Last updated on August 15th, 2023 at 06:44 pm
ಪೊಲೀಸೆರೆನ ಎದುರುಡೇ ವಿದ್ಯಾರ್ಥಿಲೆನ ಕೂಟ ಒಂಜಿ ಬಸ್ ಉಂತದ್, ಪ್ರಯಾಣಿಕನ ಮಿತ್ತ್ ಹಲ್ಲೆ ಮಲ್ತ್‌ದ್ ಗೂಂಡಾಗಿರಿ ತೂಪಾದಿನ ನಡಕೆ ಚಾರ್ಮಾಡಿಡ್ ನಡತ್‌ದ್ಂಡ್.
ಬೊಲ್ತೇರ್ ತಾಲೂಕ್‌ದ ಉಜಿರೆರ್ದ್ ಚಾರ್ಮಾಡಿದಂಚಿ ಪೋವೊಂದಿತ್ತಿನ ಕೆಎಸ್ಸಾರ್ಟಿಸಿ ಎಕ್ಸ್‌ಪ್ರೆಸ್ ಬಸ್ಸ್‌ಡ್ ವಿದ್ಯಾರ್ಥಿಲು ಪೋವೊಂದಿತ್ತೆರ್. ಈ ಪೊರ್ತುಡು, ಬಸ್‌ನ್ ಚಾರ್ಮಾಡಿಡ್ ಉಂತಾವೊಡು ಪಂದ್ ವಿದ್ಯಾರ್ಥಿಲೆನ ಕೂಟ ಒತ್ತಾಯ ಮಲ್ತ್‌ದ್ ಬಸ್ ಕಂಡಕ್ಟರ್‌ನ ಒಟ್ಟುಗು ವಾಗ್ವಾದ ಮಲ್ತ್‌ದೆರ್. ಇಂಚ ಬಸ್ಸ್‌ಡ್ ಮೊಕಲ್ನ ನಡುಟು ಪಾತೆರೊಗು ಪಾತೆರ ಬುಲೆವೊಂದು ಪೋನಗ ಪ್ರಯಾಣಿಕೆ ಒರಿ ಕಂಡಕ್ಟರ್‌ನ ಪರವಾದ್ ಪಾತೆರ್ದೆರ್. ಉ್ಂದೆರ್ದಾವರ ಪಿಸಿರಾತಿನ ವಿದ್ಯಾರ್ಥಿಲೆನ ಕೂಟ ಆ ಪ್ರಯಾಣಿಕಗ್ ಜೋರು ಮಲ್ದೆರ್. ಬೊಕ್ಕ ಅಕಲ್ನ ಸಮುದಾಯೊದ ಬೇತೆ ಜವನೆರೆನ್ ಲೆಪುಡಾದ್, ಚಾರ್ಮಾಡಿಡ್ ಬಸ್ ಉಂತಾದ್ ಗಲಾಟೆ ಮಲ್ತ್‌ದ್ ಆ ಪ್ರಯಾಣಿಕನ ಮಿತ್ತ್ ಹಲ್ಲೆ ಮಲ್ದೆರ್.
ಬಸ್ ಉಂತಾದ್, ಜವನೆರೆ ಕೂಟ ಪ್ರಯಾಣಿಕನ ಮಿತ್ತ್ ಹಲ್ಲೆ ಮಲ್ತಿನೆನ್ ಬೇತೆ ಪ್ರಯಾಣಿಕೆರ್ ಮೊಬೈಲ್‌ಲೆಡ್ ರೆಕಾರ್ಡ್ ಮಲ್ದೆರ್. ಕೋಡೆ ಮಧ್ಯಾಹ್ನ ಈ ನಡಕೆ ನಡತ್‌ದ್, ಈ ವಿಡಿಯೋ ಬಲೆತ್ತಾನೊಡು ವೈರಲ್ ಆತ್ಂಡ್. ಪೊಲೀಸೆರೆ ಎದುರುಡೇ ಪೆರ್ಚಿಕಟ್ಟೊಂದು, ಕಂಡಕ್ಟರ‌ಗ್ ಪೆದಂಬು ನೆರ್ತೆರ್. ಪೊಲೀಸೆರೆನ ಎದುರುಡೇ ಕಾನೂನು ಕೈಕ್ ದೆತೊಂದು ನೈತಿಕ ಪೊಲೀಸ್‌‌ಗಿರಿ ಮಲ್ದೆರ್. ನೈತಿಕ ಪೊಲೀಸ್‌ ಕೃತ್ಯೊಗು ನಿರ್ದಾಕ್ಷಿಣ್ಯ ಕ್ರಮೊದ ಪಾತೆರ ಕೊರ್ದಿತ್ತ್ಂಡಲಾ, ಪೊಲೀಸೆರ್ ಈ ಬಗ್ಗೆ ಒವ್ವೇ ಪ್ರಕರಣ ದಾಕಲ್ ಮಲ್ತೊಂದಿಜೆರ್.