Last updated on August 7th, 2022 at 07:29 pm
ಉಂದು 2013ಟ್ಟ್ ನಡತಿನ ವಿಷಯ. 7 ವರ್ಷದ ಪೊಣ್ಣು ಬಾಲೆ ಮುಂಬೈದ ಅಂಧೇರಿಡ್ ತನ್ನ ಪಲಯನೊಟ್ಟುಗು ಶಾಲೆಗ್ ಪೋವೊಂದಿತ್ತೊಲು. ಅದಗ ಅಕಲೆಗ್ ಒಂಜಿ ಎಲ್ಯ ವಿಷಯೊಡು ಲಡಯಿ ಆಪುಂಡು. ಅಂಚ ಕೋಪೊಡು ಅಲೆನ್ ಶಾಲೆದಲ್ಪ ಬುಡ್ದ್ ಪಲಯೆ ಇಲ್ಲಗ್ ಬತ್ತೆ. ಶಾಲೆದಲ್ಪ ಪೊಣ್ಣು ಒರ್ತೇ ತಿರ್ಗೊಂದಿತ್ತಿನೆನ್ ಜೋಸೆಫ್ ಡಿಸೋಜಾ ಪನ್ಪಿನಾಯೆ ತೂಪೆ. ಜೋಸೆಫ್ ಡಿಸೋಜಾ ಬೊಕ್ಕ ಸೋನಿಗ್ ಮದ್ಮೆ ಆದ್ ಮಸ್ತ್ ವರ್ಷ ಆಂಡಲಾ ಜೋಕುಲಾದಿಪ್ಪುಜಿ. ತನ್ಕುಲೆಗ್ ಒಂಜಿ ಬಾಲೆ ಬೋಡು ಪನ್ದ್ ಮಸ್ತ್ ಅಂಗಲಾಪು ಬುಡೊಂದಿತ್ತೆರ್. ಈ ಪೊಣ್ಣನ್ ತೂಯಿನೇ ಜೋಸೆಫ್ ಮೊಲೆನ್ ತನ್ನ ಇಲ್ಲಗ್ ಲೆತೊಂದು ಪೋಪೆ.
ಪೊಣ್ಣು ಇಲ್ಲಗ್ ಬರಂದಿನ ತೂದು ಇಲ್ಲದಕುಲು ಡಿ.ಎನ್ ನಗರ್ ಪೋಲಿಸ್ ಸ್ಟೇಶನ್’ಡ್ ದೂರು ಕೊರ್ಪೆರ್. ಅದಗ ಎಎಸ್ಐ ಆದಿತ್ತಿನ ರಾಜೇಂದ್ರ ಬೋಸ್ಲೆ ಈ ಕೇಸ್ ದೆತೊನ್ವೆರ್. ಬೋಸ್ಲೆ 2008ರ್ದ್ 2015 ಮುಟ್ಟ ಒಟ್ಟು 166 ಇಂಚ ತತ್ತ್ ಪೋತಿನ ಪೊಣ್ಣುಲೆನ ಕೇಸ್’ನ್ ತೂವೊಂದೆರ್, ಅವೆಟ್ ಅರೆಗ್ 165 ಕೇಸ್ ನಾಡ್ ಪತ್ತರೆ ಆದಿತ್ತ್ಂಡ್. ಆಂಡ ಈ ಪೊಣ್ಣನ ಕೇಸ್ ಪತ್ತರೆ ಆದಿತ್ತ್’ಜಿ.
ಇಲ್ಲದಕುಲು ಪೋಲಿಸ್ ಕಂಪ್ಲೇಂಟ್ ಕೊರಿನ ತೆರಿವ ಡಿಸೋಜೆ ನನ ಮೊಲೆನ್ ನೆಟೆನೇ ದೀಂಡ ಸಮಸ್ಯೆ ಆವು ಪನ್ದ್ ಅಲೆನ್ ತನ್ನ ಮೂಲ ಆಯಿನ ಕರ್ನಾಟಕದ ರಾಯಚೂರುಗು ಹಾಸ್ಟೆಲ್’ಗ್ ಪಾಡುವೆ. ಇಂಚ ಒಂತೆ ವರ್ಸ ಆಯಿನೆ 2016ಕ್ಕ್ ಡಿಸೋಜಾನಕ್ಲೆಗ್ ಅಕ್ಲೆನವೇ ಬಾಲೆ ಪುಟ್ಟುಂಡು ಅದಗ ಅಲೆನ್ ಕುಡ ಪಿರ ಅಂಧೇರಿಗ್ ಲೆಪುಡಾವೆರ್. ರಡ್ಡ್ ರಡ್ಡ್ ಜೋಕುಲೆನ್ ತಾಂಕರೆ ಬಂಗ ಆಪುಂಡು ಪನ್ದ್ ಪೊಣ್ಣನ ಶಾಲೆ ಬುಡ್ಪಾದ್ ಅಲ್ಪಲ್ಪ ಬೇತಕ್ಲೆನ ಇಲ್ಲಲೆಡ್ ಜೋಕುಲೆನ್ ತೂಪಿನ ಬೇಲೆಗ್ ಪಾಡುವೆರ್. ಕೆಲವೊರ ಇಲ್ಲಗ್ ಪರ್ದ್ ಬರೊಂದಿತ್ತಿನ ಡಿಸೋಜೆ ನಿನನ್ ಯಾನ್ ಲಕ್ಕಾದ್ ಕಂದಿನಿ ಪನ್ದ್ ಪನೊಂದಿತ್ತೆ ಅಂಚೆನೆ ಡಿಸೋಜಾನ ಬೊಡೆದಿಲಾ ಅಲೆಗ್ ಸಮಾ ನೋಪೊಂದಿತ್ತೊಲು. ಈ ಪೊಣ್ಣಗ್ ಮೊಕ್ಲು ತನ್ನ ಅಪ್ಪೆ ಅಮ್ಮೆ ಅತ್ತ್ ತನ್ನ ಅಪ್ಪೆ ಅಮ್ಮನ್ ನಾಡೊಡು ಪನ್ದ್ ಆಪುಂಡು ಆಂಡ ಎಂಚ ಪನ್ದ್ ತೆರಿಯುಜಿ.
