Last updated on September 2nd, 2023 at 04:16 pm
ಬರ್ಸ ಕೈಕೊರ್ತಿನೆರ್ದಾವರ ತುಳುನಾಡ್‌ಡ್ ನೀರ್‌ಗ್ ಎತ್ವಾರ ಆಪಿನ ಪೋಡಿಗೆಲಾ ಉಂಡಾತ್ಂಡ್. ಮಾರ್ಚ್-ಎಪ್ರಿಲ್‌ಗ್ ನನಲಾ ಆಜಿ ಏಲ್ ತಿಂಗೊಲು ದುಂಬೇ ಇಂಚಿನ ಪೋಡಿಗೆ ಸುರುವಾತ್ಂಡ್.
ಓಲಾಂಡಲಾ ಸೆಪ್ಟಂಬರ್‌‌ಡ್ ಸಮ ಬರ್ಸ ಬತ್ತಿಜಿಂಡ ಅಕ್ಟೋಬರ್‌ಡ್ ರೇಷನಿಂಗ್‌ ಮಲ್ತ್‌ದ್, ದಿನ ಬುಡ್ದ್ ದಿನ ನೀರ್ ಕೊರೊಡಾಪಿನ ಅನಿವಾರ್ಯತೆ ಮಂಗಳೂರು ಮಹಾನಗರ ಪಾಲಿಕೆಗ್ ಬರು ಪಂದ್ ವರದಿಲು ಪನೊಂದುಲ್ಲ.
ಕುಡ್ಲ ಪೇಂಟೆ ನೀರ್‌ಗ್ ಬೋಡಾದ್ ತುಂಬೆ ವೆಂಟೆಡ್‌ ಡ್ಯಾಮ್‌ನೇ ನಂಬುದುಂಡು. ಆಂಡ, ತುಂಬೆ ಡ್ಯಾಮ್‌ಡ್ ನೀರ್‌ದ ಉಲಪರಪು ಅಲಕ್ಕ ಕಮ್ಮಿ ಆತಿನೆರ್ದಾವರ ಆಗಸ್ಟ್‌ ತಿಂಗೊಲುರ್ದೇ ನೀರ್ ಸಂಗ್ರಹ ಸುರು ಆತ್ಂಡ್. ಅಂಚಾದ್ 6 ಮೀಟರ್‌‌ಡ್ ನೀರು ಉಂತಾವರ ಪಾಲಿಕೆ ಅಧಿಕಾರಿಲು ತೂವೊಂದುಲ್ಲೆರ್.
ಎಚ್ಚಾದ್ ವರ್ಸೊಲಾ ಆಗಸ್ಟ್‌, ಸೆಪ್ಟಂಬರ್‌‌ಡ್ ಐನೆರ್ದ್ ಆಜಿ ಗೇಟ್‌ಲ್ ಓಪನ್‌ ಇಪ್ಪೆದ. ಆಂಡ, ಈ ಸರ್ತಿ ಬರ್ಸದಾಂತೆ ಪರಿಸ್ಥಿತಿ ಬಾರೀ ತೆಟ್ಟ್‌ದಿನೆರ್ದಾವರ ಡ್ಯಾಮ್‌ದ ಒಂಜಿ ಗೇಟ್‌ ಬುಡ್ದ್ ಬಾಕಿದ 29 ಗೇಟ್‌‌ಲೆನ್ ಇತ್ತೆನೇ ಮುಚ್ಚಿದೆರ್.
ನನ ಸೆಪ್ಟಂಬರ್‌‌ಡ್ಲಾ ಬರ್ಸ ಬತ್ತಿಜಿಂಡ ಬಾರೀ ಬಂಙ ಆವರೆಗುಂಡು. ಇತ್ತೆ ತುಂಬೆ ಡ್ಯಾಮ್‌ಡ್ ಇಪ್ಪುನ ನೀರ್ ಅಂದಾಜಿ 50 ದಿನೊಕು ಮಾತ್ರ ಬರ್ಪಿಲೆಕ ಉಂಡು.
ಈ ವರ್ಸೊದ ಎಪ್ರಿಲ್, ಮೇ, ಜೂನ್‌ಡ್ ನೀರ್‌ಗಾತಿನ ಎತ್ವಾರ ಕುಡೊರ ಆಯಿಜಿಂಡ ಯಾರು. ಹವಾಮಾನ ಇಲಾಖೆ ಸೆಪ್ಟೆಂಬರ್‌ಡ್ ಎಡ್ಡೆ ಬರ್ಸ ಬರ್ಪುಂಡು ಪಂದ್ ಪಂತ್ಂಡ್. ಇಲಾಖೆದ ನಾಲಯಿ ಪಲಿಪಡ್ ಪಂದ್ ಸತ್ಯೊಲೆಡ ನಟ್ಟೊನುಗ.