Last updated on June 15th, 2023 at 11:06 am
ಕರಿನ ಒಂಜಿ ಪತ್ತ್ ತಿಂಗೊಲುರ್ದಿಂಚಿ ತುಳುನಾಡ ದೈವಾರಾಧನೆದ ಬಗ್ಗೆ ಮಕ್ಕರ್ ಮನ್ಪುನ, ಕೋಂಗಿ ಕಟ್ಟುನ ಇಸಯೊಲು ಇನೆದಾಂತೆ ನಡತೊಂದುಲ್ಲ. ದೈವೊದ ಏಸ ಪಾಡೊಂದು ನಲಿಪುನ, ರೀಲ್ಸ್ ಮನ್ಪುನ, ಮನೋರಂಜನೆದ ಮಿತ್ತರ್ಮೆಡ್ ಮನೋರಂಜನ ಸೊತ್ತುಲೆಕ ಗಲಸುವ, ಶಾಲೆದ ಪ್ರತಿಭಾ ಕಾರಂಜಿ ಓಡೆ ಪೋಂಡಲಾ ಒಂಜತ್ತ್ಂಡೊಂಜಿ ರಿತಿಟ್ ದೈವಾರಾಧನೆಗ್ ಅಪಚಾರ ಆಪಿನ ಬೇಲೆಲು ಆವೊಂದೇ ಉಲ್ಲ.
ಈ ಪಟ್ಟಿಗ್ ಪೊಸತೊಂಜಿ ಸೇರ್ಪು ಬೆಂಗ್ಳೂರ್‌ದ ರಾಜಾಜಿನಗರೊಡುಪ್ಪುನ ನವ್‌ರತನ್ ಜೆವೆಲ್ಲರ್ಸ್ ಪುದರ್ದ ಬಂಗಾರ್ದ ಕಟ್ಟೆದಕುಲು ಮಲ್ದಿನ ಒಂಜಿ ಮಾಲೆ. ಪಂಜುರ್ಲಿನ ಒರುನು ಪದಕೊದ ಲೆಕ ಈ ಮಾಲೆಗ್ ತಿಕ್ಕಾದೆರ್. ಆತೆ ಅತ್ತಂದೆ ಈ ಮಾಲೆದ ವೀಡಿಯೋ ಮಲ್ತ್‌ದ್ ‘ವರಾಹ ರೂಪಂ’ ಪನ್ಪಿನ ವಿವಾದಿತ ಪದೊನು ಪಾಡ್ದ್ ಸೋಶಿಯಲ್ ಮೀಡಿಯಾಡ್ ಪಟ್ಟೊಂದೆರ್. ನೆನ್ ತೂಯಿನೇ ಪಿಸ್‌ರಾತಿನ ತುಳುವೆರ್ ಕಮೆಂಟ್ ಮಲ್ತ್‌ದ್ ತನ್ಕುಲೆ ಭಾವನೆಲೆನ್ ತೆರಿಪಾವುನ ಪುನೆಪು ಬೈದೆರ್. ಎಂಕ್ಲು ಮಲ್ತಿನವೇ ಸಮ ಪಂದ್ ತೂಪಾವುಲೆಕ್ಕ ಈ ಬಂಗಾರ್ದ ಕಟ್ಟೆದಕುಲು ಈ ಪೋಸ್ಟ್‌ಗ್ ಕಮೆಂಟ್ ಮನ್ಪುನೆನ್ಲಾ ಆಫ್ ಮಲ್ದೆರ್. ನಮ್ಮ ನಂಬೊಲಿಗೆಲೆನ್ ಮನೋರಂಜನೆಗ್ ಗಲಸ್ಂಡ ದಾದ ಮಾತ ಆಪುಂಡು ಪನ್ಪಿನೆಕ್ ನಮ್ಮ ಕಣ್ಣೆದುರು ಇಪ್ಪುನ ಸಾರ ಸಾರ ಉದಾರ್ಮೆಲೆಗ್ ಪೊಸತೊಂಜಿ ಉದಾರ್ಮೆ ಗೋಡಿಲೆಕ್ಕಾಂಡ್. ಈ ಸಾರಸಾರ ಉದಾರ್ಮೆಲೆನ್ ತೂದುಲಾ ನಮ್ಮಕುಲು ಕಣ್ಣ್ ಬುಲಾಯಿಜೆರ್ ಪಂದಾಂಡ ನನ ಆ ಮಾಯೊಲೆ ಬುಲಪಾವೊಡಾವು.
ಮಣೆ-ಮಂಚಾವುಡಿತ್ತಿನ ದೈವೊಲ್ನ ಮೊಗ ಮೂರ್ತಿಲು ಇನಿಕಾನಗ ಸೌಂದರ್ಯವರ್ಧಕೊಲಾದ್ ಗಲಕೆ ಆವೊಡಾಂಡ ನಮ ನಮ್ಮ ಆಚರಣೆಲೆನ್ ಓಡೆ ಮುಟ್ಟ ಕನತ್ ದೀತ ಪಂದ್ ತೋಜುಂಡು. ನಂಬೊಲಿಗೆಲು ನಂಬೊಲಿಗೆ ಲೆಕ್ಕ ಇತ್ತ್ಕಡನೇ ಪೊರ್ಲು.