ಕಡೆಗ್ ಪೊಣ್ಣು ಬಾಲೆ ತೂವೊನರೆ ಪೋಪಿನ ಇಲ್ಲದ ಬೇಲೆದ ಪೊಂಜೊವು ಒಂಜಿ ಈ ಪೊಣ್ಣನ ಕತೆ ತೆರಿದ್ ಮೊಲೆಗ್ ಸಕಾಯ ಮಲ್ಪೊಡು ಪನ್ದ್ ಪಿದಡ್ವೊಲು. ಮೊಲೆನ ಕತೆ ಕೇನಿನೆ ಪೊಂಜೊವು ಮೊಲೆನ ಬಗೆಟ್ ಗೂಗಲ್’ಡ್ ನಾಡ್ನಗ ಮೋಲು ಅಪಹರಣ ಆಯಿಬೊಕ್ಕ ಅವೆತ ಬಗೆಟ್ ಬತ್ತಿನ ವರದಿಲು ತಿಕ್ಕುಂಡು. ಅವೆನ್ ತೂಯಿನ ಪೊಣ್ಣಗ್ ಪೂರಾ ನೆಂಪು ಬರ್ಪುಂಡು ತಾನ್ ನೆಟೆನೇ ನೆರೆಕರೆಟ್ ಪುಟ್ಟುದಿನಿ ತನ್ನ ಇಲ್ಲ್ ನೆಟೆನೇ ಉಂಡು ಪನ್ದ್ ನೆಂಪಾಪುಂಡು. ಆಂಡ ಇಲ್ಲ್ ಎಂಚ ನಾಡುನು? ಒರುಂಬ ವರ್ಷೊಡು ಪೂರಾ ಬದಲಾತ್ಂಡ್, ಅಪಹರಣ ಆನಗ ಇತ್ತಿನ ಏಳ್ ವರ್ಷದ ಪೊಣ್ಣು ಅವೆನ್ ಪೂರಾ ಎಂಚ ನೆನಪು ದೀವೊಲು?
ಕಡೆಕ್ ಅಕಲೆಗ್ ಮಿಸ್ಸಿಂಗ್ ಪೋಸ್ಟರ್ ತಿಕ್ಕುಂಡು ಅಲೆನ ಬಗೆಟ್. ಅವೆಟ್ ಐನ್ ನಂಬ್ರ ತಿಕ್ಕುಂಡು ಆಂಡ ಅವೆಟ್ ನಾಲ್ ನಂಬ್ರ ಸರಿ ಉಪ್ಪುಜಿ. ಐನನೇ ನಂಬರ್ ತಾಗುಂಡು. ಅವ್ ಬರಿತಿಲ್ಲದ ರಫೀಕ್ ಪನ್ಪಿನರೆನ ಆದಿಪ್ಪುಂಡು. ರಫೀಕ್’ಗ್ ಪಟ ಪೂರಾ ತೂಯಿನೇ ಪೊಣ್ಣು ಮೋಲೇ ಪನ್ದ್ ತೆರಿದ್ ಬರ್ಪುಂಡು. ಬೊಕ್ಕ ಗುರುವಾರ ಕಾಂಡೆ ಅಕ್ಲು ವೀಡಿಯೋ ಕಾಲ್ ಮಲ್ತ್’ದ್ ಪೊಣ್ಣನ ಅಪ್ಪೆಗ್ ಬೊಕ್ಕ ತಮ್ಮಲೆಗ್ ತೂಪಾವೆರ್. ಅಪ್ಪೆಗ್ ತನ್ನ ಮಗಲ್’ನ ಗುರ್ತ ಆಪುಂಡು. ಆನಿಯೇ ಬಯ್ಯಡ್ 9 ವರ್ಷೋರ್ದು ಬೊಕ್ಕ ಅಪ್ಪೆ ಬೊಕ್ಕ ಮಗಲ್ ಒಂಜಾಪೆರ್. ಡಿಸೋಜಾನ್ ಪೋಲಿಸ್ ಕಸ್ಟಡಿಗ್ ದೆತೊನುವೆರ್. ಸೋಜಿಗ ದಾದ ಪಂಡ ಈತ್ ದಿನ ಈ ಪೊಣ್ಣು ತನ್ನ ಸ್ವಂತ ಇಲ್ಲರ್ದ್ ಕಾಲಿ 500 ಮೀಟರ್ ದೂರೊಡು ಇತ್ತೊಲು
