Last updated on October 7th, 2023 at 07:30 pm
ಸರ್ಕಾರದ ಯೋಜನೆಲು, ಕಡ ಗೆತೊನೆರ ಆಧಾರ್, ಪಾನ್, ವೋಟರ್ ಐಡಿಲೆನಂಚಿನ ಕಲ್ವ ದಾಖಲೆಲೆನ್ ಉಂಡು ಮಲ್ತ್ ಕೊರೊಂದಿತ್ತಿನ ಒರ್ಯನ್ ಕುಡ್ಲ ನಗರ ಪೊಲೀಸೆರ್ ಕೈದ್ ಮಲ್ದೆರ್.
ಆರೋಪಿನ್ ಕುಡ್ಲದ ಬಜ್ಜೋಡಿ ಬಿಕರ್ನಕಟ್ಟೆ ನಿವಾಸಿ 41 ವರ್ಸೊದ ಬರ್ನಾಡ್ ರೋಶನ್ ಮಸ್ಕರೇನಸ್ ಪಂದ್ ಗುರ್ತಪತ್ತ್‌ದೆರ್. ಆರೋಪಿ ಪೇಂಟೆದ ಕಂಕನಾಡಿ-ಪಂಪ್‌ವೆಲ್‌ ಪರ ಸಾದಿಡ್ ಇಪ್ಪುನ ವಿಶ್ವಾಸ್‌ ಕ್ರೌನ್‌ ಅಪಾರ್ಟ್‌ಮೆಂಟ್‌ದ ನೆಲಮಾಲಿಗೆಡ್ ಕರಿನ 3 ವರ್ಸೊರ್ದಿಂಚಿ ‘ಹೆಲ್ಪ್‌ಲೈನ್‌ ಮಂಗಳೂರು’ ಪುದರ್‌ದ ಸಂಸ್ಥೆನ್ ನಡಪಾವೊಂದಿತ್ತ್‌ದ್, ಕಲ್ವ ದಾಖಲೆ ಉಂಡು ಮಲ್ತೊಂದಿತ್ತೆ ಪಂದ್ ಕುಡ್ಲ ಪೇಂಟೆ ಪೊಲೀಸ್ ಕಮಿಷನರ್ ಅನುಪಮ್‌ ಅಗರ್‌ವಾಲ್‌ ತೆರಿಪಾದೆರ್.
ರೇಷನ್ ಕಾರ್ಡ್ ಡೇಟಾನ್ ಡೌನ್‌ಲೋಡ್ ಮಲ್ತ್‌ದ್ ಗ್ರಾಮೀಣ ಸೇವಾ ಕೇಂದ್ರೊದ ವೆಬ್‌ಸೈಟ್ ಗಲಸೊಂದಿತ್ತೆ. ಸುರುಕು ಆರೋಪಿ ಆಧಾರ್ ವೆರಿಫಿಕೇಶನ್‌ದ ಬೇಲೆ ಮಲ್ತೊಂದಿತ್ತೆ. ಅಂಚಾದ್ ಆಯಗ್ ಸರ್ಕಾರಿ ಡೇಟಾಬೇಸ್‌ಗ್ ಎಂಟ್ರಿ ಸುಲಭ ಆದಿತ್ತ್ಂಡ್. ಆಧಾರ್ ಡೌನ್‌ಲೋಡ್ ಮನ್ಪೆರ ಪಿಡಿಎಫ್ ಎಡಿಟರ್‌ನ್ ಗಲಸೊಂದಿತ್ತೆ ಪಂದ್ ಆಯುಕ್ತೆರ್ ಪಂಡೆರ್.
ಒಂಜಿ ಅಂಗಡಿದಕುಲು 500 ರ್ದ್ 20,000 ರೂಪಾಯಿಡ್ ಕಲ್ವ ದಾಖಲೆಲೆನ್ ರೆಡಿ ಮಲ್ತ್ ಕೊರೊಂದುಪ್ಪುನ ಬಗೆಟ್ ಎಂಕ್ಲೆಗ್ ಒಲವು ತಿಕ್ಕ್‌ದಿತ್ತ್ಂಡ್. ಡುಪ್ಲಿಕೇಟ್ ಆಧಾರ್, ರೇಷನ್ ಕಾರ್ಡ್, ಮಾರ್ಕ್ಸ್ ಕಾರ್ಡ್, ಡುಪ್ಲಿಕೇಟ್ ಟ್ರೇಡ್ ಲೈಸೆನ್ಸ್, ಬರ್ತ್ ಸರ್ಟಿಫಿಕೇಟ್ ಇಂಚ ಬೇತೆ ಬೇತೆ ಕಲ್ವ ದಾಖಲೆಲೆನ್ ಉಂಡು ಮಲ್ತೊಂದಿತ್ತೆರ್. ಶುಕ್ರವಾರ ದಾಳಿ ಮಲ್ತ್‌ದ್ ಉ್ಂಬ್ಯೆ ಮಲ್ತ್ ದೀದಿತ್ತಿನ ಕೆಲ ಕಲ್ವ ದಾಖಲೆಲೆನ್ ವಶೊಕು ಗೆತೊಂದುಂಡು. ಆರೋಪಿಲೆರ್ದ್ ಕಲ್ವ ದಾಕಲೆ ಗೆತೊಂದಿನಕ್ಲು ಬೇತೆ ಬೇತೆ ಬ್ಯಾಂಕ್‌ಲೆಡ್ ಕಡ ಗೆತೊಂದೆರ್. ಎಚ್ಚಾದ್ ಸರ್ಕಾರೊದ ಬೇತೆ ಬೇತೆ ಯೋಜನೆಲೆನ್ ಈ ಕಲ್ವ ದಾಖಲೆ ಕೊರ್ದು ಗೆತೊಂದೆರ್ ಪಂದ್ ಕಮಿಷನರ್ ಪಂಡೆರ್.
ಆರೋಪಿಲೆರ್ದ್ ಲ್ಯಾಪ್‌ಟಾಪ್, ಕಲರ್ ಪ್ರಿಂಟರ್, ಬಯೋಮೆಟ್ರಿಕ್ ಟೂಲ್‌ನ್ ಪೊಲೀಸೆರ್ ವಶೊಕು ಗೆತೊಂದೆರ್. ಸಿಇಎನ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಆರೋಪಿನ ವಿರುದ್ಧ ಭಾರತೀಯ ಸೆಕ್ಷನ್ 465, 468, 471 ಬೊಕ್ಕ 420 ದ ಅಡಿಟ್ ಪ್ರಕರಣ ದಾಕಲಾತ್ಂಡ್.