Last updated on August 1st, 2022 at 05:04 pm
ಸಾರ ವರ್ಷೊರ್ದು ದುಂಬು ಚೋಳೆರ್ನ ರಾಜೆ ರಾಜರಾಜ ಚೋಳ-1(ಕೃ.ಶ 947-ಕೃ.ಶ 1014) ತನ್ನ ಸಂಸ್ಕೃತ ತಾಮ್ರಶಾಸನೊಡು ‘ಜಿತ್ವಾ ಸ ಪಾಂಡ್ಯ ತುಳು ಕೇರಳ ಸಿಂಹಳೇಂದ್ರ ಸತ್ಯಾಶ್ರಯಾದಿ ನೃಪತೀಜಬಾಹುವೀರ್ಯಾತ್’ ಪನ್ದ್ ಬರೆತೆ. ಆ ಕಾಲೊಡೇ ತುಳುವ ರಾಜ್ಯ ಇತ್ತಿನೆಕ್ಕ್ ಪುರಾಪು ಉಂಡು. ಅವೆರ್ದ್’ಲಾ ಸಾರ ವರ್ಸ ದುಂಬು ಪಂಡ ರಡ್ಡ್ ಸಾರ ವರ್ಸ ಪಿರಾಕ್’ದ ಸಂಗಂ ಸಾಹಿತ್ಯೊಡ್ ತುಳುನಾಡ್’ದ ಉಲ್ಲೇಖ ಉಂಡು. ತುಳುವೆರೆ ಪರತಿರಿದ ಪಿರಾಕ್’ನ್ ಏರೇ ಏತೋ ದಂಟ್’ದ್ ಪಾಡಿಯೆರ್ಡಲಾ, ನಮ್ಮ ಪೆರಿಯಾಕುಲು ಕೆತ್ತಿನ ಕಲ್ಬರವುಲೆಡ್, ಬರೆಯಿ ಒಲಿಬರವುಲೆಡ್, ನೆಯ್ಯಿ ಪಾಡ್ದನೊಲೆಡ್ ಅವ್ ಯಾಪೊಗ್ಲಾ ಮಾಜಂದೆ ಉಪ್ಪುಂಡು. ಇಂಚಿತ್ತಿ ತುಳುನಾಡ್’ನ್ ತುಳುಬಾಸೆನ್ ತೂಂಡ ಸಸಾರ ದಾಯೆಗ್ ನಿಕ್ಲೆಗ್?
ಪುಟ್ಟಿಬಾಲೆ ಬಲಪರೆ ಬಲಿರ್ಯರೆ ಮಿರೆಪೇರ್ ಪರ್ದ್ ಬೊಕ್ಕ ಅಪ್ಪೆ ತಿಗಲೆಗ್ ದೊಂಕಿಲೆಕ್ಕ, ತುಳುವೆರೆರ್ದೇ ಮಿತ್ತ್ ಪೋಯಿನ, ಮಲ್ಲಾದಿಗೆ ಅಡರಿನ ಅವೇತೋ ಜನಕುಲು ಇನಿ ತುಳು ಪಂಡ ಮುಟ್ಟರಾವಂದಿಲೆಕ್ಕ ಮಲ್ಪುನು ದಾಯೆಗ್? ತುಳುವೆರೆ ಬಂಗದ ಪುಂಡಿಪನವುದ ಪುರ್ಸಾದ ದೆತೊಂದು ಇತ್ತೆ ಅವ್ವೇ ಪುರ್ಸಾದೊಗು ಪುಲಿ ಪುಂಟುಡು ಪಿರ ಕೊರ್ಪಿನ ಕೋಮಾಟಿಗೆ ದಾಯೆಗ್?
