Last updated on May 15th, 2023 at 08:08 am
ಈಯೋಡುದ ವೋಟುಡು ಬಾರಿ ಫೈಟ್ ಕ್ರಿಯೇಟ್ ಮಲ್ದಿನ ಕಾರ್ಲ ವಿಧಾನಸಭೆ ಕ್ಷೇತ್ರಡ್ ಗೆಂದಿನ ಬಿಜೆಪಿದ ವಿ ಸುನಿಲ್ ಕುಮಾರ್ ಇನಿ ಗೆಲ್ಮೆದ ಯಾತ್ರೆ ಮಲ್ತ್ ಕಾರ್ಯಕರ್ತೆರ್ಡ ಪಾತೆರಿನ ಆರ್ ಈತ್ ದಿನ ಯಾನ್ ಅಭಿವೃದ್ಧಿ ಮಲ್ತೊಂತೆ ನನ ಅಭಿವೃದ್ಧಿ ದೊಟ್ಟುಗು ರಾಜಕೀಯಲ ಮಲ್ಪುವೆ ಪಂದ್ ಪಂಡೆರ್.
ಈತ್ ದಿನ ಮನಿಪಂದೆ ಇತ್ತಿನ ಸುನಿಲ್ ಇನಿ ಕಾರ್ಲಡ್ ಭಾಷಣ ಮಲ್ತೆರ್ ಅವೆಟ್ಟ್ , ” ಈತ್ ದಿನ ಪುದರ್ ಪನಂದೆ ಪನೊಂತೆ, ಆಂಡ ಇತ್ತೆ ಪನ್ಪೆ ಪ್ರಮೋದ್ ಮುತಾಲಿಕ್ ಒರಿ ಮಲ್ಲ ಡೀಲ್ ಮಾಸ್ಟರ್, ಕಾಸ್ ಕೊರುಂಡ ಒಲ್ಪಲಾ ಉಂತುವೆರ್ ದಾದ ಬೋಡ್ಡಲ ಮಲ್ಪುವೆರ್. ಆನಿ ಅನಂತ್ ಕುಮಾರ್ ಹೆಗಡೆನ ಎದುರು ಉಂತುದೆ ಇನಿ ಎನ್ನ ಎದುರು ಉಂತಿಯೆರ್, ಪ್ರಮೋದ್ ಮುತಾಲಿಕ್ ಕಾಂಗ್ರೆಸ್‌ದ ಬಿ ಟೀಮ್, ಡ್ಯಾಮ್‌ಡ್ ಕ್ರಿಕೆಟ್ ಗೊಬ್ಬುವರ್ ಅತೆ ಅಂಚನೆ ಪರಶುರಾಮ ಥೀಮ್ ಪಾರ್ಕ್‌ಗ್ ಪೋದು ಅಲ್ಪದ ಮೂರ್ತಿದ ಉದ್ದ ಗೆನ್ಪರೆ ಒರ ಮಿತ್ತ್‌ರ್ದ್ ಲೈಪುಲೆ, ಕಾಂಗ್ರೆಸ್ ದೊಟ್ಟುಗು ಡೀಲ್ ಮಲ್ತ್ ವೋಟ್‌ದ ದುಂಬುನಾನಿ ಕಾಂಗ್ರೆಸ್‌ಗ್ ವೋಟು ಪಾಡರೆ ಪನ್ಪರತ ಉಂದು ವಾ ಹಿಂದುತ್ವ” ಪಂದ್ ಸುನಿಲ್ ಕುಮಾರ್ ಪಂಡೆರ್.
” ಪುರಸಭೆತ್ತ ಚಿಲ್ಲರೆ ನಾಯಕೆರ್ ಎನ್ನ ಬಗ್ಗೆ ಪಾತೆರ್ವೆರ್ ಅಕ್ಲೆಗ್ ಉತ್ತರ ಕೊರ್ಪುನಾಯೆ ಅತ್ತ್ ಯಾನ್. ಪ್ರೆಸ್ ಮೀಟ್‌ಡ್ ಮಾನ ನಷ್ಟ ಮೊಕದ್ದಮೆ ಪಾಡರೆ ಪನ್ಪೆರ್ ಆಂಡ ಮಾನದಾಂತಿ ನಕ್ಲೆಗ್ ಎಂಚಿನ ಮೊಕದ್ದಮೆ ಪಾಡುನು. ಎನ್ನ ಜಾತಿದ ಬಗ್ಗೆ ಇಲ್ಲ ದಕ್ಲೆನ ಬಗ್ಗೆ ಅಪಪ್ರಚಾರ ಮಲ್ಪುವೆರ್ ಅಕ್ಲೆಗ್ ಇನಿ ಕಾರ್ಲದ ಜನಕುಲು ಉತ್ತರ ಕೊರ್ತೆರ್ “, ಪಂದ್ ಸುನಿಲ್ ಕುಮಾರ್ ಪಂಡೆರ್.