Last updated on August 8th, 2023 at 01:44 pm
ಇಡಿಯ ತುಳುನಾಡ್‌ನೇ ಪೋಡ್ಯಾದಿತ್ತಿನ ವಿದ್ಯಾರ್ಥಿನಿ ವಡ್ಯ ಸೌಮ್ಯಾ ಭಟ್ ಕೊಲೆ ಪ್ರಕರಣೊಗು 26 ವರ್ಷ ಕರೀಂಡ್. ಆಂಡ ಪೊಲೀಸೆರೆ ಕೈರ್ದ್ ತಪ್ಪಾವೊಂದಿನ ಆರೋಪಿ ನನಲಾ ಪತ್ತೆ ಆತಿಜೆ.
ಪುತ್ತೂರು ವಿವೇಕಾನಂದ ಕಾಲೇಜಿದ ಬಿಎಸ್‌ಸಿ ಫೈನಲ್ ಇಯರ್ ವಿದ್ಯಾರ್ಥಿನಿಯಾದಿತ್ತಿನ ಸೌಮ್ಯಾ ಭಟ್ ಮೆರೆನ್ ಕುದಂಬ್ಲಾಜೆದ ಮಿಲಿಟ್ರಿ ಅಶ್ರಫ್ ರಕ್ಕಸೆರೆ ಲೆಕ ಕೆರ್ದ್ ಪಾಡ್ದಿತ್ತೆ. ಈ ನಡಕೆ ಇಡೀ ಪುತ್ತೂರುನೇ ಅಡಿಮೇಲ್ ಮಲ್ತಿತ್ತ್ಂಡ್.
1997ತ ಆಗಸ್ಟ್‌ 7 ತಾನಿ ಬಯ್ಯಡ್ 5 ಗಂಟೆದ ಅಂದಾಜಿಗ್ ಕಾಲೇಜೀ ಬುಡ್ದ್ ಬಸ್‌ಡ್ ಬತ್ತ್‌ದ್ ಕಬಕಡ್ ಜತ್ತಿನ ಸೌಮ್ಯಾ ತನ್ನ ಇಲ್ಲ್ ಕೆದಿಲಗ್ ಪೋಪಿ ಉಲಸಾದಿಡೆ ರೈಲ್ವೇ ಪಟ್ಟೆನ್ ಕಡತ್ ಪೋವೊಂದಿತ್ತೆರ್. ಅವ್ವು ಜನದಾಂತಿ ಜಾಗೆ. ಬಯ್ಯಡ್ ಪೊರ್ತು ದೇವೆರ್ ಕಂತ್‌ದ್ ಕತ್ತಲೆ ಆವೊಂದು ಬತ್ತಿತ್ತ್ಂಡ್. ಕಬಕರ್ದೇ ಸೌಮ್ಯಾನ ಬೆರಿಯೆ ಬತ್ತಿನ ಆರೋಪಿ ಆ ಜನದಾಂತಿ ಜಾಗೆಡ್ ಆರೆರ್ದ್ ಎದುರು ಬತ್ತ್‌ದ್ ಅಡ್ಡ ಕಟ್ಯೆ. ಅತ್ಯಾಚಾರ ಮನ್ಪೆರ ತೂಯಿನಾಯನ ಕೈರ್ದ್ ಎಂಚನಾ ತಪ್ಪಾವೊಂದು ಬಲ್ತಿನ ಸೌಮ್ಯಾನ್ ಗಿಡತೊಂದು ಅಶ್ರಫ್ ಆಲದಗುಂಡಿ ಮುಟ್ಟ ಪೋತೆ. ಅಲ್ಪ ಕೈಕ್ ತಿಕ್ಕಿನ ಸೌಮ್ಯಾಗ್ ತಾರಾಮರ ಬೀಸತ್ತಿ ಪಾಡ್ದೆ. 20ರ್ದ್‌ಲಾ ಎಚ್ಚ ಸರ್ತಿ ಕುತ್ತುದ್, ಕೆರ್ದ್, ಬಲ್ತ್‌ದೆ.
