Last updated on June 15th, 2023 at 06:45 pm
ಉಳ್ಳಾದ ಒಂಜಿ ಇಲ್ಲಗ್ ರೂ.7 ಲಕ್ಷ ಕರೆಂಟ್ ಬಿಲ್ ಬತ್ತ್‌ದ್, ಬಿಲ್ ತೂಯಿನ ಇಲ್ಲದಕ್ಲೆಗ್ ಒರ ತೆಡಿಲ್ ಆಕಿಲೆಕಾತ್ಂಡ್.
ಉಳ್ಳಾಲಬೈಲ್ ನಿವಾಸಿ ಸದಾಶಿವ ಆಚಾರ್ಯ ಪನ್ಪಿನಾರೆನ ಇಲ್ಲದಕ್ಲೆಗ್ ಮೀಟರ್ ರೀಡರ್ ಕೊರ್ತಿನ ಬಿಲ್ ತೂದು ಒರ ಮೆಯಿ ಝುಮ್ಮಾತ್ಂಡ್. ಬಿಲ್ ತೂಯಿ ಪೆಟ್ಟ್‌ಗೇ ಇಲ್ಲದಕುಲು ಈ ಬಗ್ಗೆ ರೀಡರ್‌ಡ ಕೇನ್ನಗ ಕಚೇರಿಗ್ ಪೋದು ಕೇನರೆ ಪಂತೆರ್
ಕರೆಂಟ್ ಬಿಲ್ ರಿಸಿಪ್ಟ್‌ಡ್ 99,338 ಯೂನಿಟ್ ಖರ್ಚಾತ್ಂಡ್, 7,71,072 ರೂಪಾಯಿ ಬಿಲ್ ಆತಿನ ತೂಪಾವೊಂದಿತ್ತ್ಂಡ್. “ಎಂಕ್ಲೆಗ್ ನೆಕ್ಕ್ ದುಂಬು ತಿಂಗೊಲುಗು 3,000 ರೂಪಾಯಿದಾತ್ ಕರೆಂಟ್ ಬಿಲ್ ಬರೊಂದಿತ್ತ್ಂಡ್. ಎಂಕ್ಲ ಪ್ರತಿ ತಿಂಗೊಲ್ ಬಿಲ್ ಕಟ್ಟೊಂದುಲ್ಲ. ಈ ತಿಂಗೊಲ್ದ ಬಿಲ್ ತೂದು ಎಂಕ್ಲೆಗ್ ಮಾತ ಒರ ಶಾಕ್ ಆಂಡ್”, ಪಂದ್ ಸದಾಶಿವ ಆಚಾರ್ಯೆರ್ ಪಂಡೆರ್.
“ಏಜೆನ್ಸಿಲೆನ ಮುಕೇನ ಬಿಲ್ ಕಲೆಕ್ಷನ್ ಮನ್ಪುವ. ಬಿಲ್ ರೀಡರ್‌ನ ಗೋಸ್ಮರಿರ್ದಾವರ ತಪ್ಪಾದ್ ಕರೆಂಟ್ ಬಿಲ್ ಆಚ್ಚಾತ್ಂಡ್. ಬಿಲ್‌ಡ್ ದಾಲ ಎಚ್ಚಿಕಮ್ಮಿ ತೋಜಿದ್ ಬತ್ತ್ಂಡ ಅವೆನ್ ಗ್ರಾಹಕೆರೆಗ್ ಕೊರ್ಯೆರ ಇಜ್ಜಿ. ಇಸಯ ತೆರಿನೆಟ್ಟಿಗೇ ಸದಾಶಿವ ಆಚಾರ್ಯೆರೆನ ಇಲ್ಲ ಬಾಕಿಲ್‌ಗ್ ಪರಿಷ್ಕೃತ ಬಿಲ್ ಕಡಪುಡುವ ಪಂದ್ ಪಂದಿತ್ತ. ಅಂಚೆನೇ ಇನಿ ಮದ್ಯಾಹ್ನದ ಪೊರ್ತುಗು ಪರಿಷ್ಕೃತ 2,833 ರೂಪಾಯಿದ ಬಿಲ್ ಆಚಾರ್ಯೆರ್ನ ಇಲ್ಲಗ್ ಎತ್ತ್‌ದ್ಂಡ್” ಪಂದ್ ಉಳ್ಳಾಲ ಮೆಸ್ಕಾಂ ಉಪವಿಭಾಗೊದ ಎಕ್ಸಿಕ್ಯೂಟಿವ್ ಇಂಜಿನಿಯರ್ ದಯಾನಂದೆರ್ ತೆರಿಪಾದೆರ್.