Last updated on August 3rd, 2023 at 08:23 pm
ಕರ್ನಾಟಕ ರಾಜ್ಯೊಡು ವಿಧ್ವಂಸಕ ಕಜ್ಜ ಮಲ್ಪರೆ ಬೇಪು ಪಾಡೊಂದು ತಿಕ್ಕುದ್ ಬೂರಿನ ಐನ್ ಲಷ್ಕರ್-ಎ-ತೋಯ್ಬಾದ ಉಗ್ರಗಾಮಿಲೆಡ್ ಒರಿಯನ ಇಲ್ಲಡ್ 4 ಸಜೀವ ಹ್ಯಾಂಡ್ ಗ್ರೆನೇಡ್ ತಿಕ್ಕ್ಂಡ್. ಉಂದು ತೂನಗ ಈ ಉಗ್ರೆರ್ ಬಾರೀ ಮಲ್ಲ ದಾಳಿ ಮಲ್ಪರೆ ಪಿದಡ್ದಿತ್ತೆರ್ ಪನ್ದ್ ತೆರಿಯುಂಡು.
ರಾಜ್ಯೊಡು ಬಯೋತ್ಪಾದಕ ಕೃತ್ಯ ಮಲ್ಪರೆ ತನ್ನ ಪಾಸಾಡಿಲೆಗ್ ಶಂಕಿತ ಉಗ್ರೆ ಮಹಮ್ಮದ್ ಜುನೈದ್ ಕಾಲಿ ಟ್ರೈನಿಂಗ್ ಮಾತ್ರ ಅತ್ತಂದೆ ಪಿಸ್ತೂಲ್ ಬೊಕ್ಕ ಗ್ರನೇಡ್ಲಾ ಸಪ್ಲೈ ಮಲ್ತೊಂದಿತ್ತೆ. ಅವೆನ್ ಬೆಂಗಳೂರುದ ಕೋಡಿಹಳ್ಳಿದ ಮೆಯಿನ್ ರೋಡುದ ಭದ್ರಪ್ಪ ಲೇಔಟುಡು ಉಪ್ಪುನ ಶಂಕಿತ ಉಗ್ರೆ ಜಾಹೀದ್ ತಬ್ರೇಜ್ ತನ್ನ ಇಲ್ಲಡ್ ದೀವೊಂದಿತ್ತೆ. ಆ ಇಲ್ಲದ ಮಿತ್ತ್ ದಾಳಿ ಮಲ್ಪುನಗ ಉಂದು ಸಿಸಿಬಿ ಪೋಲೀಸೆರೆಗ್ ತಿಕ್ಕ್ಂಡ್.
ಜಾಹಿದ್ ನ ಇಲ್ಲಗ್ ಪಿದಯೂರುಡು ಮಂಡೆದೆಂಗಾದುಪ್ಪುನ ಜುನೈದ್ ತನ್ನ ಕಾಂಟ್ಯಾಕ್ಟ್ ಲೆಡ್ ಈ ಗ್ರೇನೇಟ್ ಸಪ್ಲೈ ಮಲ್ದೆ ಪನ್ದ್ ಬೆಂಗಳೂರುದ ಜಂಟಿ ಪೋಲೀಸ್ ಆಯುಕ್ತೆರಾಯಿನ ಡಾ.ಎಸ್ ಡಿ ಶರಣಪ್ಪ ಪನ್ಡೆರ್.
ಹೆಬ್ಬಾಳ ಕೈತಲ್ದ ಸುಲ್ತಾನ್ ಪಾಳ್ಯದ ಸೈಯದ್ ಸುಹೇಲ್ ಖಾನ್, ಪುಲಿಕೇಶಿ ನಗರದ ಮೊಹಮ್ಮದ್ ಫೈಜಲ್ ರಬ್ಬಾನಿ, ಕೋಡಿಹಳ್ಳಿದ ಮಹಮ್ಮದ್ ಉಮರ್, ಜಾಹೀದ್ ತಬ್ರೇಜ್ ಅಂಚೆನೆ ಆರ್.ಟಿ ನಗರದ ಸೈಯದ್ ಮುದಾಸಿರ್ ಪಾಷಾನ್ ಬುದಾರ ಕೈದ್ ಮಲ್ತೆರ್. ಮೊಕಲೆರ್ದ್ 7 ನಾಡ ಪಿಸ್ತೂಲ್, 45 ಸಜೀವ ಗುಂಡುಲು, ವಾಕಿಟಾಕಿ, ಡ್ರಾಗರ್ ಅಂಚೆನೆ 12 ಮೊಬೈಲ್ ವಶ ಮಲ್ದೆರ್.
ಬೆಂಗಳೂರುಡು ಉಗ್ರೆರ್ ತಿಕ್ಕಿನ ಬೆರಿಟೇ, ಬೆಂಗಳೂರುಡು ದೆಂಗ್ ದ್ ಕುಲ್ದ್ ವಿಧ್ವಂಸಕ ಕೃತ್ಯ ಮಲ್ಪರೆ ಕಾತೊಂದಿಪ್ಪುನ ಉಗ್ರೆರೆನ್ ಬೋಂಟೆ ಮಲ್ಪರೆ ವಿಶೇಷ ತಂಡೊನು ಪೋಲಿಸ್ ಇಲಾಖೆ ಮಲ್ದ್ಂಡ್.