ಈ ಪ್ರಕರಣ ಆಯಿನೇ ಪುತ್ತೂರೂಡು ಹಿಂಸಾಚಾರ ಸುರು ಆಪುಂಡು. ಕರ್ಪ್ಯೂ ಘೋಷಣೆ ಆಪುಂಡು. ಬಂದ್‌ಗ್ ಲೆಪ್ಪು ಕೊರ್ಪೆರ್. ಕಡೆಕ್‌ಲಾ ಆರೋಪಿನ ಕೈದಾಪುಂಡು. ಆಂಡ ಕೈದಾಯಿ ರಡ್ಡೇ ತಿಂಗೊಲುಡು ಆರೋಪಿ ಕುಡ್ಲರ್ದ್ ತಪ್ಪಾವೊನುವೆ. ಪಿರ ಒಂತೆ ದಿನೊಟೇ ಬಂಟ್ವಾಳದ ಪಾಣೇರ್‌ದಲ್ಪ ತಿಕ್‌ದ್‌ಬೂರ್ವೆ. ಆಂಡ ಕುಡ ರಡ್ಡ್ ವರ್ಸ ಕರಿಯೊಡ್ಡ ಪೊಲೀಸೆರೆ ಕೈರ್ದ್ ತಪ್ಪಾವೊನುವೆ. ಇಂಚ ಪದ್ರಾಡಾತಿನ ಅಶ್ರಫ್ ನನಲಾ ತಿಕ್ಕ್‌ದಿಜೆ. ಆರೋಪಿ ಪಿದಯೂರುಗು ಪೋತೆ ಪನ್ಪಿ ಪಾತೆರೊಲಾ ಉಂಡು. ಆಂಡ, ಇದಮುಟ್ಟ ಆಯನ ಬಗ್ಗೆ ಒವ್ವೇ ಸುದ್ದಿ ಇಜ್ಜಿ.
ಅಶ್ರಫ್ ಮಿಲಿಟ್ರಿಡ್ ಇತ್ತೆ. ಈ ನಡಕೆ ನಡಪೆರ ಒಂಜಿ ತಿಂಗೊಲು ದುಂಬು ಊರ್‌ಗ್ ಬತ್ತಿತ್ತೆಗೆ. ನಡಕೆ ನಡಪಿನ ರಡ್ಡ್ ದಿನೊಕು ದುಂಬು ಸೌಮ್ಯಾನ ಅಮ್ಮೆರೆಗ್ ತಿಕ್ಕ್‌ದ್ ಮಗಲ್ನ ಬಗ್ಗೆ ಕೇಂದಿತ್ತೆ. ಏರೋ ಕ್ಲಾಸ್‌ಮೇಟ್ ಉಪ್ಪೊಡೂಂದ್ ಗೆರೆತಿನ ಗಣಪತಿ ಭಟ್ರ್ ಸೌಮ್ಯಾ ಕಾಲೇಜಿಗ್ ಪೋಪಿನ ಇಸಯ ತೆರಿಪಾದೆರ್. ಆಂಡ ಈ ರಕ್ಕಸೆ ಆಲೆನ ಮಾನ ಕಂಡೆರಗಾದ್ ಈ ಒಲವು ಒಟ್ಟು ಮನ್ತೊಂದಿತ್ತೆ. ಕೊಲೆ ಪ್ರಕರಣೊರ್ದು ಬೊಕ್ಕ ಆರೋಪಿ ವಿಕೃತ ಕಾಮಿ ಪನ್ಪಿನ ಸುದ್ದಿಲಾ ಪಸೆರ್ದಿತ್ತ್ಂಡ್. ಸೌಮ್ಯಾ ಭಟ್‌‌ನ್ ಕೆರ್ತಿನ ರಡ್ಡ್ ದಿನೊಕು ದುಂಬು ಅಂಚಿದನೇ ಇಲ್ಲೊಂಜೆಕ್ ಪೋಗ್ಗುದು ಒಂಜಿ ಪೊಣ್ಣನ ಮಿತ್ತ್ ಹಲ್ಲೆ ಮಲ್ದಿತ್ತೆ ಪಂದ್‌ಲಾ ಪನೊಂದಿತ್ತೆರ್.