Last updated on June 15th, 2023 at 02:48 pm
ಮುಲ್ಕಿ ಪೊಲೀಸ್ ಠಾಣಾ ಸೀಮೆಡ್, ತಾಳಿಪ್ಪಾಡಿ ಗ್ರಾಮೊದ ಗುತ್ತಕಾಡ್‌ದ ಐಕಳ ಹರೀಶ್ ಶೆಟ್ರೆನ ಇಲ್ಲಡ್ ನಡತಿನ ಕಲ್ವೆದ ಪ್ರಕರಣೊಡು ಪಾಲ್‌ಪಡೆತಿನ ರಡ್ಡ್ ಜನೊನು ಸಿಸಿಬಿ ಪೊಲೀಸೆರ್ ಕೈದ್ ಮಲ್ದೆರ್.
ಕಾರ್ಲದ ಗಣೇಶ ನಾಯ್ಕ್(26) ಬೊಕ್ಕ ಕೊಡಗ್‌ದ ರಂಜಿತ್ ಕೆ.ಆರ್(26) ಕೈದಾತಿನ ಆರೋಪಿಲು. ಮೊಕಲೆರ್ದ್ 1 ಕೆಜಿ ನದ್ದೈ ಬಂಗಾರ್‌ನ್ ವಶಮಲ್ತೊಂದೆರ್.
ಪ್ರಕರಣೊದ ಒಲವು: ತೇದಿ: 15-01-2023 ತಾನಿ ಕುಡ್ಲ ತಾಲೂಕ್‌ದ ತಾಳಿಪ್ಪಾಡಿ ಗ್ರಾಮೊದ ಗುತ್ತಕಾಡ್‌ದ ಐಕಳ ಹರೀಶ್ ಶೆಟ್ರೆನ ಇಲ್ಲದ ಎದುರುದ ಬಾಕಿಲ್‌ದ ತರ್ಕೋಲು ಪೊಲ್ತ್‌ದ್ ಇಲ್ಲಡಿತ್ತಿನ ಪದ್ದೈಬಂಗಾರ್, ಬೊಳ್ಳಿ ಅಂಚೆನೇ ಪಣವುನು ಕಲ್ವೆರ್ ಲಕ್ಕಾದಿತ್ತೆರ್. ಈ ಬಗ್ಗೆ ಮುಲ್ಕಿ ಪೊಲೀಸ್ ಸ್ಟೇಷನ‌ಡ್ ಪ್ರಕರಣ ದಾಕಲಾದಿತ್ತ್ಂಡ್.
ಈ ಪ್ರಕರಣೊನು ಸಿಸಿಬಿಗ್ ಕೊರ್ದಿತ್ತೆರ್. ಕುಡ್ಲ ಸಿಸಿಬಿ ಪೊಲೀಸೆರ್ ಬೇತೆ ಬೇತೆ ಆಯಾಮೊಡು ಜಡ್ತೆ ಮಲ್ತ್‌ದ್ ಒಲವು ಒಟ್ಟುಮಲ್ತ್‌ದ್ ಪ್ರಕರಣೊನು ಬುಡ್ಪಾದ್ ಗಣೇಶ ನಾಯ್ಕ್, ರಂಜಿತ್ ಕೆ.ಆರ್ ಪನ್ಪಿನಕಲೆನ್ ಕೈದ್ ಮಲ್ದೆರ್. ಮೊಕಲೆರ್ದ್ ಅಂದಾಜಿ 55 ಲಕ್ಷ ರೂ.ಮೌಲ್ಯೊದ 1 ಕೆಜಿದಾತ್ ಬಂಗಾರ್, 2 ಮೊಬೈಲ್ ಫೋನ್‌ಲು, ಕೃತ್ಯೊಗು ಗಲಸ್‌ದಿನ ಕರ್ಬದ ರಾಡ್‌ನ್ ವಶೊಕು ಗೆತೊಂದೆರ್.
ಈ ಪ್ರಕರಣೊಡು ನನಲಾತ್ ಜನೊಕ್ಲೆನ ಕೈ ಇತ್ತ್‌ದ್, ಆರೋಪಿಲೆನ್ ಪತ್ತುನ ಬೇಲೆ ಆವೋಂದುಂಡು.
ಈ ಆರೋಪಿಲೆನೆಟ್ ಗಣೇಶ್ ನಾಯ್ಕೆ ಬೊಕ್ಕ ಬಾಕಿ ರಡ್ಡ್ ಜನ ಆರೋಪಿಲು ನೆಕ್ಕ್ ದುಂಬು ಕುಡ್ಲ ಗ್ರಾಮಾಂತರ ಪೊಲೀಸ್ ಸ್ಟೇಷನ್ ಸೀಮೆದ ಕೆಳರಾಯಿ ಚರ್ಚ್ ರೋಡ್‌ದ ಇಲ್ಲದ ತರ್ಕೋಲು ಪುಡತ್‌ದ್ ಕಲ್ವೆ ಮಲ್ತ್‌ದ್ ಬೊಕ್ಕ ಮಾರುತಿ ಬ್ರೀಝಾ ಕಾರ್‌ನ್ಲಾ ಕಂಡ್‌ದಿನ ಪ್ರಕರಣೊಡು ಪಾಲ್‌ಪಡೆತಿನಕುಲು, ಈ ಪ್ರಕರಣೊಲಾ ಪತ್ತೆ ಆತ್ಂಡ್.
ತಿಕ್‌ದ್‌ಬೂರ್ದಿನ ಆರೋಪಿಲೆನೆಟ್ ಗಣೇಶ್ ನಾಯ್ಕ್ ಪನ್ಪಿನಾಯನ ಮಿತ್ತ್ ಕಿನ್ಯಮಗಲ್ನೂರ್ ನಗರ ಪೊಲೀಸ್ ಠಾಣೆಡ್ ಪೋಕ್ಸೋ ಪ್ರಕರಣೊಲಾ ದಾಕಲಾದುಂಡು.