Last updated on August 3rd, 2023 at 08:27 pm
ಫೇಸ್ಬುಕ್ಡ್ ಹಿಂದೂ ಧರ್ಮೊಗು ಅವಹೇಳನ ಮಲ್ಪುನ ಲೆಕಂದಿನ ಪೋಸ್ಟ್ ಶೇರ್ ಮಲ್ದಿನಾಯನ ಮಿತ್ತ್ ಸುಮೊಟೋ ಕೇಸ್ ದಾಖಲಿತ್‌ದ್ ಶಿರ್ವ ಪೊಲೀಸೆರ್ ಕೈದ್ ಮಲ್ದೆರ್. ಬೆಳಪು ನಿವಾಸಿ ಮೊಹಮ್ಮದ್ ಸಿದ್ದೀಕ್ (48) ಕೈದಾತಿನ ಆರೋಪಿ.
ಇಂಚಿಪ್ಪೊಗು ಮಧ್ಯಪ್ರದೇಶೊಡು ಬಿಜೆಪಿ ನಾಯಕೆ ಬುಡಕಟ್ಟ್ ಜನಾಂಗೊಗ್ ಸೇರ್ದಿನ ಒರ್ಯನ ತರೆಕ್ ಪಡಿಕೆ ಮೈಪುನ ವಿಡಿಯೋ ವೈರಲ್ ಆದಿತ್ತ್ಂಡ್. ಇಂದೆಕ್ ಒಮ್ಮುನಂಚಿನ ಹಿಂದೂ ಸಮುದಾಯೊಗು ಸೇರ್ದಿನ ಒರಿ ತನ್ನ ಎದುರು ಕುಲ್ದಿನ ಕುಡೊರ್ಯನ ತರೆಕ್ ಪಡಿಕೆ ಮೈಪುನಂಚಿನ ಚಿತ್ರೊ ಫೇಸ್ಬುಕ್ಡ್ ಅನ್ಸಾರ್ ರೋಯಲ್ ಪನ್ಪಿ ಪುದರ್‌ದ ಫೇಸ್‌ಬುಕ್ ಅಕೌಂಟ್‌ರ್ದ್ ಪೋಸ್ಟ್ ಆದಿತ್ತ್ಂಡ್. ಅವೆನ್ ಆರೋಪಿ ಮೊಹಮ್ಮದ್ ಸಿದ್ದೀಕ್ ತನ್ನ ಫೇಸ್‌ಬುಕ್ ಅಕೌಂಟ್‌ಡ್ “ಹಿಂದೂ ಸಂಸ್ಕೃತಿ ಬೋಡಾ? ನಾಗಪುರದ ಹಿಂದುತ್ವ ಸಂಸ್ಕೃತಿ ಬೋಡಾ” ಪನ್ಪಿನ ತರೆಬರವು ಕೊರ್ದು ಶೇರ್ ಮಲ್ದಿತ್ತೆ. ಬೇತೆ ಸಮುದಾಯೊಗು ಸೇರ್ದಿನಾಯೆ ಒರಿ ಮದ್ಯಪ್ರದೇಶೊದ ನಡಕೆಗ್ ಹಿಂದೂ ಧರ್ಮೊನು ಲಿಂಕ್ ಮಲ್ತ್‌ದ್ ಬೊರ್ಚಂದಿನ ಲೆಕ ಪೋಸ್ಟ್ ಮಲ್ದಿನವು ಸಮಾಜೊಡು ಹಿಂದೂ ಬೊಕ್ಕ ಮುಸ್ಲಿಂ ಸಮುದಾಯೊಲೆನ ನಡುಟು ಪಗೆತ ಭಾವನೆ ಉಂಡು ಮನ್ಪುಂಡು, ಸಮಾಜೊಡು ಅಶಾಂತಿ ಉಂಡು ಮನ್ಪುನ ಪುನೆಪು ಪನ್ಪಿ ದಿಟ್ಟಿಡ್ ಸಿದ್ದೀಕ್‌ನ ಮಿತ್ತ್ ಶಿರ್ವ ಸ್ಟೇಷನ್‌ಡ್ ಸುಮೊಟೋ ಪ್ರಕರಣ ದಾಕಲಾತ್ಂಡ್.