Last updated on August 3rd, 2023 at 08:23 pm
ಮಂಗಳೂರು ವಿಶ್ವವಿದ್ಯಾಲಯ 3 ವರ್ಸದ ದುಂಬು ಪದವಿ ಕಾಲೇಜಿಲೆಡ್ ತುಳುನು ಒಂಜಿ ಬಾಸೆಯಾದ್ ಕಲ್ಪಾವುನ ನಿರ್ಣಯೊನು ಒಪ್ಪಿದಿತ್ತ್ಂಡ್. ಆಂಡ ಇದಮುಟ್ಟ ತುಳುನಾಡೊರ್ಮೆ ಉಪ್ಪುನ 200 ರ್ದ್ ಮಿಕ್ಕಿನ ಕಾಲೇಜಿಲೆಡ್ ಕಾಲಿ ರಡ್ಡ್ ಕಾಲೇಜ್ ಮಾತ್ರ ಉಂದೆಕ್ ಒಪ್ಪಿದ್ ತುಳು ಕಲ್ಪಾವೊಂದುಂಡು. ಬೆದ್ರದ ಆಳ್ವಾಸ್ ಕಾಲೇಜ್ ಅಂಚೆನೆ ಕುಡ್ಲ ರಥಬೀದಿದ ದಯಾನಂದ ಪೈ ಸತೀಶ್ ಪೈ ಸರಕಾರಿ ಪ್ರಥಮ ದರ್ಜೆ ಕಾಲೇಜ್‌ಡ್ ಮಾತ್ರ ತುಳುನು ಒಂಜಿ ಬಾಸೆಯಾದ್ ಕಲ್ಪಾವೊಂದುಲ್ಲೆರ್.
ಬೇತೆ ಕಾಲೇಜ್‌ಲೆನ ಆಡಳಿತ ಮಂಡಳಿಲು ಒಂಜೊಂಜಿ ನೆವನ ಕೊರೊಂದು ಜಾರೊಂದುಲ್ಲೆರ್, ಕೆಲವೆರ್ ತುಳುಟು ಅಂಚಿನ ದಾದ ಉಂಡು ಪನ್ದ್ ತಾತ್ಸಾರಲಾ ಮಲ್ದೆರ್ಗೆ.
ಕುಡ್ಲ ವಿಶ್ವವಿದ್ಯಾಲಯ ಕಾಲೇಜಿಡ್ ಎಂ.ಎ ತುಳು ಮಲ್ತಿನಕುಲು ಮಸ್ತ್ ಕಾಲೇಜಿಲೆನ ಆಡಳಿತ ಮಂಡಳಿಲೆಗ್ ಪೋದು ಮನವಿ ಕೊರ್ದು ತುಳುನು ಒಂಜಿ ಬಾಸೆಯಾದ್ ಕಲ್ಪಾವುನ ಅವಕಾಶೊ ಕೊರೊಡು ಪನ್ದ್ ಕೇನೊಂದುಲ್ಲೆರ್. ಮಂಗಳೂರು ವಿಶ್ವವಿದ್ಯಾಲಯದ ವತಿರ್ದೇ ತುಳುನು ಗೋಡ್ಯಾಲೆ ಪನ್ದ್ ಏತೋ ಸಲ ಮನವಿ ಮಲ್ದ್ಂಡಲಾ ಕಾಲೇಜ್‌ಲು ಉಂದೆಕ್ ಒತ್ತೊಂದಿಜ್ಜ. ಕನ್ನಡ, ಸಂಸ್ಕೃತ, ಹಿಂದಿ ಉಪ್ಪುನಗ ಕುಡ ತುಳು ದಾಯೆಗ್? ತುಳು ಕಲ್ಪಾವರೆ ಕುಡ ಬೇತೆನೆ ಲೆಕ್ಚರರ್‌ನಕಲೆನ್ ಮಲ್ತ್ ಅಕಲೆಗ್ ಪಡಿ ಕೊರೊಡು ಇಂಚ ನೆವನೊಲು ಉಲ್ಲ.
ತುಳುನಾಡ್‌ಗ್ ಉಪ್ಪುನ ಎಲ್ಯ ವ್ಯಾಪ್ತಿಡ್ 1% ಕಾಲೇಜಿಡ್ಲಾ ತುಳುನು ಕಲ್ಪುನ ಅವಕಾಶೊ ಇಜ್ಜಿ, ತುಳು ಮಣ್ಣ್ ಡ್ ತುಳುವೆರೆನ ಬೆರಿಬಲೊಟು ಬುಲೆಯಿನ ಕಾಲೇಜಿಲು ತುಳುಕು ಕೊರೊಡಾಯಿನ ಒಂಜಿ ಎಲ್ಯ ಮಾನಾದಿಗೆನ್ಲಾ ಕೊರಿಯರೆ ಉಮೇದ್ ತೂಪಾವೊಂದಿಜ್ಜೆರ್ ಪನ್ಪಿನ ಬಾರೀ ಬೆಸರ್‌ದ ಸಂಗತಿ.