Last updated on August 8th, 2023 at 08:39 am
ಶಿಕ್ಷಕೆರ್ ಕಮ್ಮಿ ಇತ್ತಿನೆರ್ದಾವರ ಶಾಲೆ ಸುರುವಾದ್ ಮೂಜೇ ತಿಂಗೊಲುಗು ಶಾಲೆದ ಮುಖ್ಯಮಂತ್ರಿ ಅಂಚೆನೇ ಮಂತ್ರಿಮಂಡಲೊದ ಮಾತಾ ಸಚಿವರ್ಲಾ ಕುಡೊಂಜಿ ಶಾಲೆಗ್ ಸೇರೊಡಾದ್ ಬತ್ತಿನ ಕತೆ!
ಉ್ಂದು ಸುಳ್ಯ ತಾಲೂಕ್‌ದ ಪೆರುವಾಜೆ ಗ್ರಾಮೊದ ಮುಕ್ಕೂರು ಸರಕಾರಿ ಪೆರಿಯ ಪ್ರಾಥಮಿಕ ಶಾಲೆದ ಕತೆ. ಉ್ಂದು ಕಾಲಿ ಒಂಜಿ ಶಾಲೆದ ಕತೆ ಅತ್ತ್. ಶಿಕ್ಷಕೆರ್ ಕಮ್ಮಿ ಇಪ್ಪುನ ಅವೇತೋ ಶಾಲೆಲೆನ ಸ್ಥಿತಿಕ್ ಉ್ಂದೊಂಜಿ ಉದಾರ್ಮೆ.
ಮುಕ್ಕೂರು ಸರಕಾರಿ ಶಾಲೆಡ್ 1ರ್ದ್ 8ನೇ ಕ್ಲಾಸ್ ಮುಟ್ಟ ಕಲ್ಪುನ ಅವಕಾಶ ಉಂಡು. ಈ ಸರ್ತಿ ದಾಕಲಾತಿನ ಒಟ್ಟು ವಿದ್ಯಾರ್ಥಿಲು ಕಾಲಿ 45. ಅವೆಟ್ಲಾ ಎಣ್ಮನೇ ಕ್ಲಾಸ್‌ಗ್ 5 ಜನ. ಬೇತೆ ಬೇತೆ ನೆವನೊಲೆರ್ದಾವರ ಎಣ್ಮನೇ ಕ್ಲಾಸ್‌ಗ್ ಪಾಠ ಮನ್ಪೆರ ಶಿಕ್ಷಕೆರಿಜ್ಜಿರ್.
ಶಾಲೆ ಸುರು ಆದ್ 3 ತಿಂಗೊಲು ಕರೀಂಡ್. ಶಿಕ್ಷಕೆರ್ ಕಮ್ಮಿ ಉಲ್ಲೆರ್ ಪನ್ಪಿ ಒಲವು ತಿಕ್ಕಿನ ಸುಳ್ಯ ಕ್ಷೇತ್ರೊದ ಶಿಕ್ಷಣಾಧಿಕಾರಿ ರಮೇಶ್‌ ಮುತಾಲಿಕೆಡ್ ಒಂಜಿ ಕೂಟ ಆಗಸ್ಟ್ 3ಕ್ ಶಾಲೆಗೆ ಬತ್ತಿತ್ತ್ಂಡ್. 8ನೇ ಕ್ಲಾಸ್‌ದ ಜೋಕುಲೆಗ್ ಪಾಠ ಮನ್ಪೆರೆ ಶಿಕ್ಷಕೆರ್, ಪ್ರಯೋಗಾಲಯೊದ ವ್ಯವಸ್ಥೆ ಇಜ್ಜಂದಿನ ಅಕಲೆನ ಗೇನೊಗು ಬೈದ್ಂಡ್. ಬೇತೆ ಶಿಕ್ಷಕೆರೆನ ವ್ಯವಸ್ಥೆ ಮನ್ಪೆರಾವಂದಿನೆರ್ದಾವರ 8ನೇ ಕ್ಲಾಸ್‌ದ ಮಾತಾ ವಿದ್ಯಾರ್ಥಿಲೆನ್ ಮುಟ್ಟದ ಶಾಲೆಗ್ ಸೇರಾಯೆರ ಬಿಇಒ ಸೂಚನೆ ಕೊರ್ತೆರ್. ಆ ಪ್ರಕಾರ ಎಸ್‌ಡಿಎಂಸಿ ಅಧ್ಯಕ್ಷೆರ್ ಜೋಕುಲೆನ ಇಲ್ಲಡೆ ತೆರಿಪಾದೆರ್. ಆಗಸ್ಟ್ 4ಕ್ 5 ಜೋಕುಲೆಗ್ಲಾ ಟಿ.ಸಿ. ಕೊರ್ದು ಬೆಳ್ಳಾರೆ ಕೆಪಿಎಸ್‌ಡ್ ಸೇರ್ಪಾದೆರ್.
ಬೇತೆ ಶಾಲೆಗ್ ಸೇರ್ದಿನ ಈ 5 ಜೋಕುಲ್ಲಾ ಶಾಲೆದ ಮಂತ್ರಿಮಂಡಲೊಡು ಇತ್ತ್‌ದ್, ಇತ್ತೆ ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ, ಶಿಸ್ತು ಮಂತ್ರಿ, ಶಿಕ್ಷಣ ಮಂತ್ರಿ ಅಂಚೆನೇ ಸ್ವಚ್ಛತಾ ಮಂತ್ರಿಲಾ ಶಾಲೆ ಬುಡ್ಪಿಲೆಕ್ಕಾತ್ಂಡ್.
ಸಂಸದೆ ನಳಿನ್ ಕುಮಾರ್ ಕಟೀಲ್ ಕಲ್ದಿನ ಈ ಶಾಲೆಗ್ ನನ ಐನ್ ವರ್ಸೊಡು 100 ವರ್ಸ ದಿಂಜುಂಡು.