ಕುಡ್ಲಡ ಕೆಂಜಾರ್‌ಡ್ ಭಾರತದ ಸುರುತ ಕೋಸ್ಟ್ ಗಾರ್ಡ್ ತರಬೇತಿ ಅಕಾಡೆಮಿ, ಕೇರಳದಕಲೆನ ಲಾಬಿದ ನಡುಟ್ಲಾ ಕುಡ್ಲಡ್ ಸುರು ಆವರೆ ಉಪ್ಪುನ ಅಕಾಡೆಮಿ

Last updated on September 23rd, 2023 at 12:48 pm

ದೇಶದ ಸುರುತ ಕೋಸ್ಟ್ ಗಾರ್ಡ್ ತರಬೇತಿ ಅಕಾಡೆಮಿ ಸ್ಥಾಪನೆದ ಬೇಲೆ ಕುಡ್ಲಡ್ ಸುರು ಆತ್ಂಡ್. ಕೆಂಜಾರ್‌ದ 158 ಎಕರೆ ಜಾಗೊಡು ಈ ಅಕಾಡೆಮಿ ಬರ್ರೆ ಉಂಡು. ಈ ಜಾಗೊನು ರಕ್ಷಣಾ ಇಲಾಖೆಗ್ ಹಸ್ತಾಂತರ ಮಲ್ತ್, ಇತ್ತೆ ಪಾಗರ ಕಟ್ಟುನ ಬೇಲೆ ಸುರು ಆತ್ಂಡ್.

ಕೇಂದ್ರ ಸಚಿವ ಸಂಪುಟೊಡು ಅಕಾಡೆಮಿ ಮಲೇಪರೆ ತಾತ್ವಿಕ ಅನುಮೋದನೆ ತಿಕ್ಕಿಬೊಕ್ಕ ಬೇಲೊ ಸುರು ಆತ್ಂಡ್. 2026ತ್ತ ಪೊರ್ತುಡು ಪತ್ತ ಅಕಾಡೆಮಿ ಉದಿಪನ ಆಪುನ ಸಾಧ್ಯತೆ ಉಂಡು.

ಅಕಾಡೆಮಿ ಮಲ್ಪರೆ ಸುಮಾರ್ 1000 ಕೋಟಿದ ಯೋಜನೆ ಕೇಂದ್ರ ಸರಕಾರ ಮಲ್ದ್ಂಡ್. ತುಳುನಾಡ್ಡ್ ಅಕಾಡೆಮಿಗ್ ಬೋಡಾಪಿನ ಭೌಗೋಳಿಕ ಲಕ್ಷಣ ಉಪ್ಪುನವು ಎಡ್ಡೆ ಅನುಕೂಲ ಆದುಂಡು.

ಈ ಅಕಾಡೆಮಿದ ಉಲಯಿ 9 ಬೇತೆ ಬೇತೆ ಸ್ಕೂಲುಲು ಉಪ್ಪುವ. ಉಂದೆಟ್ ನೌಕಾ ತರಬೇತಿ, ಮಾಲಿನ್ಯ ಸ್ಪಂದನೆ, ಕಾರ್ಯಾಚರಣೆಲು, ಕಡಲ್ ಕಲ್ವೆರೆನ ನಿಯಂತ್ರಣ ಇಂಚಿನ ತರಬೇತಿಲು ಆವರೆ ಉಂಡು. ಸುಮಾರ್ 650 ಜನಕ್ ತರಬೇತಿ ಆಪಿನ ಅವಕಾಶ ಇತ್ತ್ ದ್ ಮುಲ್ಪ ಭಾರತದಕುಲು ಮಾತ್ರ ಅತ್ತಂದೆ ಪಿದಯೂರುದ ವಿದ್ಯಾರ್ಥಿಲುಲಾ ಉಪ್ಪುವೆರ್.

ಈ ಅಕಾಡೆಮಿನ್ ಕೇರಳಡ್ ಮಲ್ಪರೆ ಕೇರಳೊರ್ದು ಲಾಬಿ ನಡದಿತ್ತ್ಂಡ್. ಆಂಡ ಕರಿನ ಸಲ ಕೇಂದ್ರ ರಕ್ಷಣಾ ಸಚಿವೆದಿ ಆದಿತ್ತಿನ ನಿರ್ಮಲಾ ಸೀತರಾಮನ್ 2017ಕ್ಕ್ ಕುಡ್ಲಗ್ ಬತ್ತ್ ಜಾಗೆ ತೂದು ಉಂದೇ ಸಮ ಜಾಗ ಪನ್ದ್ ಪನ್ದಿತ್ತೆರ್. ಅವೆರ್ದ್ ಬೊಕ್ಕ ಕುಡ್ಲದ ಸಂಸದೆ ನಳೀನ್ ಕುಮಾರ್ ಕಟೀಲೆರ್ ಕುಡ ಸಚಿವೆರೆಡ ಪಾತೆರ್ದ್ ಬೇಗೊಡು ಅಕಾಡೆಮಿ ಕಟ್ಟಾವುನ ಭರವಸೆ ದೆತೊಂದಿತ್ತೆರ್. ಅಂಚಾದ್ ಕೇರಳಗ್ ಪೋಪಿನ ತತ್ತ್ ನಮ್ಮ ತುಳುನಾಡ್ಗ್ ಈ ಅಕಾಡೆಮಿ ಮಂಜೂರು ಆದಿತ್ತ್ಂಡ್.