ತುಳುಟು ಭಾಗವತ ಬರೆಯಿನ ಪಿರಾಕ್’ದ ಕಬಿ ವಿಷ್ಣುತುಂಗೆರ್ ತುಳು ಪಂಡ ಸಸಾರ ಮಲ್ಪಿ ಜನಮಾಣಿಲೆಗ್ ಇಂಚ ಪನ್ಪೆರ್ ‘ ಜನೊ ತುಳುಭಾಷೆಂದುವೆಂದ್ ಖೇದೀಪನನೇಪ್ಪೊಡು ಸೂಕ್ಷಾಪುಟಾ ತೂವಹ್ನಿಯೆನ್ ಪ್ಪೀ ವಾದಂತುಳೆಯುಂಡಾ’, ಇನಿ ವೇದೊಲೆನ ಸಾರೊನು ತುಳುಟು ಬರೆನಗ ಯಬಾ ತುಳುವಾ ಪನ್ದ್ ಏರ್ಲಾ ಎನ್ನರೆ ಬಲ್ಲಿ, ಯಾನ್ ತುಳುಟು ತೂ ಪಂಡನೊ ಇಜಿಂಡ ಸಂಸ್ಕೃತೊಡು ಅಗ್ನಿ ಪಂಡನೊ, ತೂತ ಸಾರ ದಾಲ ಕಮ್ಮಿ ಆಪುಂಡಾ? ಇಂಚ ಅಪಗದ ಕಾಲೊಡೇ ಪಂಡಿತ ವರ್ಗೊಡು ತುಳು ಪಂಡ ಅನಾದರ ಇತ್ತಿನವೆನ್ ನಮಕ್ ಸೂಕ್ಷೊಡು ತೆರಿಪಾವೆರ್. ಇಂಚ ಸಾರ ಸಾರ ವರ್ಸ ಪರತಿರಿ ಇತ್ತಿನ ತುಳುಟು ಸಾಹಿತ್ಯದ ಬೆನ್ನಿ ದಾನೆ ಕಮ್ಮಿ ಆಂಡ್? ಕಮ್ಮಿ ಆಂಡಾ ಅತ್ತ್ ಬೆನ್ನಿದ ಬುಲೆ ಕಾಲದ ಕಿಲೆಟ್ ಸೇರ್ದ್ ಮದೆಯಾಂಡಾ? ಇತ್ತೆಲಾ ನಮ್ಮ ದುಂಬು 15-20 ತುಳು ಮಹಾ ಸಾಹಿತ್ಯೊಲು ಉಲ್ಲ, ನನ ಏರ್ನ ಅಟ್ಟೊಡು, ಏರ್ನ ದೇವೆರೆ ಕೊಟ್ಯಡ್ ಏತ್ ಅಡಂಗ್’ದ್ಂಡ್ ಪನ್ದ್ ತೆರಿದಿಜ್ಜಿ.
ತುಳುವೆಯಾದ್ ಪುಟ್ಟಿ ಬಾಲೆದ ಕೊಡಿ ನಾಲಯಿಡ್ ತುಳು ಮಾಜ್ಯುಜಿ ಪನ್ಪಿನ ಏತ್ ಸತ್ಯೊನಾ, ಅವ್ವೇ ಒರಿ ತುಳುವೆ ದಂಡಿಗೆಡ್ ಕುಲ್ಲುದು ಅಧಿಕಾರೊದ ಮಲ್ಲಾದಿಗೆ ಅಡರ್ನಗ ನಾಲಯಿಡ್ ತುಳು ಪೊರೆಲಂದಿನಲಾ ಆತೇ ಸತ್ಯ. ಸತ್ಯದಪ್ಪೆ ಸಿರಿನ ನಾಲಯಿದ ಕೊಡಿಟಿತ್ತಿ ತುಳು, ತಂಕದ ಬೀರೆರ್ ಬೈದ್ಯೆರ್ಲೆನ ನಾಲಯಿದ ಕೊಡಿಟಿತ್ತಿ ತುಳು, ಸಾರ ಕಲ್ಲ, ಮರ ಮಾಡ ಸಾನೊಲೆಡಿತ್ತಿ ದೈವೊಲೆನ ನಾಲಯಿದ ಕೊಡಿಟಿತ್ತಿ ತುಳು ಮೊಕಲೆನ ನಾಲಯಿಡ್ ದಾನೆ ಮಗುರುಜಿ?
