Last updated on August 13th, 2023 at 09:26 am
ಇಲ್ಲ ಜಾಲ್‌ಡ್ ಅಮ್ಮೆರೆನ ಒಟ್ಟುಗು ಬ್ಯಾಡ್ಮಿಂಟನ್ ಗೊಬ್ಬೊಂದು ಬುಲೆಯಿನ ಜವನೆ ಇನಿ BWF ಜೂನಿಯರ್ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್‌ಡ್ ಭಾರತೊದ ನಾಯಕೆ. ಕಾರ್ಲ ತಾಲೂಕ್‌ದ ಸಾಣೂರ್‌ ಆಯುಷ್ ಶೆಟ್ಟಿ ಸಾದಗೊ ಮಲ್ದಿನಾರ್.
ಸೆ. 25ರ್ದ್ ಅಮೆರಿಕೊಡು ನಡಪರೆಗಿಪ್ಪುನ BWF ಜೂನಿಯರ್ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್‌ಗ್ 16 ಗೊಬ್ಬುಗಾರೆರ್ ಇಪ್ಪುನ ಭಾರತ ಕೂಟೊನು ಅಜತ್‌ದೆರ್. ಅವೆಟ್ ತುಳುನಾಡ ಆಯುಷ್ ಶೆಟ್ಟಿ ಬೊಕ್ಕ ಉನ್ನತಿ ಆಣುಲ್ನ ಬೊಕ್ಕ ಪೊಣ್ಣುಲ್ನ ಕೂಟೊದ ಮುತಾಲಿಕೆ ತೂವೊನುವೆರ್.
ಆಯುಷ್ ಶೆಟ್ಟಿ 2021ಟ್ ವಿಕ್ಟರ್‌ ಡೆನ್ಮಾರ್ಕ್‌ ಅಂತಾರಾಷ್ಟ್ರೀಯ ಪಂತೊಡು ಬಂಗಾರ್, 2022ಟ್ BWF ವಿಶ್ವ ಜೂನಿಯರ್‌ಡ್ ಭಾರತೊನು ಪ್ರತಿನಿಧಿತ್‌ದಿತ್ತೆರ್. 2022ಟ್ ಭಾರತ ಜೂನಿಯರ್ ಇಂಟರ್‌ನ್ಯಾಶನಲ್‌ ಗ್ರ್ಯಾನ್‌ಪ್ರಿಟ್ ಕಂಚಿದ ಪದಕೊ ಗೆಂದ್‌ದಿನ ಮೇರ್ ರಾಜ್ಯ, ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಮಟ್ಟೊಡು ಗೊಬ್ಬುದು ಸಾದಗೊ ತೋಜಾದೆರ್ ಡೆನ್ಮಾರ್ಕ್‌, ಸ್ಪೇನ್‌, ಪುಣೆ, ಯುಎಸ್‌ಎ, ಬೆಂಗ್ಳೂರ್, ಪಂಚಕುಲ, ಗೋವಾ ಇಂಚ ಬೇತೆ ಬೇತೆ ಕಡೆಟ್ ಗೊಬ್ಬುದೆರ್.
ಬ್ಯಾಡ್ಮಿಂಟನ್ ಸಾಧಕೆ ಆಯುಷ್, ಸಾಣೂರ್‌ದ ರಾಮ್‌ಪ್ರಕಾಶ್ ಬೊಕ್ಕ ಶಾಲ್ಮಿಲಿ ದಂಪತಿಲೆನ ಮಗೆ. ಸುರುಟು ಕಾರ್ಲದ ಸುಭಾಷ್ ಬೊಕ್ಕ ಕುಡ್ರದ ಚೇತನ್ ಪನ್ಪಿನಕ್ಲೆಡ ತರಬೇತಿ ಗೆತೊನೊಂದಿತ್ತೆರ್.
ಇತ್ತೆ ಬೆಂಗ್ಳೂರ್‌ದ ರೇವಾ ಯೂನಿವರ್ಸಿಟಿ‌ಡ್ B.Sc ಮಲ್ತೊಂದುಪ್ಪುನ ಮೇರ್ ಅಲ್ಪದ ಪಡುಕೋಣೆ ಬ್ಯಾಡ್ಮಿಂಟನ್ ಕೋಚಿಂಗ್ ಸೆಂಟರ್‌ಡ್ ಸಾಗರ್ ಛೋಪ್ರಾ ಪನ್ಪಿನಾರೆಡ ಕೋಚಿಂಗ್ ಗೆತೊನೊಂದುಲ್ಲೆರ್.