ತುಳುನಾಡ್‌ಗ್ ತಿರ್ಗರೆ ಬರ್ಪಿನಕುಲು ರೂಲ್ ಫಾಲೋ ಮಲ್ತಿಜೆರ್ಡ ಅಕಲೆನ ಮಿತ್ತ್ ಕಾನೂನು ಕ್ರಮ : ಡಿ.ಸಿ

Last updated on August 3rd, 2023 at 08:21 pm

ತುಳುನಾಡ್ ಕರಾವಳಿಡ್ ಉಪ್ಪುನೆರ್ದಾವರ ಮುಲ್ಪ ಮರಿಯಲೊಡು ಗುಡ್ಡೆ ಜರಿಯುನ, ಬೊಲ್ಲ ಏರುನ, ಕಾತ್ ದಡೀಟ್ ಬೀಜುನಂಚಿನ ಸಾಧ್ಯತೆಲು ಮಸ್ತ್ ಉಪ್ಪುವ ಪನ್ದ್ ಕುಡ್ಲದ ಡಿಸಿ ಮುಲ್ಲೈ ಮುಗಿಲನ್ ಪನ್ಡೆರ್.

ಕರಿನ ರಡ್ಡ್ ವಾರೊಡು ಪ್ರಾಕೃತಿಕ ವಿಕೋಪೊಗು 7 ಸಾವು ಆತ್ಂಡ್, ಅವೆಟ್ಲಾ 5 ಜನ ಮುರ್ಕುದು ತೀರಿಯೆರ್. ಮರಿಯಲೊಡು ಇಂಚಿನ ನಡಕೆಲು ನಡಪಂದಿಲೆಕ್ಕ ಬೋಡಾಪಿನ ಕ್ರಮ ದೆತೊನರೆ ಸರಕಾರ ಜಿಲ್ಲಾ ಆಡಳಿತೊಗು ನಿರ್ದೇಶನ ಕೊರ್ತೆರ್.

ಪಿದಯಿರ್ದ್ ಇಡೆ ತಿರ್ಗರೆ ಬರ್ಪಿನಕುಲು ಜಾಗ್ರತೆಡ್ ಉಪ್ಪೊಡು. ಬೀಚ್ ಬೊಕ್ಕ ದೇವಲ್ಯೊಲೆಗ್ ಎಂಕುಲು ಹೋಂ ಗಾರ್ಡ್ ನಕಲೆನ್ ಕಡಪುಡುದ, ಅಲ್ಪ ತಿರ್ಗರೆ ಬರ್ಪಿನಕುಲು ನೀರ್ ಗ್ ಜಪ್ಪಂದಿಲೆಕ್ಕ ಮೊಕುಲು ತಡೆಪುವೆರ್. ಟ್ರೇಕ್ಕಿಂಗ್ ಮಲ್ಪುನೆಕ್ಲಾ ನಿರ್ಬಂದ ಉಂಡು. ಏರಾಂಡಲ ಈ ನಿಯಮೊಲೆನ್ ಮೀರ್ದ್ ನಡತೆರ್ಡ ಅಕಲೆನ ಮಿತ್ತ್ ಕಾನೂನು ಕ್ರಮ ದೆತೊನೊಡಾಪುಂಡು. ಜಿಲ್ಲೆಡ್ 87 ಜರಿಯುನ ಗುಡ್ಡೆದಂಚಿನ ಜಾಗೊಲು ಅಂಚೆನೆ 18 ಬೊಲ್ಲ ಏರುನ ಜಾಗೊಲು ಉಲ್ಲ. ತಿರ್ಗರೆ ಬರ್ಪುನಕುಲು ಪಟ ದೆಪ್ಪರೆ ನೀರ್ ಗ್ ಜಪ್ಪರೆ ಬಲ್ಲಿ ಪನ್ದ್ ಎಚ್ಚರ್ಗೆ ಕೊರೊಂದುಲ್ಲ ಪಂಡೆರ್.