51 ವರ್ಷೊರ್ದಿಂಚಿ ತುಳುವೆರ್ ಪೊರುಂಬೊಂದುಲ್ಲೆರ್ ತುಳುಕೊಂಜಿ ಮಾನಾದಿಗೆ ಬೋಡು, ತುಳು 8ನೇ ಪರಿಶ್ಛೇದೊಗು ಗೋಡ್ಯೊಡು ಪನ್ದ್. ಅವೇತೋ ವರ್ಷ ನಮ್ಮ ರಾಜ್ಯೊಡು ಮಾನಾದಿಗೆ ಬೋಡು ರಾಜ್ಯ ಬಾಸೆ ಆವೊಡು ಪನ್ದ್ ಪೊರುಂಬೊಂದುಲ್ಲೆರ್. ಆಂಡ ತುಳುವೆರೆಗ್ ತಿಕ್ಕಿನಿ ದಾದ? ಒಂಜಿ ತುಳುಭವನೊಗು ಸುಣ್ಣ ಕೊರಿಯರೆ ಆವಂದಿನಾತ್’ಲಾ ಬಡಪತ್ತ್? 13 ಜನ ಶಾಸಕೆರ್ ತುಳುನಾಡ್’ಡುಲ್ಲೆರ್ ತಂಕ ಇತ್ತ್ಂಡ ಸರಕಾರೊನೇ ಕಂಕನೆ ಕಬ್ಬೆ ಪಾಡೊಲಿ ಈತ್ ಜನ ಸೇರ್ಂಡ. ಆಂಡ ಮೊಕಲೆಡ ಒಂಜಿ ತುಳುನು ಅಧಿಕೃತ ಬಾಸೆ ಮಲ್ಪರೆ ಆಯಿಜಿ. ಊರುದ ಪಿಲಿಕುಲು ಪೂರಾ ಘಟ್ಟ ಮಿತ್ತಾರಿನೆ ರಂಗ್ ಜತ್ತ್’ದ್ ಎಲಿಕುಲಾಪಿನಿ ದಾನೆ? ತುಳುವೆರ್ ಕೇನಂದೆನೇ ತುಳುನಾಡ್’ಡ್ ಕನ್ನಡ ಭವನ ಕಟ್ಟಾವುನ ನಮ್ಮ ಸಚಿವೆರ್ನಕುಲು ತುಳುವೆರ್ ದೊಂಡೆಗ್ ನೀರ್ ಮೈತ್ ಕೇಂಡಲ ತುಳುತಂಚಿ ಮೂಸಂದಿನ ತೂನಗ ಉಂದು ಸಸಾರ ಅತ್ತಾ?
ಜನಕುಲು ಅಧಿಕಾರ ಸಾಸ್ವತ, ಜೀವ ಕುರ್ಚಿಗೇ ಅಂಟುದುಪ್ಪುಂಡು, ದಾದ ಮಲ್ತ್ಂಡಲಾ ತುಳುವೆರ್ ಮನಿಪುಜೆರ್ ಪನ್ದ್ ಎನ್ನಿದಿತ್ತೆರ್ಡ ತುಳುವೆರೆಗ್ ಪರತ್ತ್’ನ್ ನಿಗಿಪರೆಲಾ ಬರು ಪೊಸತ್ತ್’ನ್ ತೋಡರೆಲಾ ಬರು. ಇನಿ ಸಾರ ಜನಕುಲೆನ ನಡುಟು ನಿಕಲೆನ್ ಅಜತ್ತ್’ದ್ ಕಡಪುಡ್ದೆಪ್ ಪಂಡ ನಿಕಲೆನ ಮಿತ್ತ್ ದಾದನಾ ಒಂಜಿ ವಿಶ್ವಾಸ ದೀದ್ ಕಡಪುಡ್ದೆರ್ ಪನ್ದ್, ಆ ವಿಶ್ವಾಸೊನ್ ಒರಿಪಾಯಿಜಿಡ ನನೊರಿಯನ್ ಕಡಪುಡರೆಲಾ ಗೊತ್ತುಂಡು. ತುಳು ಪನ್ಪಿನ ಮಲ್ಲ ಮರೊತ ಮುದೆಲ್’ಗ್ ಬೂರಿನ ಗೊಬ್ಬರ ಆಲೆ ಉದಲ್ ಆವೊಡ್ಚಿ. ತುಳು ರಾಜ್ಯಬಾಸೆ ಆಯಿಜಿಡ ನನ ದುಂಬುದ ಪೊರುಂಬಾಟೊನು ತುಳುನಾಡ್ದ ಮಣ್ಣ್ ಮರಿಯಾದ್ ಬತ್ತ್ ಮಲ್ಪುಂಡು.
– ಮಹಿ ಮುಲ್ಕಿ
