Last updated on April 24th, 2023 at 01:31 pm
ಕುಡ್ಲ: ಕಬಿ, ಸಾಹಿತಿ ಜೆ. ತಿಮ್ಮಪ್ಪ ಪೂಜಾರ್ಲು (73) ಜಪ್ಪುದಮೊಗೇರ್‌ದ ತನ್ನ ಇಲ್ಲಡ್ ಎಪ್ರಿಲ್ 22ತಾನಿ ತೀರ್ಯೆರ್.
‘ಕುರಲ್ ಇಷ್ಟೆರ್ ಕುಡ್ಲ’ ಸಂಘೊದ ಸ್ಥಾಪಕ ಗುರ್ಕಾರೆಯಾದ್, ಕಂಕನಾಡಿ ಬೈದೆರ್ಲೆ ಗರೋಡಿ ಕ್ಷೇತ್ರೊದ ಪ್ರತಿನಿಧಿ ಪದುಕೆಯಾದ್, ಕಂಕನಾಡಿ ಬಿಲ್ಲವ ಸಂಘೊದ ಸ್ಥಾಪಕ ಪದುಕೆಯಾದ್, ಜಪ್ಪುದಮೊಗೇರ್ ಗ್ರಾಮ ಯುವಕ ಮಂಡಲೊದ ಸ್ಥಾಪಕ ಪದುಕೆಯಾದ್, ಜಪ್ಪುದಮೊಗೇರ್ ಬ್ರಹ್ಮಶ್ರೀ ನಾರಾಯಣಗುರು ಮಂದಿರೊದ ಗೌರವ ಸಲಹೆಗಾರರಾದ್ ಚಾಕಿರಿ ಮಲ್ದೆರ್.
ಬಡವೆರಾದ್‌ ಬದುಕೊಡಾ, ಬದಿತ್ತ ಬಿದಿ, ಕರಿಯಮಣಿಯೆ ಸಾಕ್ಷಿ, ಬುದ್ಯಂತೆ‌ರ್, ಧರ್ಮರಾಜ್ಯದ ದೊರೆಗಳು, ಬಲಿ ಕೊರ್ಪಿ ಕುರಿಕ್ಕುಳು ನಾಟಕೊಲೆನ್ ಬರೆತೆರ್. ಕುಡ್ಲ ಆಕಾಶವಾಣಿಡ್ ಪ್ರಸಾರ ಆವೊಂದಿತ್ತಿನ ‘ಬಲಿ ಕೊರ್ಪಿ ಕುರಿ’, ‘ಎನ್ನ ಗುರು’, ‘ಬದ್ಕೊಂಜಿ ರೈಲ್ ಬಂಡಿ’ ನಾಟಕೊಲು ಅಂಚೆನೇ ‘ಮುಟ್ಟಿಯ ದಾಯೆ ದೆಕ್ಕ್‌ದ್ ಬುಡು’, ‘ಅಟ್ಟೆಮಿ ಆಂಡ ದಾನೆ ಗುಂಡಮಿ ಆಂಡ ದಾನೆ’ ಪನ್ಪಿ ರೇಡಿಯೋ ರೂಪಕ ಬೊಕ್ಕ 150ರ್ದ್‌ಲಾ ಎಚ್ಚ ಪ್ರದರ್ಶನ ಆತಿನ ‘ಅಮರ್ ಬೊಳ್ಳಿಲು’ ನೃತ್ಯ ರೂಪಕೊದ ರಚನೆ ಮಲ್ದಿತ್ತೆರ್.
ಕೂಕುಳು (ಕವನ ಸಂಕಲನ), ‘ಗಾದೆಲೆಡ್ ಅಡೆಂಗ್‌ದಿ ಕಥೆಕ್ಕುಲು’, ‘ಬಪ್ಪ ಬಸಪ್ಪನ ಪದೊಕ್ಕೂಲು’, ‘ತುಳುವೆರೆನ ರೀತಿ ರಿವಾಜಿಲು ಬೊಕ್ಕ ಪದಿನಾಜಿ ಸಂಸ್ಕಾರೊಲು’ ಪುಸ್ತಕೊಲೆನ್ ಬರೆತೆರ್.