ತುಳು ಭಾಷೆ ಬೊಕ್ಕ ತುಳು ಲಿಪಿಕ್ ಕುಡ್ಲಡ್ ಅವಮಾನ!

Last updated on September 11th, 2023 at 09:17 pm

ಉಂದು ದಾನೆ ಇಂಚ ತರೆಬರವು ಕೊರ್ತ ಪನ್ದ್ ಎನ್ನೊಡ್ಚಿ, ಎಂಕುಲು ತುಳುವೆರ್ ತುಳುನು ಮೋಕೆಡ್ ತಿಗಲೆಡ್ ದೀದ್ ತಿರ್ಗುನಕುಲು ಅಪ್ಪೆಬಾಸೆಗ್ ಅವಮಾನ ಆಪಿನಂಚಿನ ಬೇಲೆ ಕುಡ್ಲದಕುಲು ಮಲ್ಪಯೆರ್ ಪನ್ದ್ ಪನುವರ್.ಆಂಡ ಇಂಚ ಬರೆಯರೆಲಾ ಒಂಜಿ ನೆವನ ಉಂಡು, ಕುಡ್ಲಡ್ ತುಳು ಬಾಸೆಗ್ ತುಳು ಲಿಪಿಕ್ ಒಲ್ಪ ಅವಮಾನ ಆತ್ಂಡ್?

ಕುಡ್ಲಡುಪ್ಪುನ ಸಾರ ಸಾರ ಅಂಗಡಿಲೆಡ್ ಮಲ್ಲ ಮಲ್ಲ ಕಟ್ವಾನೊಡು ಪೆಜ್ಜಿಂಡ ಬಿರೆಲ್‌ಡ್ ಗೆನ್ಪುನಾತ್ ತುಳು ಲಿಪಿತ ಬೋರ್ಡುಲು ಉಪ್ಪ, ಬೊಕ್ಕ ಒರಿದಿನ ಪೂರಾ ಉಪ್ಪುನು ಕನ್ನಡೊಡು, ಇಂಗ್ಲೀಷ್‌ಡ್, ಮಲಯಾಳಂಡ್! ಕುಡ್ಲಡ್ ಮಲಯಾಳಂಗ್ ಇತ್ತಿನ ಮರ್ಯಾದಿ ತುಳು ಲಿಪಿಕ್ ಇಜ್ಜಿ. ಪನ್ಂಡ ಏರೆಗ್ ತುಳುಲಿಪಿ ಓದರೆ ಬರ್ಪುಂಡು ಪನ್ದ್ ತುಳುವೆರೇ ಉಡಾಪೆ ಪಾತೆರುವೆರ್, ಉಂದು ಅವಮಾನ ಅತ್ತ? ಕರ್ನಾಟಕ ರಾಜ್ಯ ಸರಕಾರನೇ ತುಳು ಲಿಪಿಕ್ ಅಧಿಕೃತ ಮಾನ್ಯತೆ ಕೊರ್ದಿಪ್ಪುನಗ ಏತ್ ಸ್ಥಳೀಯ ಆಡಳಿತ ಸಂಸ್ಥೆಲೆಡ್ ತುಳು ಲಿಪಿತ ಬೋರ್ಡು ಪಾಡ್ದೆರ್? ಅತಿಕಾರಿಬೊಟ್ಟು ಗ್ರಾಮ ಪಂಚಾಯತಿಡ್, ಬೆದ್ರ ಪುರಸಭೆಟ್, ಕುಡ್ಲ ನಗರ ಪಾಲಿಕೆದ ಒಂಜಿ ರಡ್ಡ್ ಕಡೆಟ್ ಅಧಿಕೃತ ವಾದ್ ಪಾಡ್ದೆರೇ ಸಿವಾಯಿ ಬೇತೆ ಏರ್ ಪಾಡ್ದೆರ್?

