೆ ಸೀಮೆ ಮಾತ್ರ ಅತ್ತಂದೆ ತುಳುನಾಡೊರ್ಮೆದ ಲಕ್ಷಾಂತರ ಜನಕುಲು ಬರ್ಪೆರ್. ಬಪ್ಪನಾಡ್ ದುರ್ಗಾಪರಮೇಶ್ವರಿ ದೇವಲ್ಯದ ಆಡಳಿತ ವರ್ಗದಕುಲು ದೇವಲ್ಯದ ಜಾಗೊಡು ಸಂತೆಲೆನ್ ಪಾಡರೆ ಈ ವರ್ಸ ಅನುವು ಕೊರೊಂದಿಜ್ಜೆರ್. ಆಡಳಿತ ಟ್ರಸ್ಟಿ ಆಯಿನ ಎನ್.ಎಸ್.ಮನೋಹರ ಶೆಟ್ಟಿ ಪಾತೆರ್ದ್ ಮುಸ್ಲಿಂದಕಲೆಗ್ ಸ್ಟಾಲ್ ಪಾಡರೆ ಬಲ್ಲಿ ಪನ್ಪಿನ ವಿಷಯೊಡು ದೇವಲ್ಯ ಒವ್ವೇ ನಿರ್ಣಯ ದೆತೊಂದಿಜಿ. ಎಂಕುಲು ದೇವಲ್ಯೊದ ಜಾಗೊಡು ಒವ್ವೇ ಸ್ಟಾಲ್ ಪಾಡರೆ ಬಲ್ಲಿ ಪನ್ಪಿನ ನಿರ್ಣಯೊಗು ಬೈದ. ಈ ಸ್ಟಾಲುಲೆರ್ದಾತ್ರ ದೇವಲ್ಯೊಗು ಬರ್ಪಿ ಭಕ್ತೆರೆಗ್ ಗಾಡಿ ಉಂತಾವರೆ ಬಂಗ ಆಪುಂಡು. ದೇವಲ್ಯದ ಕೈತಲ್ಡೇ ಸ್ಟಾಲ್ ಪಾಡುನೆರ್ದ್ ಅಲ್ಪ ಬರ್ಪಿನ ಭಕ್ತಾದಿಲೆಗ್ಲಾ ಕಣ್ಣ್ ಕೆಬಿ ಕಟ್ಟುಂಡು, ಅಂಚಾದ್ ಈ ಸಲ ಸ್ವಯಂಸೇವಕೆರೆನ ತಂಡ ಮಲ್ತ್ ದೇವಾಲಯದಲ್ಪದ ಖಾಸಾಗಿ ಜಾಗೆಲೆನ್ ಸ್ಟಾಲ್ ಪಾಡುನಕಲೆಗ್ ಬಾಡಿಗೆಗ್ ಕೊರ್ಪಿನ ನಿರ್ಣಯ ಮಲ್ದ ಪನ್ದ್ ಪಂಡೆರ್. ಅನಾದಿ ಕಾಲೊರ್ದಿಂಚಿ ನಡತೊಂದು ಬೈದಿನ ಮಾತಾ ಕಟ್ಟ್‌ಲೆನ್ ದೇವಲ್ಯೊಡು ನಡಪಾವ. ಸುಕ್ರಾರ ಮೆರವಣಿಗೆಡ್ ಬಪ್ಪಬ್ಯಾರಿಲೆನ ಇಲ್ಲದ ಎದುರುಡು ಅಕಲೆನ ಇಲ್ಲದಕಲೆಗ್ ದೇವಲ್ಯದ ಪುರ್ಸಾದ ಎತ್ತ್‌ದ್ಂಡ್. ಸಂಪ್ರದಾಯೊಲೆಗ್ ಕುಂದೆಲ್ ಬರಂದಿಲೆಕ್ಕ ಉಚ್ಚಯೊನು ಕಮಿಟಿದಕುಲು ಮಲ್ಪುವೆರ್ ಪನ್ದ್ ಪಂಡೆರ್.