ಸಮಗಟ್ಟ್ ಸರಕಾರ ಅನುದಾನ ಕೊರಂದೆ ತುಳುನಾಡ್‌ಡ್ ಉಪ್ಪುನ ಸೇನೆ ತರಬೇತಿ ಸಂಸ್ಥೆಲು ಬಂದ್ ಆಪಿನೆಟ್ಟುಲ್ಲ

Last updated on August 19th, 2023 at 09:28 am

ತುಳುನಾಡ್‌ದ ಜವನೆರೆನ್ ಸೇನೆಗ್ ಸೇರರೆ ಉಮೇದ್ ಪುಟೇಟಾವರೆ ಮಲ್ದಿನ ಸೇನಾ ತರಬೇತಿ ಸಂಸ್ಥೆಲು ನನ ದಾನೆ ಮುಚ್ಚೊಡು ಪನ್ಪಿನ ಪರಿಸ್ಥಿತಿಗ್ ಎತ್ತ್‌ದ್ಂಡ್. ಸರಕಾರ ಅನುದಾನ ಬುಡುಗಡೆ ಮಲ್ಪಂದಿನೆರ್ದಾವರ ಬೇಗೊಡು ಈ ಸಂಸ್ಥೆಲು ಮುಚ್ಚುನ ಸಾಧ್ಯತೆ ಉಂಡು.

ಈ ಸಂಸ್ಥೆಲೆನ ತರಬೇತಿದಾರೆರೆಗ್ ಕರಿನ 4 ತಿಂಗೊಲುರ್ದಿಂಚಿ ಸಂಬಲ ಬೈಜಿ. ಪೊಸ ತರಬೇತಿದ ಬ್ಯಾಚ್ ಮಲ್ಪರೆಲಾ ಪನವು ಇಜ್ಜಿ. ಸರಕಾರದ ಆರ್ಥಿಕ ಇಲಾಖೆ ನನಲ ಅನುದಾನ ಬುಡುಗಡೆ ಮಲ್ದಿಜಿ. ತುಳುನಾಡ್‌ರ್ದ್ ಮಸ್ತ್ ಕಮ್ಮಿ ಜನ ಸೇನೆಲೆಗ್ ಸೇರುನೆರ್ದಾವರ, ಮುಲ್ಪದ ಜನಕ್ಲೆನ್ ಸೇನೆಗ್ ಸೇರರೆ ಉಮೇದ್ ಪುಟ್ಟಾವೊಡು ಪನ್ದ್ ಈ ಸಂಸ್ಥೆಲೆನ್ ಸರಕಾರ ಸುರು ಮಲ್ದಿತ್ತ್ಂಡ್.

ಕುಡ್ಲದ ರಾಣಿ ಅಬ್ಬಕ್ಕ ಸೇನಾ ತರಬೇತಿ ಸಂಸ್ಥೆ ಅಂಚೆನೆ ಒಡಿಪುದ ಕೋಟಿ ಚೆನ್ನಯ ಸೇನಾ ತರಬೇತಿ ಸಂಸ್ಥೆಲೆಡ್ ಇತೋರ್ತು 217 ಜನ ತರಬೇತಿ ದೆತೊಂದು 73 ಜನಕ್ ಭಾರತೀಯ ಸೇನೆಲೆಡ್ ಬೇಲೆಲಾ ಆದಿತ್ತ್ಂಡ್. ತುಳುನಾಡ್‌ದ ಜನಕುಲು ಈ ಸಂಸ್ಥೆಲೆನ್ ಎಡ್ಡೆಡ್ ಗಲಸ್‌ದ್ ಸೇನೆಗ್ ಸೇರುನ ಉಮೇದ್ ತೂಪಾನಗನೇ ಸರಕಾರ ಅನುದಾನ ಕೊರಂದೆ ಈ ಸಂಸ್ಥೆಲೆನ್ ಮುಚ್ಚುನ ಪರಿಸ್ಥಿತಿಗ್ ಕನದ್ಂಡ್.