Last updated on April 18th, 2023 at 05:45 pm
ತುಳುವೆರ್ನ ಬೇಡಿಕೆಲೆಗ್ ಒವ್ವೇ ಪಕ್ಷೊಲು ಇತೋರ್ತು ಸ್ಪಂದನೆ ಮಲ್ದ್‌ಜ. ತುಳು ಭಾಷೆ ಬೊಕ್ಕ ತುಳುನಾಡ್‌ದ ಬುಲೆಚ್ಚಿಲ್ ಕರ್ನಾಟಕೊಡು ಇದಮುಟ್ಟ ಆತಿಜಿ ಅತ್ತಂದೆ ಉಂದೆಕಾದ್ ಒವ್ಲೇ ಪಕ್ಷದಕುಲು ಉಮೇದ್ ಕೊರ್ದು ಬೇಲೆ ಮಲ್ದಿಜೆರ್. ತುಳು ಭಾಷೆರ್ದ್ ಪತ್ತ್‌ದ್ ತುಳುವೆರೆ ತುದೆ ನೇತ್ರಾವತಿ ಒರಿಪಾವುನ ಮುಟ್ಟದ ಮಾತಾ ಪೊರ್ಂಬುಲು ನೀರ್ ಗ್ ಹೋಮ ಮಲ್ತಿಲೆಕ್ಕ ಆತ್ಂಡ್. 25 ವರ್ಸದ ದುಂಬು ತುಳು ಸಾಹಿತ್ಯ ಅಕಾಡೆಮಿನ್ ಕೊರ್ದು ಅವ್ವೇ ಮಲ್ಲ ಸಾಧನೆ ಪನ್ಪಿಲೆಕ್ಕ ಪಾತೆರುನ ಪಕ್ಷೊಲು ಕೋಟಿ ಕೋಟಿ ಬೊಡ್ಚಾಂದಿನೆಕ್ಕ್ ಕರ್ಚಿ ಮಲ್ತ್ಂಡಲಾ ತುಳು ಕಲ್ಪಾವುನ ಟೀಚರ್‌ನಕಲೆಗ್ ಒಂಜಿ ಮೂಜಿ ಸಾರ ಗೌರವದ ಪನವು ಕೊರಿಯರೆಲಾ ಪುನೆಪು ಬೈಜೆರ್. ಇಂಚಿನ ಪೊರ್ತುಡು ಸುಮಾರ್ ಬೇಡಿಕೆಲೆನ್ ದೀವೊಂದು ಕುಡ ನಿಕ್ಲೆನ ಎದುರು ಕೇನೊಂದುಲ್ಲ. ಒಂಜಿ ವೇಳೆ ಈ ಸಲಲಾ ನಿಕಲೆನ ಕೆಬಿಕ್ ಬೂರ್ಜಿಡ ಪ್ರತ್ಯೇಕ ತುಳುನಾಡ್ ರಾಜ್ಯೊಗು ಅಟ್ಟನೆ ಪಾಡೊಡಾವು. ಇದ ಮುಟ್ಟ ಮಾತೆರ್ಲಾ ಬಾಯಿ ಪಾತೆರೊಗು ಪನ್ತಿನಿ, ಒವ್ವೇ ಪಕ್ಷ ತನ್ನ ಪ್ರಣಾಳಿಕೆಡ್ ತುಳುತ ವಿಷಯ ಪಾತೆರ್ದಿಜಿ ಪನ್ದ್ ತುಳುಪರ ಪೊರುಂಬಾಟಗಾರೆರ್ ಕುಡ್ಲಡ್ ಪ್ರೆಸ್ ಮೀಟ್ ಲೆತ್ತ್ ಪಾತೆರಿಯೆರ್.
ಮೊಕಲೆನ ಬೇಡಿಕೆಲು ದಾದ ಪನ್ಡ : ತುಳುನಾಡ್‌ರ್ದ್ ಅಜತ್ ಬತ್ತಿನಕುಲು ತುಳುಟೇ ಪ್ರಮಾಣವಚನ ದೆತೊನೊಡು. ತುಳುನು ರಾಜ್ಯದ ಅಧಿಕೃತ ಭಾಷೆ ಮಲ್ಪೊಡು ಬೊಕ್ಕ 8ನೇ ಪರಿಶ್ಛೇದೊಗು ಗೋಡ್ಯಾವೊಡು. ತುಳುನಾಡ್ ಅಭಿವೃದ್ದಿ ಪ್ರಾಧಿಕಾರ ಮಲ್ಪೊಡು. ತುಳುನಾಡ್‌ಡ್ ಹೈಕೋರ್ಟ್ ಪೀಠ ಸ್ಥಾಪನೆ ಮಲ್ಪೊಡು. ತುಳುನಾಡ್‌ದಕಲೆಗ್ ತುಳುನಾಡ್‌ದ ಬೇಲೆಲೆಡ್ ಮೀಸಲಾತಿ ಕೊರೊಡು. ತುಳು ಪಿಚ್ಚರ್ಲೆಗ್ ಸಬ್ಸಿಡಿ ಕೊರೊಡು. ತುಳುನಾಡ್‌ಗಾದ್ ಪ್ರತ್ಯೇಕ ಪ್ರವಾಸೋದ್ಯಮ ನಿಗಮ, ಜಾನಪದ ವಿಶ್ವವಿದ್ಯಾಲಯ, ಕೃಷಿ ಅಭಿವೃದ್ದಿ ಮಂಡಳಿ ಇಂಚಿನ ಸುಮಾರ್ ಬೇಡಿಕೆಲು ಉಂಡು.