ಕುಡ್ಲ ಪೋಲೀಸ್ ಕಮಿಷನರ್ ವರ್ಗಾವಣೆ, ಕುಡ್ಲಡ್ ಡ್ರಗ್ಸ್ ದಂಧೆ ಮಲ್ಪುನಕಲೆಗ್ ಬೆಚ್ಚ ಮುಟ್ಟಾದಿತ್ತಿನ ಕುಲದೀಪ್ ಜೈನ್

Last updated on September 5th, 2023 at 03:08 pm

ಕುಡ್ಲ : ಕರಿನ ಐನ್ ತಿಂಗೊಲುರ್ದ್ ಎಂಡಿಎಂಎ ವಿರುದ್ಧ ಕೊಲಲ ಸಾರಿದ್ ಡ್ರಗ್ಸ್ ದಂಧೆ ಮಲ್ಪುನಕಲೆಗ್ ಬೆಚ್ಚ ಕೈತೊಂದಿತ್ತಿನ ಕುಡ್ಲದ ಪೊಲೀಸ್ ಕಮಿಷನರ್ ಕುಲದೀಪ್ ಕುಮಾರ್ ಆರ್ ಜೈನ್ ವರ್ಗಾವಣೆ ಆತೆರ್. ಇತ್ತೆ 2008ದ ಬ್ಯಾಚ್ ದ ಅನುಪಮ್ ಅಗರ್ವಾಲ್ ಮೆರೆನ್ ಪೊಸ ಕುಡ್ಲ ನಗರ ಪೊಲೀಸ್ ಕಮಿಷನರ್ ಆದ್ ಸರಕಾರ ನೇಮಕ ಮಲ್ದ್ಂಡ್.

ಕುಲದೀಪ್ ಕುಮಾರ್ ಆರ್ ಜೈನ್ ಮೆರೆನ್ ವರ್ಗಾವಣೆ ಮಲ್ತ್ ಒವ್ವೇ ಪೊಸ ಹುದ್ದೆ ಕೊರ್ತುಜೆರ್. ಕರಿನ ಐನ್ ತಿಂಗೊಲುಡು ಕುಲದೀಪ್ ಮೇರ್ ಕುಡ್ಲ ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಡ್ರಗ್ಸ್, ಗಾಂಜಾ, ಎಂಡಿಎಂಎ ಅಮಲ್ ಸೊತ್ತುಲೆನ್ ಮಾರುನಕಲೆಮ್ ಪತ್ತ್ ದ್ ಸುಮಾರ್ ಜನನ್ ಜೈಲ್ ಗ್ ಕಡಪುಡುದೆರ್.

ಅಂಚೆನೆ ಸಾರಿಗೆ ನಿಯಮ ಮೀರ್ದ್ ಗಾಡಿ ಬುಡ್ಪಿನಕಲೆನ ವಿರುದ್ಧಲಾ ಕ್ರಮ ದೆತೊನೊಂದಿತ್ತೆರ್. ಒಟ್ಟುಗು ಮಟ್ಕಾ ದಂಧೆ, ಸೈಬರ್ ಕ್ರೈಮ್ ವಿರುದ್ಧ ಎಡ್ಡೆ ರೈಡ್ ಮಲ್ದಿತ್ತೆರ್. ಕಾಲೇಜ್ದ ಜೋಕುಲು ಅಮಲ್ ಸೊತ್ತುಲೆನ ಮರ್ಲ್ ಗ್ ಬೂರಂದಿಲೆಕ್ಕ ಡ್ರಗ್ಸ್ ಜಾಗೃತಿ ಮಲ್ಪುನಲ್ಪ ಮೇರ್ ಎಡ್ಡೇನೆ ಬೆನ್ದಿತ್ತೆರ್.