ಮಾತಾ ಐನ್ ಗ್ಯಾರಂಟಿಲೆನ್ ಘೋಷಣೆ ಮಲ್ತಿನ ಸಿದ್ದರಾಮಯ್ಯ ಸರಕಾರ

Last updated on June 2nd, 2023 at 04:02 pm

ಓಟುಡು ಗೆಂದುನೆರ್ದ್ ದುಂಬು ಕಾಂಗ್ರೇಸ್ ಪಕ್ಷ ಕರ್ನಾಟಕೊಡು ಐನ್ ಜನಪ್ರಿಯ ಯೋಜನೆಲೆನ್ ಘೋಷಣೆ ಮಲ್ದಿತ್ತ್ಂಡ್. ಇತ್ತೆ ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆ ನೇತೃತ್ವೊಡು ನಡತಿನ ಸಭೆಟ್ ಈ ಗ್ಯಾರಂಟಿಲೆಗ್ ಅನುಮೋದನೆ ತಿಕ್‌ಕ್‌ದ್ಂಡ್. ಗೃಹಜ್ಯೋತಿ ಯೋಜನೆದ ಅಡಿಟ್ 200 ಯುನಿಟ್ ತಿಂಗೊಲುಗು ಕರೆಂಟ್ ಫ್ರೀ. 200 ಯುನಿಟ್‌ದ ಉಲಯಿ ವಿದ್ಯುತ್ ಗಲಸುನಕುಲು ಕರೆಂಟ್ ಬಿಲ್ ಕಟ್ಟೊಡುಂಡು ಇಜ್ಜಿ. ಉಂದೆರ್ದ್ ಜಾಸ್ತಿ ಗಲಸ್ಂಡ ಫ್ರೀ ಇಜ್ಜಿ. ಗೃಹಲಕ್ಷ್ಮೀ ಯೋಜನೆಡ್ ಇಲ್ಲದ ಗುರ್ಕಾರ್ದಿಗ್ 2000 ರೂ ಪನವುದ ಸಕಾಯ ತಿಕ್ಕುಂಡು, ಉಂದೆಕ್ ಜೂನ್ 15 ರ್ದ್ ಜುಲೈ 15 ಮುಟ್ಟ ಅರ್ಜಿ ಕೊರಿಯರೆ ಅವಕಾಶ ಉಂಡು. ಬಿಪಿಎಲ್ ಕಾರ್ಡ್ ದಕಲೆಗ್ ಅನ್ನಭಾಗ್ಯ ಯೋಜನೆಡ್ ಜುಲೈ 1 ರ್ದ್ 10 ಕೆ.ಜಿ ಅರಿ ತಿಕ್ಕುಂಡು. ಅಂಚೆನೆ ಈ ತಿಂಗೊಲುರ್ದು ಮಾತಾ ಪೊಂಜೊವುಲೆಗ್ ಫ್ರೀ ಬಸ್ ಸೇವೆ ತಿಕ್ಕುಂಡು. ಉಂದು ಕರ್ನಾಟಕದ ಉಲಯಿ ಮಾತ್ರ. ಎಸಿ ಬಸ್, ರಾಜಹಂಸ ಬಸ್ ಲೆನ್ ಬುರ್ದ್ ಬೇತೆಟ್ಟ್ ಸರಕಾರಿ ಬಸ್ಸುಲೆಡ್ ಧರ್ಮೊಗು ಪೋವೊಲಿ. 2022-23 ಟ್ಟ್ ಪಾಸ್ ಆತಿನಕಲೆಗ್ ಯುವನಿಧಿ ಯೋಜನೆಡ್ ರಡ್ಡ್ ವರ್ಸದ ಮಟ್ಟ್ ಗ್ ಪನವುದ ಸಕಾಯ ತಿಕ್ಕುಂಡು. ಡಿಗ್ರಿ ಮಲ್ದಿನ ನಿರುದ್ಯೋಗಿಲೆಗ್ ಮೂಜಿ ಸಾರ ಅಂಚೆನೆ ಡಿಪ್ಲೊಮಾ ಮಲ್ದಿನಕಲೆಗ್ ಒಂಜರೆ ಸಾರ ತಿಕ್ಕುಂಡು. ಇಂಚ ಓಟುದ ಪೊರ್ತುಗು ಕೊರ್ತಿನ ಮಾತಾ ಗ್ಯಾರಂಟಿಲೆನ್ ಕೊರಿಯರೆ ಸರಕಾರ ಒತ್ತೊಂದೊಂಡು.