Last updated on August 15th, 2023 at 06:40 pm
ಚಿಕ್ಕಬಳ್ಳಾಪುರ: ತನ್ನ ಬೊಡೆದಿನೊಟ್ಟುಗು ಅಕ್ರಮ ಸಂಬಂಧ ದೀವೊಂದೆ ಪಂಡ್‌ದ್ ಕಂಡನಿ ಪಾಸಾಡಿನ ನಾಲಿ ಕೊಯ್ದ್ ನೆತ್ತೆರ್ ಪರ್ತಿನ ನಡಕೆ ಚಿಕ್ಕಬಳ್ಳಾಪುರ ಜಿಲ್ಲೆದ ಚಿಂತಾಮಣಿ ತಾಲೂಕ್‌ದ ಸಿದ್ದೇಪಲ್ಲಿ ಕ್ರಾಸ್‌ದಲ್ಪ ನಡತ್‌ದ್ಂಡ್.
ಚಿಂತಾಮಣಿ ತಾಲೂಕ್‌ದ ಬಟ್ಲಪಲ್ಲಿ ನಿವಾಸಿ ವಿಜಯ್ ತನ್ನ ಬೊಡೆದಿನ ಪ್ರಿಯಕರೆ ಬಾಗೇಪಲ್ಲಿ ತಾಲೂಕು ಮಂಡಂಪಲ್ಲಿ ನಿವಾಸಿ ಮಾರೇಶ್ ಪನ್ಪಿನಾಮನ ನಾಲಿ ಕೊಯ್ದ್ ನೆತ್ತೆರ್ ಪರ್ತೆ. ವಿಜಯ್ ಬೊಕ್ಕ ಮಾರೇಶ್ ರಡ್ಡ್ ಜನೊಲಾ ಚಿಂತಾಮಣಿಡ್ ಇಪ್ಪುನಕುಲಾದಿತ್ತ್‌ದ್, ಇರ್ವೆರ್ಲಾ ಟಾಟಾ ಏಸ್ (Tata Ace) ಗಾಡಿಡ್ ಕುಂಟು ಮಾರೊಂದಿತ್ತೆರ್. ಆಂಡ ತನ್ನ ಬೊಡೆದಿ ಮಾಲಾಡ ಮಾರೇಶ್ ಅನೈತಿಕ ಸಂಬಂಧ ದೀವೊಂದೆ ಪನ್ಪಿ ಸಂಶಯೊಡು ವಿಜಯ್, ಮಾರೇಶ್‌ನ್ ಕೆರ್ಪುನ ಉದ್ದೇಶೊಡು ಒಂಜಿ ಬಾಡಾಯಿ ಉಂಡು ಗಾಡಿ ಪತೊಂದು ಬಲ, ಪೋದು ಬರ್ಕ ಪಂಡ್‌ದ್, ಸಿದ್ದೇಪಲ್ಲಿ ಕ್ರಾಸ್‌ದಲ್ಪ ಜನದಾಂತಿ ಜಾಗೆಗ್ ಲೆತೊಂದು ಪೋದು ನಾಲಿ ಕೊಯ್ತೆ.
ವಿಜಯ್ ಬೀಸತ್ತಿಡ್ ಮಾರೇಶ್‌ನ ನಾಲಿ ಕೊಯ್ದ್, ನೆತ್ತೆರ್ ರಟ್ಟ್‌ನಗ ಅವೆನ್ ಪರ್ದ್ ತನ್ನ ಪಿಸಿರ್ ತೋಜಾದೆ. ಈ ನಡಕೆ ಜೂನ್ 19ದಾನಿ ನಡತ್‌ದ್, ತೈರ್ದ್ ಬೊಲ್ಪುಗ್ ಬೈದ್ಂಡ್. ವಿಜಯ್‌ನ ಒಟ್ಟು ಇತ್ತಿನ ಕುಡೊರಿ ಪಾಸಾಡಿ ಈ ನಾಲಿ ಕೊಯ್ದ್ ನೆತ್ತೆರ್ ಪರ್ಪುನೆನ್ ತನ್ನ ಮೊಬೈಲ್‌ಡ್ ವೀಡಿಯೋ ಮಲ್ತ್‌ದೆ.
ಆ ದಿನೊನೇ ಇಸಯ ತೆರಿನ ವಿಜಯ್‌ನ ಪಲಯೆ ಮಾರೇಶ್‌ನ್ ಆಸ್ಪತ್ರೆಗ್ ಸೇರ್ಪಾದ್ ಮರ್ದ್ ಮನ್ಪಾದ್, ರಾಜಿ ಪಂಚಾಯಿತಿ ಮನ್ತೊನರೆ ತೂತೆರ್. ಆಂಡ ನಡಕೆದ ವಿಡಿಯೋ ಸಾಮಾಜಿಕ ಬಲೆತ್ತಾನೊಡು (Social Media) ವೈರಲ್ ಆಯಿನೇ ಪೊಲೀಸೆರೆ ಗೇನೊಗ್ಲಾ ಬೈದ್ಂಡ್. ಜಡ್ತೆ ಮಲ್ತ್‌ದಾನಗ ಆರೋಪಿನ ಪುರಾಪು ತಿಕ್ಕ್‌ದ್ಂಡ್. ಮಾರೇಶ್ ಕೆಂಚಾರ್ಲಹಳ್ಳಿ ಪೊಲೀಸ್ ಸ್ಟೇಷನ್‌ಡ್ ಒಯಿಲ್ ಕೊರ್ದಿತ್ತೆ, ಆ ಪ್ರಕಾರ ವಿಜಯ್‌ನ್ ಪೊಲೀಸ್ ಕೈದ್ ಮಲ್ದೆರ್.