Last updated on October 2nd, 2023 at 06:49 am
ಬೆಂಗ್ಳೂರ್: ಪೋವೊಂದಿತ್ತಿನ ಎಲೆಕ್ಟ್ರಿಕ್ ಕಾರ್‌ಡ್ ದಿಡಿಕ್ಕಂದ್ ಸೂ ಪತ್ತಿನೆರ್ದಾವರ ಇಡೀ ಕಾರ್ ಪೊತ್ತುದ್ ಸುಡುಸೂಕರಿಯಾತಿನ ನಡಕೆ ಸನಿಯಾರ ಮಧ್ಯಾಹ್ನ ಜೆ.ಪಿ ನಗರೊಡು ನಡತ್‌ದ್ಂಡ್. ಡ್ರೈವರ್‌ನ ಮಂಡೆಕರ್ಚಿರ್ದಾವರ ಕಾರ್‌ಡಿತ್ತಿನಕುಲು ದಾಲ ಪಡಾಯಿದಾಂತೆ ಬಚಾವಾತೆರ್.
ಜೆ.ಪಿ ನಗರೊಡು ಡ್ರೈವರ್ ಬೊಕ್ಕ ಆಯನ ಪಾಸಾಡಿ ಒರಿ ಎಲೆಕ್ಟ್ರಿಕ್ ಕಾರ್‌ಡ್ ಪೋವೊಂದುಪ್ಪುನಗ ಒರರ್ದ್ ಒರಾನೆ ಪುಗೆ ಬರ್ಯೆರ ಪತ್ತ್ಂಡ್. ಅಪಗನೇ ಕಾರ್‌ನ್ ಸಾದಿ ಬರಿಟ್ ಉಂತಾಯಿನ ಡ್ರೈವರ್ ಬೊಕ್ಕ ಆಯನ ಪಾಸಾಡಿ ಕಾರ್‌ರ್ದ್ ಜತ್ತ್‌ದೆರ್. ತೂಯಿ ತೂಯಿಲೆಕನೆ ಇಡೀ ಕಾರ್‌ಗ್ ಸೂ ಪತ್‌ದ್, ಸುಡುಸೂಕರಿ ಆತ್ಂಡ್. ಈ ದೃಶ್ಯೊಲು ಮೊಬೈಲ್‌ಡಾ ಕೈದಾದ್, ಒರ್ಮೆಲ ವೈರಲ್ ಆತ.
ಕಾರ್‌ಡಿತ್ತಿನ ಕೆಲ ಸೊತ್ತುಲು ಪೊತ್ತುದು ಪೋತ. ಈ ಪೊರ್ತುಡು, ಸಾದಿಡ್ ಟ್ರಾಫಿಕ್ ಜಾಮ್‌ಲಾ ಆದಿತ್ತ್ಂಡ್. ಒಂತೆ ತೈರ್‌ದ್ ಜಾಗೆರ್ದ್ ಪೊತ್ತುದು ಪೋತಿನ ಕಾರ್‌ನ್ ದೆಪ್ಪಾದೆರ್.
ಎಲೆಕ್ಟ್ರಿಕ್ ಗಾಡಿಲೃಡ್ ಸೂ ತೋಜಿದ್ ಪೊತ್ತುದು ಪೋವೊಂದುಪ್ಪುನ ನಡಕೆಲು ಅಪಗಪಗ ವರದಿಯಾವೊಂದುಪ್ಪುವ. ಎಲೆಕ್ಟ್ರಿಕ್ ಗಾಡಿಲಿತ್ತಿನಕುಲು ತನ್ಕುಲೆ ಗಾಡಿಲೆನ ಬ್ಯಾಟರಿಲೆನ್, ಬೇತೆ ಎಲೆಕ್ಟ್ರಾನಿಕ್ ಸೊತ್ತುಲೆನ್ ಅಪಗಪಗ ತೂವೊಂದು, ತೆಟ್ಟ್‌ದಿತ್ತ್ಂಡ ಪಗತೊಂದು ಉಪ್ಪೊಡು.