Last updated on August 3rd, 2023 at 08:26 pm
ಜುಲೈ 8ದಾನಿ ಪೇಂಟೆದ ಮುಲಿಬಿತ್ತಿಲ್ (ಕನ್ನಡ: ಮುಳಿಹಿತ್ಲು) ಡ್ ಬಡಕಾಯಿ ಭಾರತ ಮೂಲೊದ 35 ವರ್ಸ ಪ್ರಾಯೊದ ಗುಜ್ವಾನ್ ಅಲಿಯಾಸ್ ಜಗು ಪನ್ಪಿನಾಯನ್ ಕೆರ್ತಿನ ಆರೋಪಡ್ ಪಾಂಡೇಶ್ವರದ ತೌಸೀಫ್ ಹುಸೇನ್ (32) ಪನ್ಪಿನಾಯನ್ ತೆಂಕಾಯಿ ಕುಡ್ಲ ಪೊಲೀಸೆರ್ ಕೈದ್ ಮಲ್ದೆರ್.
ಗುಜ್ವಾನ್ ಹುಸೇನ್‌ನ ಮುಶುಪಾ ಜನರಲ್ ಸ್ಟೋರ್‌‌ಡ್ ಬೇಲೆ ಮಲ್ತೊಂದಿತ್ತೆ ಪಂದ್ ಪೊಲೀಸೆರ್ ತೆರಿಪಾದೆರ್. ಇರ್ವೆರೆಗ್ಲಾ ಅಪಗಪಗ ಒವ್ವಾ ಇಸಯೊಡು ಲಡಯಿ ಆವೊಂದಿಪ್ಪೆದ್ಂಡ್.
ಸನಿಯಾರ ಕಾಂಡೆ ಅಂಗಡಿದ ಗೋಡೌನ್‌ಡ್ ಗುಜ್ವಾನ್ ಬೊಕ್ಕ ಹುಸೇನ್ ಎದುರೆದುರು ಪಾತೆರೊಂದು ಲಡಯಿಗ್ ಜತ್ತ್‌ದೆರ್. ಹುಸೇನ್ ಗುಜ್ವಾನ್‌ಗ್ ಒಂಜಿ ಬಾಟ್ಲಿಡ್ ಆಕ್‌ದೆ ಬೊಕ್ಕ ಅವ್ವೇ ಬೆಚ್ಚೊಡು 8.30 ತ ಅಂದಾಜಿಗ್ ಜೂವೊಪ್ಪ ಸೂ ಕೊರ್ತೆ.
ಸೂ ಕೊರ್ದು ಒಂತೆ ತೈರ್ನೇ ಸೂ ತೆಕ್ಕಾದ್, ಮಧ್ಯಾಹ್ನ 1.30 ಮುಟ್ಟ ಗುಜ್ವಾನ್‌ನ್ ಗೋಡೌನ್‌ಡೇ ಉಂತಾದೆ ಪಂದ್ ಪೋಲೀಸೆರ್ ತೆರಿಪಾದೆರ್. ಮದ್ಯಾನ ಗುಜ್ವಾನ್‌ನ್ ಆಸ್ಪತ್ರೆಗ್ ಸೇರಾಯೆರ ಹುಸೇನ್ ಬರಿತಿಲ್ಲದಕಲೆಗ್ ಕಾಲ್ ಮಲ್ತ್‌ದ್ ಗುಜ್ವಾನ್(ಜಗು) ಗ್ ಕರೆಂಟ್ ಶಾಕ್ ಆಕ್‌ದ್ ಜೂವ ಪೊತ್ತುದ್ ಪೋತುಂಡುಂದ್ ಪನ್ತೆ.
ಬರಿತಿಲ್ಲದಕ್ಲೆನ ಸಕಾಯೊಡು ಗುಜ್ವಾನ್‌ನ್ ವೆನ್ಲಾಕ್ ಆಸ್ಪತ್ರೆಗ್ ಲೆತೊಂದು ಪೋತೆ. ಆಂಡ ಕಾಂಡೆನೇ ಪೊತ್ತುದಿನ ಜೂವ ಆಸ್ಪತ್ರೆಡ್ ತೀರ್ದ್ಂಡ್.
ಪೊತ್ತುದಿನ ಗಡಿಕ್ಲೆನ ಸ್ವರೂಪೊನು ತೂದು, ಹುಸೇನ್‌ನ ನಡಕೆಲೆನ್ ತೂದು ಅಂಚೆನೇ ಪ್ರತ್ಯಕ್ಷದರ್ಶಿಲೆನ ಪಾತೆರೊಲೆನ ಆಧಾರೊಡು ಪೋಲೀಸೆರ್ ಜಡ್ತೆ ಮಲ್ತಿನಗ ಹುಸೇನ್‌ನ ಮಿತ್ತ್ ಸಂಶಯ ಬೈದ್ಂಡ್. ಪೋಲೀಸೆರ್ ಹುಸೇನ್‌ನ ವಿಚಾರಣೆ ಮಲ್ತ್ ಕೇನ್ನಗ ಹುಸೇನ್ ಯಾನೇ ಸೂ ಕೊರ್ತಿನ ಪಂಡ್‌ದ್ ಒತ್ತೊಂದೆ. ಅಂಚಾದ್ ಪಾಂಡೇಶ್ವರ ಪೊಲೀಸೆರ್ ಕೈದ್ ಮಲ್ದೆರ್.