Last updated on September 25th, 2023 at 11:24 am
ಈದ್ ಮಿಲಾದ್‌ದಾನಿ ಪಜ್ಜಿ ಮೀನ್ ಬೇರದಕುಲು ಕಡ್ಡಾಯವಾದ್ ರಜೆ ಪಾಡೊಡು ಇಜಿಂಡ ಬಹಿಷ್ಕಾರ ಬೊಕ್ಕ ದಂಡ ಪಾಡ್ಪಾವ ಪನ್ಪಿನ ಎಚ್ಚರ್ಗೆ ಕೊರ್ತಿನ ಬ್ಯಾನರ್ ಕುಡ್ಲದ ದಕ್ಕೆಡ್ ಇತ್ತಿನವು ಇತ್ತೆ ವಿವಾದೊಗು ನೆವನ ಆದ್, ವಿಶ್ವ ಹಿಂದೂ ಪರಿಷತ್ ಉಂದೆಕ್ ವಿರೋಧ ತೂಪಾದ್ಂಡ್.
ಈ ಬ್ಯಾನರ್ ಬಗೆಟ್ ಶರಣ್ ಪಂಪ್‌ವೆಲ್ ಪ್ರತಿಕ್ರಿಯೆ ಕೊರ್ದು ಮೂಲು ದಾದ ಶರಿಯತ್ ಕಾನೂನು ಉಂಡಾ? ಇಂಚಿನೆಕ್ಕ್ ಪೂರಾ ಹಿಂದುಲು ಬಗ್ಗರೆಬಲ್ಲಿ. ನಿಕ್ಲೆನೊಟ್ಟು ಹಿಂದೂ ಸಮಾಜ ಉಂಡು. ಪೋಲೀಸ್‌ದಕುಲು ಈ ಬ್ಯಾನರ್ ಪಾಡ್ದಿನಕಲೆನ ವಿರುದ್ದ ಕ್ರಮ ದೆತೊನೊಡು ಪನ್ದ್ ಪನ್ಡೆರ್.
ಈ ಬಗೆಟ್ ಕುಡ್ಲದ ದಕ್ಕೆದ ಪಜ್ಜಿ ಮೀನ್ ಮಾರುನಕಲೆನ ಅಂಚೆನೆ ಕಮಿಷನ್ ಏಜೆಂಟ್ ಸಂಘದ ಅಧ್ಯಕ್ಷೆ ಕೆ.ಅಶ್ರಫ್ ಸ್ಪಷ್ಟನೆ ಕೊರ್ದು, ದಕ್ಕೆದ ಸಂಘದ ಪದುಕೆರ್ನ ಸಭೆಟ್ ನಿರ್ಣಯ ಮಲ್ತಿಲೆಕ್ಕ ಪದುಕೆರೆನ ಧಾರ್ಮಿಕ ಪರ್ಬದಪಗ ಕಡ್ಡಾಯವಾದ್ ರಜೆ ಪಾಡುಲೆಕ್ಕ ಮುಸ್ಲಿಮೆರೆನ ಈದ್ ಮಿಲಾದ್‌ದಾನಿ ರಜೆತ ಬಗೆಟ್ ಸೂಚನೆ ಕೊರ್ದಿತ್ತ್ಂಡ್. ಅವ್ ಅತ್ತಂದೆ ವರ್ಸೊಡು ಬಾರ್ಕೂರು ಪೂಜೆ, ಉಚ್ಚಿಲ ಪೂಜೆ, ಚೌತಿ, ಈದ್ ಉಲ್ ಫಿತರ್, ಬಕ್ರೀದ್, ಈದ್ ಮಿಲಾದ್, ಕ್ರಿಸ್ಮಸ್ ಬೊಕ್ಕ ಗುಡ್ ಫ್ರೈಡೆಗ್ ಕಡ್ಡಾಯವಾದ್ ರಜೆ ಪಾಡೊಡು ಪನ್ದ್ ಉಂಡು. ಉಂದು ಸುಮಾರ್ ವರ್ಸೊರ್ದಿಂಚಿ ನಡತೊಂದು ಬರೊಂದುಂಡು. ಇತ್ತೆ ಈ ಬ್ಯಾನರ್‌ದ ಬಗೆಟ್ ಕಲು ಒಲವು ಕೊರ್ದು ಪ್ರಚೋದನೆ ಮಲ್ಪರೆ ಗಲಸೊಂದಿಪ್ಪುನವು ಖೇದಕರ ಪನ್ದ್ ಪನ್ಡೆರ್.