Last updated on June 17th, 2023 at 11:16 am
ಕುಡ್ಲ, ಜೂನ್ 16: ಕುಡ್ಲಡ್ ನೈತಿಕ ಪೊಲೀಸ್‌ಗಿರಿನ್ ಉಂತಾವರ ಬೋಡಾದ್ ಕರ್ನಾಟಕೊದ ಗೃಹ ಸಚಿವೆರ್ ಇಂಚಿಪ್ಪೊಗು ಪ್ರಸ್ತಾಪ ಮಲ್ದಿನ ಕೋಮುವಾದಿ ನಿಗ್ರಹ ಘಟಕ ತನ್ನ ಬೇಲೆ ಸುರು ಮಲ್ದ್ಂಡ್ ಪಂದ್ ಪೊಲೀಸ್ ಕಮಿಷನರ್ ಕುಲದೀಪ್ ಕುಮಾರ್ ಜೈನ್ ಗುರುವಾರ ತೆರಿಪಾಯೆರ್. ಜೂನ್ 13ರ್ದ್ ಆಯುಕ್ತೆರೆನ ಅಧಿಕೃತ ಆದೇಶ ಬತ್ತಿನೇ ಈ ವಿಶೇಷ ವಿಭಾಗೊ ಕಾರ್ಯಾಚರಣೆ ಸುರು ಮಲ್ದ್ಂಡ್.
ಕರಿನ 10 ವರ್ಸೊಡು ಕೋಮುಗಲಭೆಗ್ ಸಂಬಂಧಿತಿನ ಪ್ರಕರಣೊಲೆನ್ ಈ ವಿಭಾಗ ನಿಚ್ಚೊಲಾ ಮೇಲ್ವಿಚಾರಣೆ ಮನ್ಪುಂಡು. ಆರೋಪಿಲು ಬೊಕ್ಕ ಶಂಕಿತೆರೆನ ನಡಕೆಲು, ಪೋಪಿನ ಬರ್ಪಿನೆತ ಮಿತ್ತ್ ಕಣ್ಣ್ ದೀಪುಂಡು ಪಂದ್ ಜೈನ್ ಕುಡ್ಲಡ್ ಪಂಡೆರ್.
“ಪೊಲೀಸೆರ್ ನ್ಯಾಯಂತಡೆಡ್ ನಡತೊಂದುಪ್ಪುನ ವಿಚಾರಣೆಲೆನ ಮೇಲ್ವಿಚಾರಣೆ ಮನ್ಪುವೆರ್ ಅಂಚೆನೇ ಬರ್ಪಿದಿನೊಕ್ಲೆಡ್ ಒವ್ವೇ ಕೋಮು ನಡಕೆಲು ನಡಪಿನೆನ್ ಉಂತಾವರ ಬೋಡಾದ್ ಕ್ರಮಪ್ರಕಾರವಾಯಿನ ಗುಪ್ತಚರ ಇಲಾಖೆನ್ ಉಂಡುಮಲ್ದ್ಂಡ್” ಪಂದ್ ಪಂಡೆರ್.
ಕೋಮುವಾದಿ ನಿಗ್ರಹ ದಳೊಕು ಒಂಜಿ ಕೂಟೊನು ನಿಯೋಜನೆ ಮಲ್ದೆರ್. ಇತ್ತೆಗ್ ಈ ವಿಭಾಗೊಡು ಒರಿ ಪೊಲೀಸ್ ಇನ್ಸ್‌ಪೆಕ್ಟರ್ ಬೊಕ್ಕ ಐನ್ ಸಿಬ್ಬಂದಿಲು ಉಲ್ಲೆರ್. ನನದ ದಿನೊಟು ಈ ವಿಭಾಗೊಗು ಸಿಬ್ಬಂದಿಲೆನ್ ಎಚ್ಚ ಮನ್ಪುವೆರ್.
ಈ ವಿಭಾಗ ಸಿಟಿ ಸ್ಪೆಷಲ್ ಬ್ರಾಂಚ್ (ಸಿಎಸ್‌ಬಿ) ಪೊಲೀಸ್ ಇನ್ಸ್‌ಪೆಕ್ಟರ್‌ನ ಮುತಾಲಿಕೆಡುಪ್ಪುಂಡು. ಸಿಎಸ್‌ಬಿದ ಐನ್ ಪೋಲೀಸ್ ಸಿಬ್ಬಂದಿಲೆನ ಕೂಟ ಅಕಲೆಗ್ ತಾಂಗ್ ಕೊರ್ಪುಂಡು. ಉ್ಂದೆನ್ ಕುಡ್ಲ ಪೊಲೀಸ್ ಕೇಂದ್ರ ಅಪರಾಧ ವಿಭಾಗೊದ (ಸಿಸಿಬಿ) ಸಹಾಯಕ ಪೊಲೀಸ್ ಆಯುಕ್ತೆರ್ (ಎಸಿಪಿ) ಮೇಲ್ವಿಚಾರಣೆ ಮನ್ಪೆರ್ ಬೊಕ್ಕ ಪೊಲೀಸ್ ಕಮಿಷನರ್‌ಗ್ ಡೈರೆಕ್ಟರಿ ವರದಿನ್ ಕೊರ್ಪೆರ್.
