Last updated on August 15th, 2023 at 06:44 pm
ತುಳುವನಾಡ್‌ದ ಬೇತೆ ಬೇತೆ ಕಟ್ಟ್ ಕಟ್ಟಲೆದ ಪ್ರಕಾರೊಡು ಪೊದು ಮದಿಮೆಗ್ಲಾ ಸುಮಾರ್ ಕಟ್ಟಳೆಲು ಇತ್ತ. ಒಂಜೆ ಬರಿತಕಲೆಗ್ ಮದ್ಮೆದ ನಿಷಿದ್ದ ಎಂಚ ಇತ್ತ್ಂಡ ಅಂಚೆನೆ ಕೆಲವು ಜಾತಿಲೆಡ್ ಕಡೀರ ಪೊಣ್ಣಗ್ ಕಡೀರ ಆನನ್ ಮದ್ಮೆ ಮಲ್ತ್ ಕೊರೊಂದಿತ್‌ತ್‌ಜೆರ್. ಉಂದೆಕ್ ಒಂಜಿ ಕಾರಣಲಾ ಉಂಡು. ಅವ್ ದಾದ ಪನ್ದ್ ತೆರಿಯೊನರೆ ದುಂಬು ಓದುಲೆ.
ತುಳುನಾಡ್ ಅಪ್ಪೆ ಕಟ್ಟ್, ಅರ್ವದ ಸಂತಾನದ ಭೂಮಿ. ಪಟ್ಟೊದ ಅಧಿಕಾರ ತಮ್ಮಲೆರ್ದ್ ಬೊಕ್ಕ ಅರ್ವದಗ್ ಪೋವೊಂದಿತ್ತಿನ ಕಾಲ. ತುಳುನಾಡ್‌ದ ಏತೋ ರಾಜ ಮನೆತನಲೆಡ್ ಅರ್ವದೆ ದಾಂತಿನಪಗ ಮರ್ಮಲೇ ಅಧಿಕಾರದ ಗದ್ದಿಗೆ ಏರ್ನ ಉದಾರ್ಮೆ ಉಂಡು. ಚೌಟೆರೆ ರಾಣಿ ಅಬ್ಬಕ್ಕ ಆವಡ್, ಬೈಲಂಗಡಿ ಮೂಲೆರ್ನ ರಾಣಿ ಸೋಮಲಾದೇವಿ ಆವಡ್ ಇಂಚೆನೆ ಅಧಿಕಾರೊಗು ಬತ್ತಿನಕುಲು. ಅಬ್ಬಕ್ಕಗ್ಲಾ ಅಲೆನ ಕಂಡನಗ್ಲಾ ಎಡ್ಡೆ ಸಂಬಂದೊ ಇತ್ತಿಜಿ, ಅಬ್ಬಕ್ಕನ ಕಂಡನೆಲಾ ರಾಜೆ ಆದಿತ್ತಿನಾರ್. ಇಂಚಿಗ್ ಸೋಮಳಾದೇವಿಗ್ಲಾ ಅರೆನ ಕಂಡನಗ್ಲಾ, ಅಧಿಕಾರ, ಆತ್ಮಗೌರವದ ವಿಷಯೊಡು ಮನಸ್ಥಾಪ ಬತ್ತ್ ಇರುವೆರೆನಲಾ ದುರಂತ ಅಂತ್ಯ ಆಯಿನವು ನಮ ಇತಿಹಾಸೊಡು ತೂತ. ಕಡೀರ ಮಗಲೆಗ್ ಅಪ್ಪೆಲ್ಲದ ಅಧಿಕಾರ ಉಂಡು. ಅಪ್ಪೆ ಕಟ್ಟ್ ಡ್ ಪೆರಿಯಾಯಿನಾಲ್ ಏರ್ ಪಂಡ ಆಲ್. ಅಂಚೆನೆ ಕಡೀರ ಮಗಕ್ ಆಯನ ಅಪ್ಪೆಲ್ಲದ ಅಧಿಕಾರ ಇತ್ತ್ಂಡ್. ಅಪ್ಪೆಕಟ್ಟ ಅರ್ವದ ಸಂತಾನೊಡು ಆಯಗ ಪೆರಿಯ ಅಧಿಕಾರ. ಇಂಚ ಉಪ್ಪುನಗ ರಡ್ಡ್ ಕಡೆಟ್ಲಾ ಅಧಿಕಾರ ಸ್ಥಾನೊಡು ಉಪ್ಪುನ ಆನಗ್ಲಾ ಪೊಣ್ಣಗ್ಲಾ ತಾನಮಾನದ ಇಸಯೊಡು ಒಂಜಿ ರಡ್ಡ್ ಪಾತೆರೊಲು ಬತ್ತ್ ಅಕಲೆನ ಸಂಸಾರ ತೆಟ್ಟುನ ಉದಾರ್ಮೆ ಮಸ್ತ್ ಇತ್ತ್ಂಡ್. ಮಾತ್ರ ಅತ್ತಂದೆ ದುಂಬುದ ಕಾಲದ ಸೂಕ್ಷ್ಮೊಲೆಡ್ ಅಕಲೆಗ್ ದಾಂಪತ್ಯ ನಡಪಾವೊಂದು ಪೋಪಿನನೇ ಬಂಙ ಇತ್ತ್ಂಡ್. ಉಂದೆಕ್ ನಮಕ್ ಸೋಮಳಾದೇವಿ ಆವಡ್, ಅಬ್ಬಕ್ಕ ದೇವಿಯಾವಡ್ ಮೊಕಲೆನ ದಾಂಪತ್ಯ ಜೀವನನೇ ಉದಾರ್ಮೆ. ಅರಸೊತ್ತಿಗೆಡ್ ಮಾತ್ರ ಅತ್ತಂದೆ, ಗುತ್ತು ಬರಿಕೆ ಬಾಮೊಡು, ಅಧಿಕಾರ ಸ್ಥಾನೊಲೆಡ್ ಮಾತಾ ಕಡೆಟ್ಲಾ ಕಡೀರ ಆನಗ್ಲಾ ಕಡೀರ ಪೊಣ್ಣಗ್ಲಾ ಮದಿಮೆ ಪೊದು ಮಲ್ಪಂದಿನ ಕ್ರಮ ಇತ್ತ್ಂಡ್. ಕಡೀರ್ದಕಲು ಮಡೀರ್ ಇಜಿಂಡ ಬೊಕ್ಕ ಪುಟ್ಟಿನಕಲೆನ್ ಮದಿಮೆ ಆವೊಲಿ ಪನ್ದ್ ಇತ್ತ್ಂಡ್. ಇತ್ತೆ ಕಾಲ ಬದಲಾತ್ಂಡ್, ಅಪ್ಪೆ ಕಟ್ಟ್ ಅಲಿಯೊಂದುಂಡು, ಸಂಪ್ರದಾಯೊಲು ಸಡಿಲ ಆತ್ಂಡ್. ಇತ್ತೆ ಒಂಜೇ ಬರಿತಕುಲುಲಾ ಮದ್ಮೆ ಆಪೆರ್ ಅಂಚಾದ್ ಕಡೀರ ಜೋಕುಲೆನ ಮದ್ಮೆದ ಕಟ್ಟ್ ಇತ್ತೆ ಇಜ್ಜಿ.