Last updated on April 24th, 2023 at 09:38 pm
ಬೊಲ್ತೇರ್ ತಾಲೂಕ್‌ದ ಬೆಲಾಲ್ ಗ್ರಾಮೊದ ನಿವಾಸಿ ಜಾನಪದ ವಿದ್ವಾಂಸೆ, ಪಾಡ್ದನ–ಸಂಧಿಲೆನ ಗಾಯಕೆ ಮಾಚಾರ್ ಗೋಪಾಲ ನಾಯ್ಕೆರ್ (85) ಉಸಾರ್‌ದಾಂತಿನೆರ್ದಾವರ ಸೋಮವಾರ ತನ್ನ ಇಲ್ಲಡ್ ತೀರ್ಯೆರ್. ಮೇರ್ ಬೊಡೆದಿ, ಮಗೆ ಬೊಕ್ಕ ನಾಲ್ ಪೊಂಜೋಕುಲೆನ್ ಅಗತ್ ಪೋತೆರ್. ತುಳುನಾಡ್‌ದ ಆಚಾರ, ನಂಬೊಲಿಗೆ, ಆರಾಧನಾ ಕಿರಮೊಲೆನ ಗಂತ್‌ದ ಗೇನ ಇತ್ತಿನ ಮೇರ್ ಬೆನ್ನಿದ ಕ್ಷೇತ್ರೊಡ್ಲಾ ಬಾರಿ ಚಾತುರ್ಪು ಇತ್ತಿನಾರಾದಿತ್ತೆರ್.
ಕಾವ್ಯ ಕಟ್ಟುನ ಕಲೆ ಗೋಪಾಲ ನಾಯ್ಕೆರೆಗ್ ಸಿದ್ದಿಯಾದಿತ್ತ್ಂಡ್. ಸಿರಿ, ಕುಮಾರೆ, ಸೊನ್ನೆ, ಅಬ್ಬಗ-ದಾರಗ, ಕಾಂತುಪೂಂಜೆ ಇಂಚಿನ ಪಾತ್ರೊಲೆನ್ ಆರ್ ಸಂಧಿಡೇ ಕಟ್ಟ್‌ದ್‌ಕೊರೊಂದಿತ್ತೆರ್. ಆರೆ ನಾಲಾಯಿ ಕೊಡಿಟ್ ಅವೇತೋ ಸಂಧಿ–ಪಾಡ್ದನೊಲು ನಲ್ತೊಂದಿತ್ತ. ಬಾರಿ ಪೊರ್ಲುಡು ಪದ ಪನ್ಪಿನ ಕಲೆಲಾ ಆರೆಡ ಇತ್ತ್ಂಡ್.
ಉಜಿರೆದ ನಡ್ವಾಲ್ ಸಿರಿ ಜಾತ್ರೆಡ್ 60 ವರ್ಷ ಕುಮಾರ ಪಾತ್ರಿ ಆದಿತ್ತಿನ ಮೇರ್ ಜಾಗತಿಕ ಜಾನಪದ ಸಮಾವೇಶೊಲೆಡ್ ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್‌ಗೆತೊಂದೆರ್.
ಮೇರ್ ಪನ್ತಿನ 15,683 ಸಾಲ್‌ದ ಸಿರಿ ಕಾವ್ಯ ಬಾರಿ ಪುದರ್‌ಪೋತಿನವು. 1990ಡ್ ಕೂಡುಮಗ್ ಬತ್ತಿತ್ತಿನ ಫಿನ್ಲೆಂಡ್‌ದ ಜಾನಪದ ವಿದ್ವಾಂಸೆರ್ ಲೌರಿ ಹಾಂಕೊ ಬೊಕ್ಕ ಅನೆಲಿ ಹಾಂಕೊ 8 ವರ್ಸ ಕ್ಷೇತ್ರ ಅಧ್ಯಯನೊದ ಮುಕೇನ ಗೋಪಾಲ ನಾಯ್ಕೆರೆ ಸಂಧಿ-ಪಾಡ್ದನೊಲೆನ್ ಮದೆರ್ದ್ ಪಿದಯಿ ಕನತೆರ್. ಜಾನಪದ ವಿದ್ವಾಂಸೆರಾಯಿನ ಪ್ರೊ.ಬಿ.ಎ.ವಿವೇಕ ರೈಕುಲು ಬೊಕ್ಕ ಕೆ.ಚಿನ್ನಪ್ಪಗೌಡೆರ್ ಈ ಯೋಜನೆಡ್ ಲೌರಿ–ಅನೆಲಿ ಮೊಕಲೆಗ್ ಸಕಾಯ ಮಲ್ದೆರ್. ಈ ಅಧ್ಯಯನೊರ್ದಾವರ ಸಿರಿ ಕಾವ್ಯೊದ ರಡ್ಡ್ ಸಂಪುಟೊಲು ಇಂಗ್ಲಿಷ್‌ಗ್ ತರ್ಜುಮೆ ಆಯ. 2005ಟ್ ನಾಯ್ಕೆರೆಗ್ ರಾಜ್ಯೋತ್ಸವ ಮಾನಾದಿಗೆಲಾ ಸಂದ್‌ದ್ಂಡ್.