Last updated on September 19th, 2023 at 02:25 pm
ಬಿಜೆಪಿ ಟಿಕೆಟ್ ದೆಪ್ಪಾದ್ ಕೊರ್ಪೆ ಪಂಡ್‌ದ್ ನಂಬಾದ್ ಕೋಟಿಗಟ್ಲೆ ದಗೆ ಮಲ್ತಿನ ಪ್ರಕರಣೊದ ಕುಡೊರಿ ಆರೋಪಿಯಾಯಿನ ಅಭಿನವ ಹಾಲಶ್ರೀ ಸ್ವಾಮೀಜಿನ್ ಒಡಿಸ್ಸಾಡ್ ಕುಡ್ಲ ಸಿಸಿಬಿ ಪೊಲೀಸೆರ್ ಕೈದ್ ಮಲ್ದೆರ್.
ಒಡಿಪು ಜಿಲ್ಲೆದ ಬೈಂದೂರ್‌ದ ಉದ್ಯಮಿ ಗೋವಿಂದ ಬಾಬು ಪೂಜಾರಿಗ್ ಬೈಂದೂರು ವಿಧಾನಸಭಾ ಕ್ಷೇತ್ರೊದ ಬಿಜೆಪಿ ಟಿಕೆಟ್ ಕೊರ್ಪಾವೆ ಪಂದ್ ನಂಬಾದ್ ಸುಮಾರ್ 7 ಕೋಟಿ ರೂಪಾಯಿ ನಾಮ ಪಾಡಿನ ಪ್ರಕರಣ ದಾಕಲಾದಿತ್ತ್ಂಡ್. ಪ್ರಕರಣೊದ ಪ್ರಮುಖ ಆರೋಪಿ ಚೈತ್ರಾ ಕುಂದಾಪುರನ್ ಪೊಲೀಸೆರ್ ಇಂಚಿಪ್ಪೊಗು ಒಡಿಪುಡು ಕೈದ್ ಮಲ್ದೆರ್. ಒಟ್ಟು 5 ಜನನ್ ಕೈದ್ ಮಲ್ದಿತ್ತೆರ್. ಇತ್ತೆ 3ನೇ ಆರೋಪಿ ವಿಜಯನಗರ ಜಿಲ್ಲೆದ ಅಭಿನವ ಹಾಲಶ್ರೀ ಸ್ವಾಮೀಜಿನ್ ಅಂಗಾರೆ ಒಡಿಶಾದ ಕಟಕ್‌ಡ್ ಪೊಲೀಸೆರ್ ಪತ್ತ್‌ದೆರ್.
ಪ್ರಕರಣೊದ ನಂಬರ್ 1 ಆರೋಪಿ ಚೈತ್ರಾ ಕುಂದಾಪುರ ಕೈದಾಯಿ ಬೊಕ್ಕ ಕೆಲ ಒಲವುಲು ಪಿದಯಿ ಬರೊಂದುಲ್ಲ. ಉ್ಂದೆಕ್ ದುಂಬು ಸ್ವಾಮೀಜಿನ ಕಾರ್ ಡ್ರೈವರ್‌ನ್ ವಶೊಕು ಗೆತೊಂದು ವಿಚಾರಣೆ ಮಲ್ದೆರ್. ಸಿಸಿಬಿ ಪೊಲೀಸೆರ್ ಇನಿ ಸ್ವಾಮೀಜಿನ ಮುಟ್ಟದಕಲೆನ ವಿಚಾರಣೆ ಮಲ್ತೊಂದುಲ್ಲೆರ್. ಮಠೊತ ಕೆಲ ಆತ್ಮೀಯೆರ್ ಬೊಕ್ಕ ಡ್ರೈವರ್ ಸೇರ್ದ್ ಇಂಚಿಪ್ಪೊದ ಕಾಲ್ ಡೀಟೇಲ್ಸ್ ದ ಮಿತ್ತ್ ಸಿಸಿಬಿ ಅಧಿಕಾರಿಲು ಕಾರ್ಯಾಚರಣೆ ದುಂಬರಿತ್‌ದೆರ್. ಸಿಸಿಬಿ ಪೊಲೀಸೆರ್ ಸ್ವಾಮೀಜಿನ್ ವಶೊಕು ಗೆತೊಂದು ಬೆಂಗ್ಳೂರ್‌ಗ್ ಲೆತೊಂದು ಬರೊಂದುಲ್ಲೆರ್ ಪಂದ್ ತೆರಿದ್‌ಬೈದ್ಂಡ್. ಮೊಕ್ಲೆನ ಜಡ್ತೆರ್ದ್ ಬೊಕ್ಕನೇ ಈ ಪ್ರಕರಣೊದ ಪಿರವು ಇತ್ತಿನ ಮಲ್ಲ ಮಲ್ಲಕುಲು ಏರ್ ಪಂದ್ ತೆರಿಯೊಡಾತೆ.