Last updated on September 10th, 2023 at 02:33 pm
ಆಟೊರಿಕ್ಷಾಡ್ ಅಕ್ರಮವಾದ್ ಕೊನೊವೊಂದಿತ್ತಿನ 2.50 ಕ್ವಿಂಟಾಲ್ ಪೆತ್ತದ ಮಾಸೊನು ಪತ್ತಿನ ಬಜರಂಗದಳೊತ ಕಾರ್ಯಕರ್ತೆರ್ ಆರೋಪಿನ ಒಟ್ಟುಗು ಪತ್ತಿನ ಸೊತ್ತುನು ಉರ್ವ ಸ್ಟೇಶನ್ ಪೊಲೀಸೆರೆಗ್ ಒಪ್ಯಾಯಿನ ನಡಕೆ ಉರ್ವಸ್ಟೋರ್‌ದ ಚಿಲಿಂಬಿದಲ್ಪ ಇನಿ ಕಾಂಡೆ 6ಗಂಟೆದ ಅಂದಾಜಿಗ್ ನಡತ್‌ದ್ಂಡ್.
ಜೋಕಟ್ಟೆರ್ದ್ ಪೆತ್ತದ ಮಾಸೊನು ರಿಕ್ಷಾಡ್ ಪೇಂಟೆದ ಬೀಫ್ ಸ್ಟಾಲ್‌ಗ್ ಕನವೊಂದಿತ್ತೆರ್. ಈ ಬಗೆಟ್ ಒಲವು ತಿಕ್ಕಿನ ಬಜರಂಗದಳೊತ ಕಾರ್ಯಕರ್ತೆರ್ ಚಿಲಿಂಬಿಡ್ ರಿಕ್ಷಾನ್ ಉಂತಾದ್ ಆರೋಪಿನ್ ಮಾಸದೊಟ್ಟುಗು ಪೊಲೀಸೆರೆಗ್ ಒಪ್ಯಾದೆರ್. ಐನ್ ಪೆತ್ತೊಲೆನ 2.50 ಕ್ವಿಂಟಾಲ್ ಮಾಸೊನು ರಿಕ್ಷಾಡ್ ಕೊನೊವೊಂದಿತ್ತೆ ಪಂದ್ ತೆರಿದ್‌ಬೈದ್ಂಡ್.
ಜೋಕಟ್ಟೆದ ಬದ್ರು ಪನ್ಪಿನಾಯಗ್ ಸೇರ್ದಿನ ಈ ಮಾಸೊನು ದಾವೂದ್ ಪನ್ಪಿನಾಯೆ ರಿಕ್ಷಾಡ್ ಕೊನೊವೊಂದಿತ್ತೆ. ಈ ಮಾಸೊನು ಮಾರ್ಕೆಟ್‌ಡುಪ್ಪುನ ಮಾಸದಂಗಡಿದ ಯಾಸಿನ್ ಪನ್ಪಿನಾಯಗ್ ಪೋವೊಂದಿತ್ತ್ಂಡ್. ರಡ್ಡ್ ತಿಂಗೊಲುರ್ದ್ ಇಂಚ ಮಾಸ ಪೋವೊಂದುಂಡು ಪಂದ್ ಆರೋಪಿಯೇ ಬಜರಂಗದಳೊತ ಕಾರ್ಯಕರ್ತೆರೆಡ ಪನೊಂದುಪ್ಪುನವು ವೀಡಿಯೋಡು ದಾಕಲಾತ್ಂಡ್.
ಅಪಗನೇ ಅಡೆ ಬತ್ತಿನ ಉರ್ವ ಸ್ಟೇಶನ್ ಪೊಲೀಸೆರ್ ಆರೋಪಿ ಬೊಕ್ಕ ಮಾಸೊನು ವಶೊಕು ಗೆತೊಂದೆರ್. ಈ ಬಗೆಟ್ ಪ್ರಕರಣ ದಾಕಲ್ತೊಂದು, ಆರೋಪಿನ ವಿಚಾರಣೆ ಮಲ್ತೊಂದುಲ್ಲೆರ್.