ಮುಖ್ಯ ಉದ್ದೇಶೊಲು ದಾದ
ಪೊಲೀಸ್ ಆಯುಕ್ತೆರೆ ಆದೇಶೊದ ಪ್ರಕಾರ, ಪೇಂಟೆಡ್ ನೈತಿಕ ಪೊಲೀಸ್‌ಗಿರಿತ ಸಮಸ್ಯೆನ್ ಈ ವಿಭಾಗೊ ತೂವೊನ್ಡು. ಈ ವಿಭಾಗೊ ಉ್ಂದೆಕ್ ದುಂಬು ವರದಿಯಾತಿನ ಕೊಲೆ, ಕೊಲೆ ಪುನೆಪು, ನೈತಿಕ ಪೊಲೀಸ್‌ಗಿರಿ, ಪಗೆ ಭಾಷಣೊ, ಪೆತ್ತೊಲ್ನ ಕಲ್ವೆ, ಅಕ್ರಮ ಪೆತ್ತ ಸಾಗಾಟೊ ಬೊಕ್ಕ ಕೈಕಂಜಿಲೆನ ಹತ್ಯೆ ಪ್ರಕರಣೊಲೆನ್ ಪರಿಶೀಲನೆ ಮನ್ಪರೆಗಿತ್ತ್‌ದ್, ಕುಡ್ಲದ ಕೋಮು ಸೌಹಾರ್ದತೆನ್ ಕಾತೊನುಂಡು. ಆರೋಪಿಗಳ ನಿಚ್ಚೊದ ಚಲನವಲನೊಲೆನ ಮಿತ್ತ್‌ಲಾ ಕಣ್ಣ್ ದೀಪುಂಡು. ಕೋಮುವಾದಿ ಉದ್ದೇಶೊಲೆನ್ ದೀವೊಂದು ಬೇಲೆ ಮಲ್ಪುನ ಸಂಸ್ಥೆಲೆನ ಮೇಲ್ವಿಚಾರಣೆ ಬೊಕ್ಕ ಒಲವು ಒಟ್ಟುಮಲ್ಪುನ ಜಬದರಿ ಈ ವಿಭಾಗೊದ ಮಿತ್ತ್ ಇಪ್ಪುಂಡು ಪಂದ್ ಆದೇಶೊಡು ಉಂಡು. ಕೋಮುವಾದಿ ನಿಗ್ರಹ ವಿಭಾಗೊದ ಅಧಿಕಾರಿಲು ಸಾಮಾಜಿಕ ಬಲೆತ್ತಾನೊಲೆನ ಮಿತ್ತ್‌ಲಾ ಕಣ್ಣ್‌ದೀಪೆರ್.
ಕುಡ್ಲಗ್ ಮಾತ್ರ ದಾಯೆ?
ಸರಕಾರೊದ ಪ್ರಕಾರ ಕುಡ್ಲಡ್ ನೈತಿಕ ಪೋಲಿಸ್‌ಗಿರಿ ಜಾಸ್ತಿ ನಡಪುಂಡು. ಅಧಿಕಾರೊಗು ಬತ್ತಿನ ದಿನೊರ್ದಿಂಚಿ ಸರಕಾರ ನೈತಿಕ ಪೋಲಿಸ್‌ಗಿರಿತ ಬಗ್ಗೆ ಪಾತೆರೊಂದುಂಡು. ಕುಡ್ಲಡ್ ನಡಪುನ ನೈತಿಕ ಪೋಲಿಸ್‌ಗಿರಿನ್ ಅಂಕೆಡ್ ದೀವರೆ ಬೋಡಾದ್ ಈ ಘಟಕೊನು ಉಂಡು ಮಲ್ದ ಪಂದ್ ಗೃಹ ಸಚಿವೆರ್ ಪಂತೆರ್. ಬೊಕ್ಕ ಬೋಡೂಂದು ತೋಜಿಂಡ ರಾಜ್ಯೊದ ಬೇತೆ ಜಿಲ್ಲೆಲೆಡ್ಲಾ ಇಂಚಿನ ಘಟಕೊಲೆನ್ ಉಂಡು ಮನ್ಪ ಪಂದ್ ಪಂತೆರ್.