Last updated on August 3rd, 2023 at 08:27 pm
ದೇಶೊಡು ಪೆಟ್ರೋಲ್‌ದ ರೇಟ್ 100 ರೂಪಾಯಿರ್ದ್ ತಿರ್ತ ಜಪ್ಪಂದೆ ಮಸ್ತ್ ಸಮೆ ಕರೀಂಡ್. ಇಂಚ ಇಪ್ಪುನಗ ಕೇಂದ್ರ ಸಚಿವೆ ನಿತಿನ್ ಗಡ್ಕರಿ ಪನ್ತಿನ ಒಂಜಿ ಪಾತೆರ ಬಾರಿ ಸುದ್ದಿ ಆವೊಂದುಂಡು. ಪೆಟ್ರೋಲ್ ಲೀಟರ್‌ಗ್ 15 ರೂಪಾಯಿಗ್ ಜಪ್ಪುನ ದಿನ ದೂರ ಇಜ್ಜಿ ಪಂದ್ ಆರ್ ಪಂಡೆರ್.
ಈ ಪಾತೆರೊದ ಪಿರವುದ ಲಾಜಿಕ್‌ನ್ ವಿವರಿತೊಂದು ಆರ್ ರೈತೆರ್ ನುಪ್ಪು ಕೊರ್ಪುನಕುಲು ಮಾತ್ರ ಆವಂದೆ, ಇಂಧನ ಕೊರ್ಪಿನಕುಲ್ಲಾ ಆವೊಡೂಂದ್ ಸರ್ಕಾರ ಬಯಕುಂಡು ಪಂದ್ ಪಂಡೆರ್.
ರಾಜಸ್ಥಾನೊದ ಪ್ರತಾಪಗಢೊಟು ಇನಯೊಡು ಪಾತೆರ್ನ ಗಡ್ಕರಿ, “ರೈತೆರ್ ಅನ್ನದಾತೆರ್ ಮಾತ್ರ ಅತ್ತ್, ‘ಎನರ್ಜಿದಾತೆರ್’ ಲಾ ಆವೊಡು ಪನ್ಪಿನವು ಎಂಕ್ಲೆನ ಸರ್ಕಾರೊದ ಆಶಯ. ನನ ದುಂಬಗ್ ಮಾತ ಗಾಡಿಲು ರೈತೆರ್ ಉಂಡುಮಲ್ದಿನ ಎಥೆನಾಲ್ಡ್ ಬಲಿಪುವ. ಸರಾಸರಿ ಶೇ.60 ಎಥೆನಾಲ್ ಬೊಕ್ಕ ಶೇ.40ದಾತ್ ಕರೆಂಟ್ ಗೆತೊಂಡ, ಪೆಟ್ರೋಲ್ ಪ್ರತಿ ಲೀಟರ್‌ಗ್ 15 ರೂಪಾಯಿ ರೇಟ್‌ಡ್ ತಿಕ್ಕುಂಡು. ಅಪಗ ಜನೊಕುಲೆಗ್ ನೆತ್ತ ಲಾಭ ತಿಕ್ಕುಂಡು. ಮಾಲಿನ್ಯ ಬೊಕ್ಕ ಪಿದಯಿ ದೇಶೊಲೆರ್ದ್ ಪೆಟ್ರೋಲಿಯಂ ಗೆತೊನುನಲಾ ಕಮ್ಮಿ ಆಪುಂಡು” ಪಂದ್ ಪಂಡೆರ್.
ದೇಶೊಡು 16 ಲಕ್ಷ ಕೋಟಿ ರೂಪಾಯಿ ಮೌಲ್ಯೊದ ಪೆಟ್ರೋಲಿಯಮ್ ನ್ ಪಿದಯಿ ದೇಶೊಲೆರ್ದ್ ಗೆತೊನುವ. ನನದ ದಿನೊಟು ಈ ಕಾಸ್ ರೈತೆರೆ ಇಲ್ಲಗ್ ಪೋಪುಂಡು. ಆಟೋ ರಿಕ್ಷಾರ್ದ್ ಪತ್ತಿನ ಕಾರ್ ಮೂಟ್ಟಲಾ ಮಾತ ಗಾಡಿಲು ಎಥೆನಾಲ್ಡ್ ಬಲಿಪುನ. ಭಾರತೊದ ಪೆಟ್ರೋಲಿಯಂ ಇಂಪೋರ್ಟ್ ಕಮ್ಮಿ ಆಪುಂಡು. ರೈತೆರೆ ಪೊಲಿ ಎರ್ಕುಂಡು. ಈ ರಿತಿಟ್ ಕರಿನ ಒರ್ಮ್ಬ ವರ್ಸೊರ್ದಿಂಚಿ ನರೇಂದ್ರ ಮೋದಿ ಸರ್ಕಾರ ಅವೇತೋ ಬುಲೆಚ್ಚಿಲ್‌ದ ಬೇಲೆಲೆನ್ ಮನ್ಪಾದ್ ದೇಶೊನು ಎದುರು ಕೊನೊವೊಂದುಲ್ಲೆರ್ ಪಂದ್ ಪಂಡೆರ್.