ಕುಡ್ಲ ಪೇಂಟೆಡ್ ತುಳು ಪಾತೆರುನಕಲೆನ್ ನಾಡ್‌ಡ್ ಪತ್ತೊಡಾಯಿನ ಪರಿಸ್ಥಿತಿ ಬೈದ್ಂಡ್. ಬಸ್‌ದ ಕಂಡಕ್ಟರ್‌ನಕಲೆರ್ದ್ ಪತ್ತ್‌ದ್, ಕಾಲೇಜ್ ಪೋಪಿನ ಜೋಕುಲು, ಅಂಗಡಿದಕುಲು, ರಿಕ್ಷದಕುಲು ಏರ್ಲಾ ತುಳು ಪಾತೆರುನನೇ ಕಮ್ಮಿ. ತುಳುಟು ನಡತೊಂದಿತ್ತಿನ ಬೇರ ಪೂರಾ ಮೆಲ್ಲ ಮೆಲ್ಲ ಕನ್ನಡೊಗು ಬದಲ್ತೊಂದುಂಡು. ತುಳು ವ್ಯಾವಹಾರಿಕ ಬಾಸೆ ಆದಿತ್ತಿನವು ಮದೆ ಸೇರೊಂದುಂಡು. ಅಪ್ಪೆ ಬಾಸೆ ತುಳು ಆಂಡಲ ತುಳು ಪಾತೆರ್ಂಡ ನಡಪುಂಡು ಪನ್ದ್ ತೆರಿದಿತ್ತ್ಂಡಲ ತುಳು ಪಾತೆರಂದೆ ಕುಲ್ಲುನ ಅವಮಾನ ಮಲ್ಪುನು ಅತ್ತಾ?

ಒಂಜಿ ಕಾಲೊಡು ಬ್ಯಾರಿಲು, ಕೊಂಕಣೆರ್ ತುಳುನು ಮೋಕೆಡ್ ಪಾತೆರೊಂದಿತ್ತೆರ್, ಆಂಡ ಇತ್ತೆ ಎಚ್ಚಿನ ಪೇಂಟೆದ ಬ್ಯಾರಿಲೆಗ್ ಕೊಂಕಣೆರೆಗ್ ತುಳುವೇ ಬರಂದಿನ ಪರಿಸ್ಥಿತಿ ಉಂಡು. ಅಕಲೆಗ್ ತುಳುತ ಅಗತ್ಯ ತೋಜೊಂದಿಜ್ಜಿ ಅಕಲೆಗ್ ತುಳುನಾಡ್‌ಡ್ ಕನ್ನಡ ಯಾವು ಪನ್ದ್ ತೋಜೊಂದುಂಡು. ಎನ್ನ ಏತೋ ಗುರ್ತದಕುಲು ಯಾನ್ ತುಳುಟು ಪಾತೆರ್ಂಡಲಾ ಅಕುಲು ಕನ್ನಡೊಡೇ ಉತ್ತರ ಕೊರ್ಪೆರ್.

ತುಳು ಬುಲೆಯೊಡಾಂಡ ಒರಿಯೊಡಾಂಡ ಕಾಲಿ ಇಲ್ಲದುಲಯಿ ಪಾತೆರ್ಂಡ ಯಾವುಜಿ. ತುಳುನು ಬೇರೊಗು ಗಲಸೊಡು, ತುಳು ಮಾರ್ಕೇಟ್‌ದ ಬಾಸೆ ಆವೊಡು. ಮಲ್ಲ ಬಾಸೆದ ಆಸರೆ ಉಂಡು ಪನ್ದ್ ಮುಲ್ಪನೇ ಪುಟ್ಟು ಬಲದಿನಕುಲು ತುಳುನು ಮದತರ್ಡ ನಿಕುಲು ತುಳುಕು ಮಾತ್ರ ದ್ರೋಹ ಮಲ್ಪುನು ಅತ್ತ್, ಈ ಮಣ್ಣ್‌ದ ಇತಿಹಾಸೊಗು, ಈ ಮಣ್ಣ್ ಕೊರಿನ ಆಸರೆಗ್, ಈ ಮಣ್ಣ್ ನಿಕಲೆನ್ ಕಾತಿನೆಕ್ಕ್ ದ್ರೋಹ ಮಲ್ಪುವರ್. ಮಲ್ಲ ಬಾಸೆನ್ ಒರಿಪಾವರೆ ಕೋಟಿಗಟ್ಟಲೆ ಜನ ಉಲ್ಲೆರ್, ನಿಕಲೆನ ಅಗತ್ಯ ಇಜ್ಜಿ. ತುಳುತ ಓಂಟೆ ನಾಲಯಿ ಒಯ್ತ್ ನಿಕುಲು ಕುಡೊಂಜಿ ಬಾಸೆನ್ ಒರಿಪಾವೊಡ್ಚಿ. ಕುಡ್ಲಡ್ ತುಳುನು ಒರಿಪಾಲೆ, ಇಜಿಂಡ ಒಡಿಪುನು ಮುಕ್ಕು ತಿನಿಲೆಕ್ಕ ಕುಡ್ಲಲಾ ಕೈ ತತ್ತ್ ಪೋಪುಂಡು ಬೊಕ್ಕ ತುಳುಅಪ್ಪೆನ ಪಟೊಕು ನಿಜೊಟು ಮಾಲೆ ಪಾಡೊಲಿ.